鰂魚涌最近新開咗間泡芙小店，由90後前空姐千慧開設。千慧一直都想開一間屬於自己嘅甜品店，由當初網上自學，一邊做空姐一邊喺網上IG SHOP賣泡芙，意想唔到反應唔錯，到而家佢終於開咗一間實體店啦！
店內嘅泡芙唔係普通泡芙咁簡單，主打脆皮泡芙，內餡仲有麻糬添㗎，千慧話因為自己鍾意食麻糬，所以嘗試吓加麻糬入泡芙，估唔到又幾夾。泡芙全部都選用日本麵粉，質素會較高。
小山園抹茶麻糬
小山園抹茶麻糬嘅餡料加入小山園抹茶粉麻糬同抹茶奶油，甘苦味會重啲，唔會淨係得個甜字，抹茶愛好者必試。
髒髒朱古力麻糬
呢款泡芙可以話啖啖都係朱古力，無論係泡芙脆皮定奶油，連切開個泡芙都見到朱古力嘅蹤影，再灑上朱古力粉，朱古力控又點可以錯過，而且係比利時朱古力嚟㗎～
特濃焙茶香烤麻糬
選用日本焙茶，味道有烘焙感，比起抹茶無咁重甘味。呢款嘅麻糬係經過火焰，再加上煉奶同黑芝麻，味道同口感都豐富咗。
小倉紅豆麻糬
特別用咗小倉紅豆，紅豆味道特別香，而且仲食到一粒粒嘅感覺，幾有咬口。而且麻糬都係店主自製，重糯米味香之餘煙韌感都恰到好處。
海鹽焦糖咖啡
用咗咖啡粉製作，咖啡味特別香濃，而且焦糖醬都係自己煮，味道甜中帶苦。
不過店鋪暫時都只係接受預訂訂單，預計四月中就可以現場walk-in買㗎啦，甜品控記得要去試下佢！
地址: 鰂魚涌英皇道901號英麗閣地下D1號舖
文: Yanica
相、片: Tom Li