生啤外賣唔該！買啤酒返屋企飲唔一定只係買罐裝或支裝，生啤都一樣得！尖沙咀新開嘅Tipsy Tap手工啤酒店，特別由俄羅斯引入真空啤酒機，20款啤酒可以入樽買走，兩三日內仍然新鮮，屋企都飲到新鮮生啤係爽嘅！
Tipsy Tap由幾位啤酒迷開設，專入一啲beer geek鍾意嘅冷門貨色，最特別係全港暫時唯一真空啤酒機，有二十個啤酒頭，供應來自全球英美、比利時、澳洲及本地手工啤，而且由小麥啤、黑啤、酸啤等唔同種類都有齊。
啤酒機可以打入二氧化碳，而且令膠樽維持真空狀態，保持啤酒新鮮度。入蓋後就可以連保溫袋拎走，保質期大約二至三日，打開仲會有汽！而且價錢同堂飲一樣，冇特別加價。
二十款啤酒只會入少量，每星期不時轉款，採訪當日入咗最近幾紅嘅E.T. Brewery，亦有好適合夏天飲嘅酸啤。來自美國Deschutes出品嘅Black Raspberry and Summer Hours ($95)，果味香甜清爽。本地品牌有鬼佬、HEROES、Love Craft等，鬼佬Guava IPA ($78)飲落有番石榴香氣，比一般IPA苦味輕盈，入門級酒鬼可以試試。
英國Siren Broken Dream黑啤 ($92)，係屬於Breakfast Stout類型，穀物味重帶甜味，但飲落一啲都唔heavy，真係適合早餐飲！
更多新店直擊： |
生啤以外亦有20幾款樽裝啤酒，好似有來自德國嘅黑松露啤酒Zoller Hof Perigator Truffle Beer ($288)，熟成50週，松露香氣突出。仲有紅酒味啤酒、自然發酵酸啤等選擇。
酒吧亦有小食送酒，必吃芝士蟹肉釀蘑菇 ($48)，芝士醬汁夠濃，蘑菇又juicy。Tipsy雞翼 ($68)用南乳調味再炸，配上腐乳芝士汁，好香口。
炸魚薯條 ($78) 加入新鮮啤酒漿炸，更選用上Ling Fish鱈魚製成，肉質嫩滑又唔易散。份量十足，炸物送啤酒最夾。各位啤酒迷又多一個聚腳點喇！
地址：尖沙咀柯士甸路5號地舖
文、相、片：Perrins