又有台灣人氣小食嚟到香港！今次仲要一間店集合兩個唔同品牌，從食嘅蛋餅、吐司、炸物，到飲嘅黑糖鮮奶、芋頭椰奶等都應有盡有，難怪開咗無耐已經有唔少街坊同學生熟客啦。
 

初茶 X 山雞部其實係兩個品牌，同樣嚟自台中。初茶係新品牌，主打醇鮮奶等唔同台式飲品，嚴選斯里蘭卡紅茶同台灣茶葉，盡量選用天然食材，唔加香精。山雞部就從台中一中商圈崛起，主打唔同小食，係當地人氣早午餐店之一。
 

燒肉起司千層蛋餅（$28）

燒肉用嘅係巴西梅頭豬肉，脂肪分佈平均又爽口，燒嘅時候加入調配過嘅台式醬油，食落特別香。台灣進口嘅餅皮煎至酥脆煙韌，芝士進一步增加香味，再加埋煎蛋，口感層次夠豐富。外面撒上台灣五香粉同海苔粉，香氣聞起嚟好有去到台灣夜市嘅感覺！
 

起司肉蛋棉吐司（$25）

三文治同樣足料，用麵包夾咗椰菜絲、綿綿蛋、芝士、燒肉、沙律醬同青瓜。綿綿蛋係用正方模煎出嚟嘅雞蛋，特別厚身之餘仲Keep到少少蛋汁！燒肉同芝士令三文治更加香口，椰菜絲同青瓜就可以平衡返膩度，大份得嚟又滿足。
 

花雕雞腿塊-扛霸公仔麵（$48）

選用美國雞髀肉，醃料當中特別加入花雕，食嘅時候雞肉就帶有獨特嘅酒香！而炸粉亦沿用台灣自家調配嘅秘方，炸起嚟金黃香脆，裡面嘅雞髀肉亦幾嫩滑。可以配台灣公仔麵、功夫麵，或者銷魂飯。
 

 

芋頭椰奶（$32/大杯）

飲品方面以醇鮮奶系列比較特別，芋頭椰奶嘅主角係蜜餞芋頭，同坊間部分用芋頭粉嘅飲品店唔同，呢度見到又食到一件件芋頭肉，保證真材實料！而椰奶係明治4.3鮮奶配椰子粉，所以飲落香濃又有椰子香。椰奶配芋頭都幾夾，略嫌蜜餞芋頭味道偏甜，蓋過芋頭本身嘅香味。
 

黑糖厚鮮奶（$28/中杯，$32/大杯）

飲品大部分材料都嚟自台灣，好似珍珠就從台灣真空運港，每日再用台灣黑糖熬煮一至兩個鐘至完全入味，而且每煲黑糖珍珠只會用三個鐘，保證珍珠狀態係最好嘅！亦因為黑糖珍珠無加任何防腐劑或添加劑，口感無坊間一般嘅珍珠咁煙韌，建議大家打卡後搞勻先飲，等冰塊冷卻暖暖地嘅黑糖珍珠，會有外軟內韌嘅口感。
 

抹茶鮮奶綠（$28/中杯，$32/大杯）

抹茶底用咗台灣高山青茶配日本靜岡抹茶粉，之後再加明治4.3鮮奶形成漸層效果。特別加入高山青茶係希望同抹茶夾到之餘，多一份清新少一份膩度。的確飲落先有抹茶香，再有一重青茶嘅甘味。
 

初茶 X 山雞部
地址：土瓜灣農圃道18號LG樓3號舖

文、相、片：Cathy