呢個非常時期大家都想食得健康啲，深水埗呢間主打砂鍋雞湯麵嘅小館就啱晒！用雞同豬肉熬過夜，再加藥材或者糯米酒等熬成唔同養生湯底，加上用砂鍋一齊煮，食嘅時候保持暖笠笠又唔會變淡。另一推介係酒香小食，醉鵝肝入口即溶，醉鮑魚等海鮮都非常入味呀。
 

醉藥雞個名讀落就幾搞笑，其實係代表咗酒香冷盤、藥膳、同砂鍋雞湯三大主打，而且用料一啲都唔弱雞㗎。雞湯熬過夜煲成足料雞湯之後，部分會加入糯米酒、紅棗、雲耳、淮山煮成雞酒，另外亦有加入北芪、黨參、淮山、杞子等八種藥材煮嘅藥膳湯底。
 

招牌砂鍋醉藥雞（$68）

砂鍋雞湯麵有唔同配搭，最受歡迎嘅就係呢款一上枱就聞到非常香嘅砂鍋醉藥雞！煮雞酒係唔少女士生完BB都會食嘅，勝在補而不燥，有助行氣活血。湯底飲落有好重酒香同雞油香，味道鮮甜香醇。
 

雞肉選用三黃雞，皮彈肉嫩，配埋煮雞酒一齊食雞味特別濃郁。加分點係即叫即煮，用砂鍋生滾嘅方法同時煮湯底、麵同雞肉，唔係好似坊間其他餐廳咁麵同湯底分開上，咁就唔驚啲麵倒落去湯底會變淡啦。
 

砂鍋人參雞（$68）

想清啲亦可以揀足料雞湯底，味道帶雞同豬嘅肉香。熬煮嘅時候已經將多餘嘅油分同雜質撇除，加上砂鍋保溫效果好，所以飲完成碗都無油膩感。人參分量唔算好多，味道帶甘苦。麵可以揀米線、米粉、粉絲、刀削麵、銀針粉、瀨粉或者白飯。米線滑溜彈牙，刀削麵就比較掛湯。
 

 

醉三鮮（配麵/飯 $85）、溏心醉蛋（+$10/隻）

小館所有酒香小食都係自家製，每款食材浸嘅時間都唔同，落足心機。三鮮分別係鮑魚、蝦同花螺，鮑魚口感彈牙，越咬越有酒香！蝦肉爽口，花螺亦相當入味。另加嘅溏心醉蛋更加係酒香同蛋香兼具，軟心口感真係無得輸。
 

酒香小食可以配搭粉麵，而且可以任揀藥膳湯或者濃雞湯。開飯仔就揀咗藥膳湯，以藥材嘅甘味為主，唔會太苦。
 

醉鵝肝（$98）

餐廳推介小食之一，鵝肝口感非常柔滑，Creamy到好似入口即溶咁，加上酒香同鵝肝嘅甘香非常夾！酒香小食仲有醉乳鴿、醉牛舌、醉鴨舌，同較為少見嘅醉苦瓜、醉冰梨等，外賣帶返屋企隨時食都唔錯呀。
 

醉藥雞
地址：深水埗福榮街103號地舖

文、相、片：Cathy