身心都要Green一下 清新Vegan Option Cafe(有片)
2019-02-18

新派、西式素食文化又或者係年輕嘅素食者,唔少都偏向選擇食啲天然啲嘅素菜。中式傳統仿葷食嘅素雞、素鴨同酸齋,呢啲都比較多加工同調味,相對就無咁健康。近排就有唔少Cafe開始為呢班素食者提供一啲較新派嘅素食Menu,就算唔係素食者,耐唔耐都可以畀自己Refresh吓、健康吓嘛。
 

純素香濃朱古力蛋糕 Infiniti C


Cafe主力推廣咖啡及 Gluten Free (無麩質)食品,好似招牌Vegan Chocolate Cake就係純素(無蛋奶成份),聞起嚟帶椰子香,食落朱古力味道濃郁,皆因用上70%意大利朱古力。而Traditional Apple Oatmeal Pie就好有肉桂同蘋果甜香,中間係焗香咗嘅燕麥片,口感豐富。
 


除咗蛋糕甜品,鹹食亦有唔少Vegan選擇。Pea Tofu Ricotta Warm Salad有青瓜、豆腐、豌豆、枝豆等,煎熟後再加醬汁撈勻,暖暖地又幾惹味。Bibibap Tofu on Toast就係韓式風味,上面嘅菠菜同蘿蔔絲真係幾辣下!下面嘅豆腐口感軟嫩,層次分明。
 


Cafe主打嘅咖啡亦可以轉用燕麥奶,好似呢杯Dirty Masala Chai Latte就係店家自己用多款馬薩拉香料加錫蘭紅茶,再加Espresso同一小羮椰子油,糅合多款香味同順滑口感。
 

鹹味Pancake夠創意 順逆珈琲酒館

圖:小詩... 

店面環境用上木質設計,加上柔和燈光,非常舒適。比較特別嘅有用黃豆做嘅純素芝士、蘑菇同素香鬆嘅純素鹹Pancake,仲有唔少輕食供應,好似無麩質意粉、蛋糕同Bagel 。店鋪唔只推廣公平貿易嘅咖啡,亦好支持同使用本地新鮮食材。
 

幸福自然之味 LN Fortunate Coffee

圖:koralahamsterlam

LN係「Loving Nature」嘅簡寫,所以店內供應嘅菜式同嘢飲都係純素,主打味道簡單、自然,當中用嘅素肉更係以百分百植物性食材烹調出嚟。飽肚之選幸福公司三文治,材料豐富,有生菜、蕃茄、牛油果同埋一啲都唔油膩嘅素雞肉,食落好清新。
 

花多眼亂之選 2DP

圖:cmei1002L.T.L.

餐廳主打茶味雪糕、養生茶飲、特色甜品同唔同嘅素食主食,例如意粉同漢堡,全部賣相都好吸引。不過要留意返,唔係每樣嘢食都係純素,但唔洗擔心!餐牌都好細心咁清楚寫明有邊啲嘢食係純素或者係有五辛,方便唔同嘅素食者。純素食推介就有素牛漢堡,Juicy得嚟又冇食牛肉嘅負擔。
 

健康飽肚又實惠 Loving Nature 

圖:小蘑菇.v.

環境闊落舒適,價錢實惠,推介牛油果天貝壽司配香煎餃子。順帶一提,原來天貝係一種有豐富蛋白質嘅發酵食品嚟㗎!而且仲有自家煲嘅清甜湯水跟埋,啱晒喺正葵興工厦返工,耐唔耐想試下一餐半餐食素嘅打工仔!仲有純素芝士凍餅同一啲烘焙包點,想悠閒High tea又得。
 

更多【開飯專題】:
1. 7大特色雞翼介紹 雞翼控是時候有新刺激了
2. 今期流行皺皮腸粉 石磨粉漿米香重
3. 一路睇靚景一路Chill !香港露天餐廳酒吧好介紹

 
無芝士嘅芝士蛋糕 The Missing Piece

圖:甜品專家Vannnnnnnnnnnnnn

呢間Cafe細細哋,地方唔大,不過都好多捧場客!輕食主食都有選擇。素食者除咗可以喺度嘆返杯手沖咖啡之外,仲可以試吓佢嘅蛋糕。呢度嘅Cheese cake係純素加Gluten free,係冇芝士㗎。但唔會因為佢唔係真芝士就冇晒質感,相反食落輕盈啲仲冇咁Guilty啦。
 

自家製心機出品 Lucy Coffee & Food

圖:misskitbSerene_lam_lam

呢度有唔少無蛋奶嘅自製蛋糕同麵包選擇,而且蛋糕鬆軟唔乾。至於素漢堡嘅麵包用咗全麥、苔麩同埋自培酵母製,素扒就用咗用黑豆、糙米、藜麥、燕麥同菇菌等,口感十足。另外仲有純素芝士醬煙通粉沙律,同羽衣甘藍藜麥沙律等加入Super food嘅菜式。
 

輕盈健康版Cupcake The Cakery

圖:PandaBon懶懶鬆弛熊

唔少Cupcake比人印象都係又肥又甜,但呢間鋪頭嘅Cupcake就健康得多!因為佢哋嘅蛋糕主打用上有機食材,例如以天然糖代替精製糖,仲有無糖、無奶、無麩質嘅純素蛋糕選擇。食多幾個都唔怕肥啦。
 

多款大件足料蛋糕 Sweetpea Café 

圖:forevaXmetallicseatnuts

呢間係中環嘅Cafe,店內非常寧靜舒適。Menu有好多素食選擇,而且都好貼心咁有Label邊啲係純素邊啲唔係,一清二楚!飲品由咖啡到奶昔都好多純素嘅款式,亦有唔少Brunch嘢食,啲蛋糕大件得嚟又冇肥膩嘅感覺。
 

文:Yanny、Cathy
相:Cathy、會員上載
片:Cathy

關鍵字
素食
cafe
純素
無麩質
superfood
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
1天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
6天前
日本人氣茶室登陸尖沙咀 招牌Tea Set、甜品推介(有片)
2019-09-25
高CP值火鍋放題 (1)
2天前