迎接初夏，當然唔少得一杯解渴飲品啦。尖沙咀呢間新店主打唔同茶飲， 不過唔係台式珍珠奶茶，而係港式普洱茶！原來係香港百年茶葉品牌嘅新Line，茶底全部都有品質保證。加上有氮氣、鮮果茶、奶蓋大理石等選擇，總有一杯係你嘅Cup of tea！
iTEA由英記茶莊第五代傳人主理，主打近年大熱嘅手搖茶飲，特別在所有茶底都由擁有超過130年歷史嘅英記茶莊團隊開發，以品牌最出名嘅普洱為主，配搭唔同材料同沖調方法炮製出新派茶飲。
氮氣泡泡雲南純普洱（$30）
純茶都可以變出新鮮感！杯底係梳打水同糖漿，上面嘅普洱茶亦特別打入特定比例嘅氮氣，有搶眼嘅分層漸變賣相之餘，獨特嘅氣泡口感亦令呢杯普洱茶更Refreshing。打卡後建議搞勻先飲，飲落先有淡淡甜味，之後係普洱嘅茶香，回甘生津。味道香醇，口感順喉幼滑。
茶啡紅豆冰（$34）
茶啡紅豆冰顧名思義就有齊普洱茶、意大利Arabica咖啡同紅豆，上面再加一層奶泡，可以話係Fusion版嘅鴛鴦。飲落咖啡香同普洱茶香都突出而平衡，比起茶餐廳鴛鴦少一分奶香但多一分餘韻。特別鍾意普洱茶或者咖啡香，亦可以要求多茶或者多啡。紅豆保留粒粒口感，咬落軟棉香甜。所以建議點半糖就得，而且最好喺20分鐘之內享用完。
鳳梨奶蓋大理石（$47）（棉棉奶蓋+$5）
打卡另一推介係奶蓋大理石系列，即係鮮果香片沙冰加上奶蓋，因為沙冰天然紋路同大理石相似因而得名。鳳梨係坊間比較少見嘅口味，飲落有菠蘿果肉一絲絲口感，味道清甜。奶蓋本身就用明治牛奶同芝士調製，想再特別啲可以好似開飯仔咁揀棉棉奶蓋，即係棉花糖奶蓋，更甜更厚身！
更多【新店直擊】： |
鮮果香片（$45）
超足料鮮果茶！店家每日從果欄購買新鮮時令水果，好似開飯仔今次採訪就有青提、西柚、西瓜、菠蘿、士多啤梨、奇異果，同青檸，多到當生果杯都得。香片茶湯清澈，味道清新帶少少青檸酸香，夠晒開胃。而且佢地用嘅係由天然甘蔗轉換嘅糖漿，同阿爾卑斯山泉水釀製嘅法國天然風味糖漿，飲多幾次都唔會有罪惡感啦。
純品冷泡系列（$32-38/支）
最啱畀品嚐茶葉或者咖啡原味嘅朋友，系列包括雲南純普洱、極品鐵觀音、特級壽眉王、石地香六安、雨前龍井，同有機咖啡。全部用經過濾嘅氫水冷泡至少八小時，冰凍清爽。
愛茶之人更可以喺度買到英記茶葉，最後提提大家4月23號新店正式開張當日，所有飲品都有買一送一優惠！想試下港式新派茶飲滋味嘅話記得把握機會。
iTEA 愛茶
地址：尖沙咀金馬倫道21號地下D舖
文、相、片：Cathy