繼承爸爸六十年手藝!旺角新開家庭風味台灣菜 家傳紅燒牛肉麵、家鄉鹽酥肉(有片)
2019-09-19

想食正宗台灣家鄉味道?旺角呢間新開嘅台灣菜可以助你一解思鄉之情,餐廳由台灣人Polly主理,爸媽由外婆時代已經喺台北同基隆開魯肉飯及牛肉麵店,已經有60年歷史。而Polly從小到大都喺家中餐廳由賣麵、打掃及煮麵開始學習,為咗唔想令手藝失傳,嫁來香港後就決心將呢種台灣味道帶嚟香港,沿用爸爸名字「阿木」開咗呢間餐廳。


店內除咗供應麵類,仲有超過二三十款小食、滷味、台式飲品及每日製作嘅手工芋圓甜品。


紅燒牛肉牛筋麵($69)

湯底用牛骨、牛肉、蔬菜及藥材煲足20小時,牛味濃郁。麵條沿用老店配方,用高根麵粉每日手工製作,彈牙爽口,而且為保新鮮,用唔晒的話絕不留過夜。


牛肉則採用最好嘅金錢腱,每塊都有成隻手咁大,店主話佢哋一塊牛腱只係切開八塊,所以寧舍厚身,而且雖然大塊但牛腱肉質軟腍。牛筋同樣軟腍入味,但仍保持咬口。


蕃茄牛肉粗關廟麵($68)

濃郁嘅牛骨湯加上新鮮蕃茄熬製,蕃茄嘅酸甜令味道更豐富、更開胃。鍾意食粗麵嘅朋友不妨試試呢款粗關廟麵,爽滑彈牙。


麻辣肉燥拌麵($43)

麻辣醬係自家炒製, 完全無味精無添加,用家鄉手法以及加上新鮮蝦皮炒成。味道又香又麻不太辣,而且仲唔油膩添~


家傳鹹酥飯便當($59)

平時去台灣食鹽酥雞就食得多,有無食過用豬肉造嘅呢?因為Polly唔食雞嘅關係,佢媽媽就特意為佢用豬肉造出呢款鹽酥肉!鹽酥肉用松板豬肉製作,外皮酥脆,肉質軟腍。而肉燥 採用台灣冠軍米台梗九號,米香特別濃,肉燥亦用加拿大自然豬肉碎,加上醬油燉煮5小時,不肥不膩,帶陣陣五香味。


芝士玉鬆蛋餅($42)

即叫即做,肉鬆由台灣進口,蛋餅混合咗兩種雞蛋,蛋味香濃惹味,係滿滿嘅台灣味。


台式炸大腸($39)

呢味可以話係功夫菜啊~將原條豬大腸滷6-8小時,滷完後再炸,外皮脆口外仍保持內裡軟腍。


醬油蕃薯葉($32)、黃金泡菜($29)

蕃薯葉香港就少啲機會有得食啦,係台灣人常食嘅菜,上面嘅油蔥用豬油炸過,好香口。黃金泡菜加入紅蘿蔔蓉、蒜、醋、糖及辣椒醃製,係開胃之選。


綜合芋圓嫩仙草($38)

又點可以唔食甜品,講到台灣甜品芋圓都可以話佔一席位。芋圓煙煙韌韌,真係可以一解思鄉之情啊~


阿木台灣麵   

地址: 旺角廣華街8號地舖





文、相、片: Yanica


關鍵字
旺角
台灣菜
家庭味
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13
迎接全新2020 1-2月下午茶推介
2020-01-06