舊時味道重現!經典港式時新漢堡黃埔新店終開業 (有片)
2018-09-20

黃埔站附近最近新開咗間漢堡店,空間寬敞,橙黃色嘅枱櫈、menu上係最原始最簡單嘅港式漢堡,就係有種熟悉嘅感覺。啊!原來係由以前紅磡人氣漢堡老店(時新快餐店)嘅大哥同阿仔Ricky主理㗎。

餐牌雖然轉咗做電子形式,但依然係熟悉嘅嘢食,漢堡啦熱狗啦炸薯條啦炸雞脾啦等等。最受歡迎嘅當然係由最基本嘅單層漢堡進化而成嘅雙層漢堡芝士蛋包啦。繼續沿用嘉頓麵包,烘香後疊上芝士、淋咗秘製沙律醬嘅漢堡扒、蛋、再放多層漢堡扒。麵包依舊嘅軟熟,秘製醬汁同樣有住蕃茄、生菜等酸甜味,牛肉夠juicy,中間同以前一樣,都係混入咗洋蔥,所以望落冇咩材料但食落味道豐富,重要係味道始終如一,同舊時食開嘅分別不大。惟一美中不足就係牛肉同沙律醬實在太juicy,蓋過咗啲芝士味啊。

 

食漢堡,硬係鍾意配返啲薯條先開心。波浪紋嘅炸薯條,薯味十足,又炸得香脆。

炸雞脾都好大隻,層皮脆卜卜,雞肉嫩滑,美食當前唔好講個肥字,因為真係幾難忍口嘅。

除咗一眾回憶中嘅味道之外,新店都有些少新加嘅嘢食。呢條熱狗,就咁望未必睇得出分別,熟客就可能會發現……條腸大條咗呀!以前係雞肉腸嚟嘅,而家就換咗做法蘭克福腸。大條啲,肉味香啲。

另外,仲有新飲品——紅豆咖啡同紅豆奶茶。茶香奶甜,仲有好多紅豆咬下咬下咁,唔錯。

Btw,可能有人會問,餐廳名係咩意思?第三代負責人Ricky解釋:「SSHKB,SS係舊舖名,HK代表香港,而個B字,一方面係代表burger,而logo上變咗3字就係因為傳承到去我而家係第3代呀。」明晒。Ricky仲話,自從舊店結業後都好多街坊問佢哋幾時會開返,而佢哋都好希望新店都係喺返紅磡區,話晒啲街坊同老朋友都喺度嘛。「而家開返,都好希望可以繼續延續阿爺嘅心血,保留呢份回憶同味道。」



SSHKB1963
地址:紅磡蕪湖街83號逸酒店地下2A-2B號舖

文、相、片:Kar


關鍵字
紅磡
黃埔
漢堡
時新
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
3天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
4天前
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12