就嚟到父親節，又係時候諗吓點樣答謝Daddy一整年嘅辛勞。今次就為大家精選幾間6月份值得一試嘅自助餐，讓你輕輕鬆鬆安排一餐豐富又窩心嘅父親節飯局，齊齊用美食表達心意。

東瀛海洋珍寶遊自助餐 咖啡廳   

如果爸爸係海鮮迷或者鍾意日式料理，就千祈唔好錯過呢個自助餐～主打以日本烹調技藝炮製嘅日式佳餚，每款都好吸引。週末晚市仲有限定即開原條吞拿魚表演、時令生蠔、波士頓龍蝦、刺身壽司同埋各款海鮮冷盤，夠晒鮮味。甜品方面由糕點總廚Sam特別設計一系列和風口味，食完鹹嘢再嚐甜點，簡直係完美句號。父親節期間仲有額外驚喜，每位爸爸晚市會獲贈香煎鵝肝配黑醋一份！

供應日期: 2025年6月14至15日

超人爸爸‧父親節海鮮自助晚餐 8度餐廳    

以多款新鮮冰鎮海鮮作主打，包括即開生蠔、鱈場蟹腳、紐西蘭青口、海蝦同海螺等，款款鮮甜飽滿；刺身壽司區亦同樣吸引，提供即切三文魚、鯛魚、阿根廷紅蝦等～即製專櫃方面唔可以錯過龍蝦湯同香煎鴨肝；熱葷菜式就包括避風塘軟殼蟹、清酒慢煮鮑魚、花膠紅燒肉、免治雞肉棒、清蒸石斑、燒牛肉等，款款滋味又照顧到唔同口味。甜品區都好出色，有招牌燕窩薑汁撞奶、芒果拿破崙、栗子撻、榴槤班戟、芝士餅，仲有Mövenpick雪糕都係無限量供應，父親節當晚每位爸爸仲可以免費享用芝士焗龍蝦半隻𠻹！

供應日期: 2025年6月14日至15日

父親節限定豪華版半自助餐/和牛黑松露自助餐 大廳  

呢間酒店餐廳為父親節準備咗兩場誠意十足嘅盛宴。父親節前夕率先登場嘅豪華版半自助餐，除咗有冰鎮海鮮、自助沙律吧、中式點心任食，仲特別為每位客人送上一客燜鮮鮑魚雜菜炒飯。另可以加配主菜，選擇包括烤焗澳洲羊鞍、燒牛柳或香煎三文魚扒，滿足爸爸們對高質肉食嘅要求。去到正日就以澳洲和牛同黑松露為主題推出自助餐，自助區提供新鮮波士頓龍蝦、鱈場蟹腳、清酒鮑魚、麵包蟹等海鮮。開放式廚房即席製作多款和牛美饌，如和牛串燒、涮涮鍋、即切西冷排，再加埋黑松露烤雞同黑松露意粉，香氣四溢、肉味濃郁，真係會食到停唔到口！甜品方面更加有首次登場嘅松露雪糕配窩夫，甜中帶鹹好特別！

限定豪華版半自助餐｜供應日期: 2025年6月14日
和牛黑松露自助餐｜供應日期: 2025年6月15日

父親節池畔燒烤自助晚餐 濠餐廳    

坐落於寧靜嘅城門河畔，毗鄰酒店泳池，環境優雅悠閒，啱晒一家大細喺節日聚餐嘅時候嚟嘆返餐。重點推介包括每位可免費享用嘅芝士焗龍蝦半隻，仲有即燒龍蝦鉗、扇貝、生蠔、羊扒等，燒得香口惹味～除咗海鮮之外仲包括刺身壽司、冷盤沙律、中式燒味、特色粉麵、經典西式主菜如紅酒燴牛尾、清蒸石斑等；甜品區同樣精彩，唔可以錯過冧酒提子朱古力慕絲蛋糕、柚子抹茶布丁杯、葡撻同Mövenpick雪糕，真係食得開心又滿足。

供應日期: 2025年6月15日

海王盛宴自助晚餐 The Platter   

如果都係偏向中式口味可以考慮呢個海王盛宴自助晚餐～以多款星級海鮮為核心，包括入口即溶嘅忌廉牛油白酒煮波士頓龍蝦、鹹香惹味嘅黃金大蝦、辣酒煮翡翠螺、黑胡椒炒肉蟹同避風塘炒蜆等等，仲有爐端燒專區，鮑魚、扇貝、香腸、雞翼、蔬菜樣樣齊全，夠晒地道。肉類方面有即燒肉眼扒、燒羊鞍等，肉香撲鼻，絕對滿足一家大細唔同口味。甜品方面都有唔少驚喜，朱古力噴泉、窩夫、Häagen-Dazs同Mövenpick雪糕應有盡有，為你嘅海鮮盛宴劃上甜蜜句號。

供應日期: 即日起至2025年7月31日

阿拉斯加蟹宮崎牛自助晚餐 The Market  

鍾意食和牛嘅爸爸一定要試吓呢間人氣酒店自助晚餐，最近豪華升級提供任食和牛！餐廳落重本用上喺日本獲獎無數、被譽為「日本一」嘅A5宮崎和牛，炮製成即燒原件宮崎和牛、炙燒宮崎和牛壽司、黑蒜炒宮崎和牛粒等，油香四溢。自助晚餐另一重頭戲有清蒸加勒比海野生龍蝦、即席鹽燒阿拉斯加蟹腳、火炙慢煮新疆羊肉飯，選擇豐富，一定可以食到回本～海鮮和牛饗宴主題嘅自助午餐、早午餐同樣無限量供應多款海鮮同肉類，包括蒜蓉粉絲蒸扇貝、清蒸蟹腳，仲有滋補嘅花膠菜式𠻹！

供應日期: 即日起至另行通知

文：Yanica、Kylie
編：Cathy