自製手打意粉配本地手工啤!大埔新開無味精西餐廳(有片)
2020-03-16

意粉大家應該都食唔少,但手打意粉就唔係間間舖都有。大埔呢間新開嘅餐廳就主打每日新鮮製造嘅手打意粉,口感彈牙,特別推介墨汁烏冬!其他小食同主菜唔少都落足心思,就連啤酒都全部係本地手工啤品牌,夠晒特色。
 


Homeland唔單止主打手打意粉同本地手工啤,Menu上所有菜式都係無味精㗎。嚟到必食手工意粉,意粉每日由廚師手打,從麵粉開始製作麵糰、發酵、揉麵,當中秘訣係反覆折疊同擀麵,會令麵糰更有彈性。意粉選用幼細嘅00麵粉,烏冬就會用小麥粉製作。
 


海鮮自家製墨汁烏冬($118)

加入墨汁嘅烏冬變成黑色,配搭香辣蕃茄汁同各款海鮮:法國藍青口、越南虎蝦、韓國活蜆、深海八爪魚同帶子。烏冬口感煙韌,掛上微酸香辣嘅醬汁,會令人一啖接一啖係咁食。海鮮調味比較輕,以原本鮮味為主。貼心位係醬汁可以揀小辣、中辣或者大辣,開飯仔就覺得中辣啱啱好。
 


印度風天多利雞闊麵($88)

將印度著名嘅天多利烤雞變成意粉,醬汁運用大量香辛料,所以聞起嚟有啲似咖喱,但食落會無咁油但更Creamy, 帶少少椰香。香辛料香味可以刺激食慾,雞肉口感柔嫩,加埋彈牙嘅闊條麵,口感同味道層次都好豐富。
 


特級安格斯漢堡($88)

主菜另一推介係特級安格斯漢堡,手打安格斯漢堡扒可以選擇要幾成熟度,半熟就最牛香濃郁而且肉嫩多汁。配料有芝士、紫洋蔥、蕃茄、生菜,麵包亦特別揀有口感嘅厚身漢堡包,最後灑上芝士碎,食起嚟更香口!伴碟嘅薯條係有皮嘅粗身薯條,外脆內軟。
 

更多【新店直擊】:
1. 足料砂鍋雞湯麵+入味酒香小食 深水埗新開養生小館
2. 西環新開龍蝦海鮮專門店 必試超濃厚龍蝦Mac & Cheese、龍蝦奶油扁意粉
3. 必試即蒸石磨腸粉+煎手工餃子!尖沙咀新開小食店

 

精選全日早餐($88)

心大心細咩都想食嘅朋友就可以揀全日早餐或者拼盤,精選全日早餐有煙三文魚、牛油果沙律、煙肉、煙三文魚、德國香腸、多士,雞蛋仲可以揀要炒蛋、太陽蛋、雙面蛋定水煮蛋呀。牛油果沙律配搭黑醋汁,平衡返煙肉同煙三文魚嘅膩度。
 


小食拼盤($88)

好啱用嚟送啤酒嘅炸物拼盤,有肉醬薯條、酥炸雞翼、脆炸豬皮,同吉列廣島蠔。蕃茄肉醬微辣惹味,雞翼加上柚子蜜醬汁增添清新感。大大塊豬皮係自己炸,食落索索聲好似食緊蝦片咁,香脆唔油膩,仲帶豬油香。而吉列廣島蠔皮脆肉Creamy又有蠔嘅鮮味!
 


(左)閃耀 Shining Porter($68)、(右)Deadman Crazy Rabbits Stout($68)

餐廳有超過20款嚟自本地手工啤酒廠唔同嘅手工啤酒,按Light、Medium、Full分為三大類。香港城釀嘅閃耀 Shining Porter特色係釀製時加入伯爵茶,會有伯爵茶獨特嘅佛手柑香,同Porter嘅拖肥味,適合配搭豬扒、羊扒等肉味唔會太濃嘅主菜。

而Deadman Brewer嘅Crazy Rabbits係Espresso Stout,飲落富咖啡香,同時帶焦糖同黑朱古力味道,建議配搭德國腸拼盤、或者全日早餐。






Homeland  
地址:大埔東昌街2號地舖




文:Cathy
相、片:Calvin Kwok

關鍵字
大埔
手打意粉
漢堡
全日早餐
手工啤酒
Homeland
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
4天前