疫巿難做，無奈結業同暫時停業嘅餐廳愈嚟愈多，不過同時都有唔少新店上場，為靜寂嘅餐飲業帶嚟生氣。淨係元朗區喺呢3個月都有近40間新餐廳開業，其中以下呢5間食物有特色之餘，仲好啱打卡。包括有牛角窩夫堡、熱鬆餅同巴士主題餐廳等。
外賣牛角窩夫堡 Kroffle
圖：外賣小店呢排好馨香，呢間就以牛角窩夫為主打。招牌明星牛角窩夫有5款醬料選擇，包括煉奶、花生醬、朱古力、榛子同焦糖。牛角窩夫口感酥脆，有陣陣牛油香。另外更有以窩夫代替漢堡包嘅牛角窩夫堡，創意十足。無論係龍蝦肉牛油果，定係蒲燒鰻魚等款式都相當足料，值得一試。
日系咖啡店 Find The Way
圖：元朗本身都有唔少café小店，最新呢間開業未夠1個月，木系裝修，只係得10個8個座位，細細間但係感覺幾親切。去到必試楓糖漿鬆餅，大大份，淡淡蛋香，感覺厚實，淋埋唔會過甜嘅楓糖漿，配埋杯咖啡，係會有種滿足感。
巴士主題餐廳 白沙樂都餐廳
圖：巴士迷必訪呀，雖然地理位置係遠咗少少，但有好多巴士泊咗喺餐廳門外可以任影，餐廳嘅櫈仲要張張都係巴士櫈，連安全帶都有，還原度甚高。食物則以茶記menu為主，唔怕肥仔嘅就梗係嗌斑蘭咖吔西多士，牛油煉奶咖吔醬全部齊晒，外脆內軟綿兼有蛋香，非常吸引，要多杯奶茶紅豆刨冰就perfect池。
蒲燒鰻魚鍋飯 Chit Chai Private Studio
圖：呢間café之前開喺錦田，儲落唔少fans，最近搬咗入元朗，交通就更方便。門口位置有榻榻米布置，係全店最搶嘅打卡位。搬新店後，除咗維持舊有menu，亦有新增嘅主食，例如灸燒鮭魚茶漬飯等。不過好多客人都係最回味佢哋嘅蒲燒鰻魚鍋飯，飯粒彈牙、魚肉香滑。同埋佢哋杯杯嘢飲都好靚，好似粉紅月亮牛奶咁，片片花瓣浮面，打卡勁靚，飲落仲有陣陣花香。
型格黑色café The Way Coffee 
圖：小店由3個後生仔主理，全店以黑色為主色調，既有咖啡，亦有一系列輕食供應。House blend咖啡豆嚟自本地咖啡品牌eta.cof，味道平衡，fruity得嚟同時帶有花香，尾段滲有可可果仁香。另外亦有單品朱古力選擇。食物方面推介雲呢拿麻糬牛角包窩夫，口感既香脆又煙韌，夠晒豐富。
文：Kar