九龍灣呢間日式釜飯餐廳開咗兩個月，晚市依然大排長龍，背後秘訣原來係有自家養殖場供應近兩斤重厚肉鰻魚，加上用特製蒸鍋煮日本越光米，仲可以轉成茶漬飯！唔好以為用料靚就貴，足料牛肉釜飯都係街坊價$58，抵食！
 

釜之魂釜飯專門店位於九龍灣，佔地近二千呎，裝修以簡約和風為主。一入門口就見到半開放式廚房，畀客人睇到特製蒸鍋煮飯嘅過程。蒸鍋為真空加熱，加上球形鍋底令飯粒受熱均勻。而煮飯嘅高湯更加用咗北海道羅臼昆布、鹿兒島鰹節等熬成，帶淡淡鮮味。
 

餐廳更自設鰻魚養殖場，每條鰻魚近兩斤重，保證夠哂大件厚肉。再用低油煙嘅烤爐燒製。
 

金魂（$118）+ 茶漬飯（+$18）

招牌鰻魚飯有好幾款選擇，而金魂就係用鰻魚中間最寬最厚嘅部分，鰻魚控必點！燒汁更加入鰻魚骨熬製，令燒汁甜得嚟又有鮮味。鰻魚食落香口得嚟魚肉相當結實嫩滑，魚皮帶脆，係爭咗少少油香。不過配料非常豐富，包括酥炸鰻魚骨，整體嚟講相當抵食。
 

呢度嘅釜飯仲有兩食：加錢可以變成茶漬飯！方法係食到差唔多嘅時候，倒入鰹魚高湯然後冚木蓋，焗兩分鐘再搭配自己鍾意嘅配料，得咗。帶焦香嘅飯焦同清甜嘅高湯非常夾，覺得唔夠味嘅話加少少飯素同紫菜就已經夠哂鮮味。另外仲可以免費添加鰻魚汁，絕對唔怕寡！
 

汁燒牛肉釜（$58）

牛肉係美國牛柳，切成粒再燒至半熟，食落肉味唔錯而且保留到肉汁。略嫌有少少筋，不過$58一碗，午市同下午茶仲係$48包埋前菜、湯同飲品，點計都係平！
 

餐廳選用日本愛知縣嘅越光米，特點係飽滿而口感粘糯。的確一睇就發現粒粒分明，飯香突出，咬落帶Q彈口感。如果鍾意食比較硬身嘅飯，大家可以喺開蓋後先用羮打鬆啲飯，散走多餘水汽可以令飯更彈牙更扎實。細心一睇仲加咗薏米，原來因為餐廳會不定期加入唔同食材，好似番薯、紅豆等，增加味道同口感層次。
 

 

五花豚肉釜（$78）

五花豚肉即係豬五花腩位，切成圓形叉燒，肥瘦相間因此食落甘香鬆化，但又唔會太肥膩。醬汁比較濃所以記得要趁熱撈飯食呀。
 

黑炎蕨餅（$48）

甜品同樣有心思，手造蕨餅軟滑得嚟帶少少煙韌，唔會過腍。上面鋪滿黑芝麻，味道香濃甜度適中。唯一要留意嘅係手造蕨餅濕度較高，所以擺得太耐會令黑芝麻變濕，最好盡快享用呀。
 

Strawberry（$48）

餐廳最受歡迎嘅特飲，顧名思義用咗新鮮士多啤梨、雲呢拿、鮮奶同忌廉打成，粉紅色賣相相當吸引之餘仲食到果肉。
 

想食又怕去到要排隊？餐廳門口就有部OpenRice排隊機，只要輸入人數就可以立刻打印排隊飛仔，上面會有QR Code畀你知道實時輪候狀況，咁就放心去行街再返嚟嘆抵食釜飯啦！
 

釜之魂釜飯專門店
地址：九龍灣牛頭角道77號淘大商場三期地下G286-288號舖

文、相、片：Cathy