灣仔馬來叻沙專門店 霸氣波士頓龍蝦叻沙
2018-07-19

叻沙都算係幾受歡迎嘅東南亞麵食之一,通常喺新加坡菜、馬來西亞餐廳等都會食到,但專注做叻沙嘅食店就唔多。灣仔最近新開咗間叻沙專門店小叻沙,麵食真係獨沽一味得叻沙,價錢親民,最平$39就有得食!



叻沙有十款可選,配上唔同配料,好似海鮮、豬頸肉、札肉等,而湯底就可以揀傳統馬來叻沙或者咖喱叻沙,又可以自選辣度,麵底就可揀米粉、油麵或者摻摻。主理嘅徐師傅,三十幾年前曾喺香港首間東南亞餐廳香味屋及馬會工作,經驗老到,沿用當年馬拉師傅做法炮製叻沙。



湯底以蝦頭殼、豬骨及魚骨、椰奶、香茅、南薑、辣椒、蒜頭及薑葱等熬三小時以上,全部於工場自家製作,味道濃郁香滑,而且都有少少辣度。咖喱叻沙就加入咖喱汁,帶有微微咖喱香。



配料有索湯嘅豆卜之外,呢度嘅叻沙有一樣好特別嘅配料,係青瓜絲!徐師傅話係馬拉人教嘅秘技,清爽嘅青瓜絲可以減低膩滯感同燥熱,幾特別!



叻沙另一靈魂係叻沙葉,呢度將叻沙葉磨成粉末狀,香氣突出。唔夠辣仲可以加自家炒製嘅參巴醬,味道香辣,令叻沙更加惹味。



最受歡迎係招牌海鮮叻沙,有蝦、魚片、鮮魷同長洲大魚蛋,足料豐富,可惜因為衛生問題冇螄蚶,否則一定會更加鮮味。

招牌海鮮叻沙 $59


最霸氣就要數波士頓龍蝦!龍蝦足有成斤重,開邊扒煎後放上叻沙,肉質結實,連隻龍蝦鉗都好巨型!大大隻食完都已經好飽。另外仲有10吋長虎蝦都好壯觀吓。

波士頓龍蝦叻沙 $138


另一主打馬來肉骨茶,用大量藥材包括當歸、黨參、生熟地等加埋一字排煲成,食到濃濃藥材味但又唔會好甘苦。

秘製馬來肉骨茶 $62


小食都有好多選擇,大蝦多士用原隻大虎蝦,炸得鬆脆唔油。沙嗲以以大量香料醃製,加埋自家製花生醬都好惹味。

星洲大蝦多士 $18


馬來沙嗲小拼盤 $40


雖然世界盃過咗,舖頭以足球為主題,幾有氣氛。喺灣仔食個快餐,食碗叻沙都唔錯。


小叻沙

地址:灣仔莊士敦道35-45號利文樓地下A號舖









關鍵字
灣仔
叻沙
東南亞
馬拉菜
龍蝦
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
Chill嘆週末!黃宗澤蠔吧新推任食生蠔Brunch (有片)
2019-03-06
2月份好評餐廳十強
2019-03-11
【開飯熱店入圍名單巡禮】深水埗平民美食天堂 新派傳統乜都有
2019-03-07
Taste of Hong Kong 美食節 2019 場內美食率先試及活動預告
2019-03-12
【開飯熱店入圍名單巡禮】全城熱捧甜品店 疏乎厘班戟芋圓刨冰爭崩頭
2019-02-25