聖誕食好西!精選聖誕大餐+到會!
2017-12-15
聖誕節有人鍾意同屋企人或者朋友出街食,又有人鍾意叫埋親朋戚友上嚟屋企叫到會開party。今年未決定揀邊樣好?不如睇下開飯仔幫你哋精選嘅聖誕大餐同外賣到會先再揀啦~

聖誕大餐

意式聖誕晚餐 Operetta

呢個餐夠3-4個人一齊食,由前菜到甜品都包晒,淨係前菜都有9款一口菜式,相當豐富。意大利風味為主嘅聖誕大餐,有炸釀肉丸、小龍蝦意粉等等,甜品仲有意大利雪糕同聖誕樹頭蛋糕添。 

德國聖誕二人餐 Beerliner German Bar & Restaurant

聖誕就梗係要約埋另一半出去食,拍下拖放下閃。呢間餐廳嘅聖誕二人餐,前菜焗蘑菇合桃卷外皮鬆化,食落好香口;主菜慢煮鴨腿以油封慢煮個半鐘,皮脆肉嫩。冇旅行去嘅,留港食返個德國大餐都叫有啲異國聖誕feel嘅。

歐洲火焰燒春雞 Y Show Tasty

聖誕節梗係要食火雞啦,不過此火雞不同被火雞,呢隻係真‧火雞呀。呢間主打歐洲菜嘅餐廳,推出咗隻火焰燒春雞,上枱嗰陣會即席喺客人面前倒酒點火,好有氣勢。甜品仲有法式冰糖燕窩燉蛋白添,又滋潤又養生,又唔怕肥。

銅鑼灣窩心小店聖誕餐   GoodDay Cafe


聖誕節想食好啲,同時亦可以支持一下小店嘅。呢間喺銅鑼灣鬧市由兩口子一齊打理嘅Cafe亦有推出聖誕套餐,由湯、前菜、主菜、甜品同特飲都有心思。而且主菜仲可以揀48度慢煮安格斯西冷牛扒、焗芝士波士頓龍蝦配龍蝦汁意大利飯等。12月21號前預訂仲有85折!

「茶香果甜」下午茶 星幕

聖誕夜晚已經留咗畀另一半,下晝都要留啲時間畀姊妹嘅。呢間酒店新出嘅tea set以水果同茶做主題,一系列嘅鹹甜點好似鮑魚雜果沙律、無花果配巴馬火腿、伯爵茶茉莉牛油蛋糕同栗子焙茶杯等等,多得嚟感覺都唔太heavy,仲有造型可愛嘅聖誕馬卡龍,呃like一流。
日期:12月20日至2018年1月1日

外賣 / 到會

廚師上門 OM Tapas

聖誕唔想出街食飯同人迫,喺屋企開P但又唔想自己煮?除咗叫到會、外賣之外,仲可以直接叫個廚師上門煮!坐喺度咩都唔使做就有好嘢食,西班牙菜喎,爽歪歪,你個party有最少10個人join就可以享用呢個服務喇。

外賣火雞 Bathers、Big Sur、Madam S’ ate

呢隻火雞夠晒重量級,有成八磅重,經已以煙燻同烤焗方法處理過,而且入面釀滿咗栗子同鼠尾草,套餐仲有以二焗薯、原種甘笋、煙肉碎燜煮小椰菜、烤胡桃南瓜濃湯同焦糖胡桃批。

七彩韓花卷 School Food

呢個韓花卷大人小朋友見到都應該會好開心,一共有十二款口味,可以自由組合揀4、6、8款做拼盤,有招牌烏卒卒又有紅葉花卷(即係蟹肉呀),樣樣都好colourful,得外賣先有,堂食冇㗎。其中最特別嘅係全新出嘅全素椰菜米紙卷,以椰菜同米紙包住9款蔬菜絲同雞蛋條,配埋酸汁,特別醒胃,開住party過返個韓冬。

鱈場蟹盛盒 千両

一班人開party,好多時都會有兜壽司,好食又飽肚嘛。呢個套餐以鱈場蟹為主打,另有壽司、刺身同三文魚胡麻沙律,連北海道芝士蛋糕都有,大滿足。

招牌雞髀 荔園茶餐廳

港式聖誕一樣可以好warm好開心,呢間餐廳嘅招牌雞髀一向都好受歡迎,到會嘅話仲有原隻釀糯米烤雞、香草燒羊架、咖哩慢溫牛肋肉同黑松露雜菇炒意粉等等,好多都係充滿童年回憶嘅味道。

1蚊1隻雞 KFC

聖誕餐唔一定全部都貴價嘅,一蚊一隻雞都有得食!由即日起至12月17日,以外賣熱線預訂聖誕美食夠指定嘅價錢,就可以用1蚊換到一隻香烤春雞喇!另外,如果你仲係學生哥,就可以享受學生限定套餐喇,一個set有成10款嘢食,都ok抵下,你知打咩電話call佢㗎啦?



文:Crystal
關鍵字
聖誕節
火雞
聖誕大餐
到會
party
下午茶
壽司
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
4天前
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
食肉獸必收藏!牛年到 五間品牛餐廳介紹返
2021-02-11
1月份好評餐廳十強
2021-02-09