超Juicy!5間不得不試韓式炸雞推介
2021-12-30

講到韓式炸雞,真係每次去親韓國都必食嘅item,奧妙之處在於雖然加咗醬汁,但外皮仍然可以長時間保持香脆,肉汁仲好豐富而且又夠多口味。雖然而家都係未飛得住,但其實香港都有唔少出色嘅韓式炸雞食㗎,有唔少都係小店嚟添!

咯咯雞韓食店  

韓式炸雞小店,大角咀店位置唔多,主要做外賣生意,而尖沙咀店就主打堂食。店主特意向韓國朋友取經,炸雞外皮炸粉經過反覆試驗,溝入三四種炸粉,保證炸雞炸起後放半小時都仍然香脆!口味方面推介好有港式風味嘅地道港式鹹蛋黃醬,平時食鹹蛋黃嘅食物最怕就係易膩,炸雞加上鹹蛋黃醬同鹹蛋黃碎,有香濃蛋黃味但又唔會太膩。最人氣呢就係蜜糖芥末醬口味,自家調配,芥末味同甜味都恰到好處。鍾意食辣嘅咁就要去尖沙咀店喇,因為有尖沙咀店限定嘅麻辣口味呀!

李家 

 圖: ChongWaiLee

喺韓式炸雞啱啱流行嘅時候就已經存在,可以話係香港嘅第一代韓式炸雞專門店,由韓國人開設。炸雞好正宗,可以自選兩款口味,同帶骨或無骨,炸雞即叫即製,上檯時仍熱辣辣。雞皮脆身香口,外層炸粉唔太厚,食落啖啖肉,的確有水準。口味方面有原味、甜辣、大蔥、蜂蜜蒜蓉、芝士及辣咖喱味,款款份量都好多,一份有成十幾件雞,同朋友飲酒吹水食就最正。

雞吧

 圖: hkyuyuyu1

石門愈來愈多嘢食喇,呢間新開無耐嘅外賣店主打韓式炸雞同港式小食。炸雞分大、中、細size,今次真係「毒」食一份都無問題!口味方面有7款,一樣可以選擇半半,最推薦係黃金芝士口味,首先炸雞一樣做到皮脆內嫩,點埋香濃嘅芝士醬真係無得輸,啖啖都係芝士味~另外蜂蜜牛油口味都係另一人氣之選,味道甜甜地,絕對可以一件又一件咁接住食。

My Ahjussi

 圖: yumsik

啱晒相機食先嘅韓系咖啡店,餐廳裝潢以白色簡約為主,牆身佈滿花花。食物方面都好有誠意,主打韓式fusion菜,好似招牌菜卡邦尼炸雞,同坊間唔同嘅係,呢度特意選用歐洲原隻燒春雞,然後連埋骨一齊炸,會比較嫩滑同埋多肉汁,卡邦尼醬汁同炸雞嘅配搭都令人有驚喜。鹹蛋黃炸雞都值得一試,惹味充滿鹹香,醬汁加入兩至三粒鹹蛋黃同牛油等食材炒至起沙,經過調較後食多兩件都唔會膩。另外餐廳有聘請特殊人士工作,大家可以去支持下。

Hoo韓國包車 

 圖: EatWithLocaltht_dawn

一間裝修好有心思嘅韓式餐廳,以韓國街頭大排檔為主題,周圍都充滿霓虹燈~餐廳供廳多款韓國菜,韓式炸雞當然係人氣之選,口味雖然得基本款,但款款質素都唔錯呀。首先係人氣甜辣炸雞,甜同辣嘅比例掌握得啱啱好,醬汁包裹住香脆嘅炸雞,一啖咬落去真係好滿足。唔食辣嘅朋友醬油炸雞都係唔錯嘅選擇,味道甜甜鹹鹹,愈食愈開胃。




文: Yanica


關鍵字
炸雞
韓國菜
尖沙咀
大角咀
石門
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
1天前
【2022生日優惠】持續更新!6月壽星免費嘆生蠔/清酒
2022-05-31
5月份好評餐廳十強
2022-06-06
酒店新出「北歐神話」下午茶 10款鹹甜點色彩繽紛 多款海鮮入饌
2022-06-10
香港4大Crêpe推介!M9和牛可麗餅、蘋果金寶奶油醬口味
2022-05-31