康城新商場開業後，陸續有唔少餐廳進駐，今次到呢間全新嘅烤鴨品牌京滬佳餚！雖然係京滬菜館，但餐廳風格就走年輕簡約及時尚路線，仲設有戶外坐位，天氣涼涼地喺戶外食中菜又幾Chill～食物方面主打當然唔少得北京填鴨，選用北京金星填鴨，酥而不膩。亦有一系列招牌菜式包括黃金鴨件伴魚子醬、金湯藤椒魚片等，同場仲有調酒師即場沖製cocktails！

北京填鴨三食($598)

嚟得嘅北京填鴨一定係必食，想試吓唔同煮法，就可以試試北京填鴨三食。包括一份京滬酥香烤鴨、雲吞鴨肉湯、京醬涼瓜炆鴨架或椒鹽香酥鴨架，再配有餅皮及8款配料供包裹食用。

京滬酥香烤鴨選用北京白羽鴨，屬於四系酥鴨種，不腥不騷。而製法一反傳統採用西式嘅蒸烤風爐燜烤製作，嚴選飼養 60 日嘅雛鴨，製成淨重 2kg 鴨胚。鴨坯需先喺零下 18 度嘅環境中冷凍一個星期，令皮下脂肪均勻凝結成塊，上皮後放入晾鴨櫃進行抽濕風乾排酸。長達 36 小時嘅熟成，令鴨胚減少水份，凝聚皮下脂肪。之後用230度高溫烤製長達 70 分鐘，令烤鴨皮酥脆而不油膩。

黃金鴨件伴魚子醬($328/4)

酥脆厚身嘅烤鴨皮上放上滿滿魚子醬，連埋雙層薯片一齊食，一入口充滿鴨油香，而清爽嘅青瓜及山楂酸味更有助中和油膩感，食多兩件都無問題！

脆皮牛肋骨條($368)

超吸睛嘅牛肋骨條！牛肋骨肉質軟腍，而帶筋嘅部份有咬口，調味方面只加入少量辣粉等，唔會蓋過肉嘅原味。

黑醋黃魚($188)

平時食京滬菜黃魚多以糖醋汁入饌，而呢度就選用黑醋，黃魚炸得香脆外更開胃。

楊枝沙律蝦球($208)

沙律蝦球就食得多，楊枝沙律蝦球加入柚子、藍莓及士多啤梨等水果以及香甜嘅醬汁，味道又幾清新。

金湯藤椒魚片($248)、酸湯紅薯粉肥牛($188)

另外當然唔少得近年好hit嘅酸湯魚及牛喇～金湯藤椒魚片利用藤椒獨有味道，製成帶點麻辣微酸嘅酸湯魚片，而酸湯肥牛嘅牛肉片大片軟腍，仲有煙韌嘅紅薯粉食呀！

京滬佳餚

地址: 將軍澳康城路1號The LOHAS3樓333號舖

文、相、片: Yanica