香港人特別鍾意日本菜，唔同地方嘅美食都有得揀，好似灣仔最近新開一間賣長濱常見嘅鯛魚湯烏冬，師傅亦特別到當地學習過。每日用大量鯛魚骨熬製雪白香濃嘅魚湯，配料仲有唔少海鮮選擇，鍾意魚湯或者海鮮嘅話唔好錯過呀。
 

赤鯛主打濃厚鯛魚湯烏冬，湯底用日本鯛魚骨、鯛魚頭先焗後燒，收乾水分就可以保留魚骨精華，亦令魚湯熬出嚟更奶白。之後會加小磨麻油炒香同壓碎魚骨作為提香，最後加少少白胡椒辟腥，熬煮最少四至五個鐘先完成。魚湯每日鮮熬絕對唔留過夜。
 

龍蝦櫻花蝦鯛魚濃湯烏冬（$135）

長濱近海，所以鯛魚湯烏冬配料多以海鮮為主，店主再考慮到香港人嘅口味，就推出呢款龍蝦櫻花蝦鯛魚濃湯烏冬！鯛魚濃湯鮮甜而毫無魚腥味，聞起嚟仲有淡淡魚香。原隻波士頓龍蝦肉質彈牙，仲有唔少香口嘅蝦膏啊。櫻花蝦亦增加鮮味。
 

吉列廣島蠔鯛魚濃湯烏冬（$92）

吉列廣島蠔另上唔會被魚湯浸腍，金黃色嘅吉列皮口感非常酥脆，咬落多汁又Creamy。而且廣島蠔出名飽滿肉厚，鮮味十足。鯛魚濃湯同拉麵唔太夾，所以餐廳揀咗配口感煙韌彈牙嘅稻庭烏冬，更有咬口。配埋野菜沙律，可以一解油膩感。
 

石鍋帆立貝烏賊三文魚籽鯛魚濃湯泡飯（$118）

鯛魚湯除咗烏冬，仲可以揀石鍋泡飯！飯粒軟硬適中，一粒粒咁同魚湯一齊食都好夾。而且有熱辣辣嘅石鍋保持溫度，食得慢啲都唔怕會變凍。帆立貝大粒厚身，而且裙邊特別煙韌。墨魚鮮味突出，口感彈牙。
 

蒲燒鯛魚腹定食（$98）

蒲燒鰻魚就食得多，原來蒲燒鯛魚都唔錯，特別揀油脂最重嘅魚腹，有油香之餘仲有豐富嘅不飽和脂肪酸！加上特製醬汁後燒成味道香甜嘅蒲燒鯛魚，配搭日本珍珠米煮出嚟粒粒分明嘅白飯，撈埋一齊食好開胃。如果鯛魚肉可以再厚身啲就更好喇。定食配野菜沙律、柚子蓮藕、昆布福袋同鯛魚湯。
 

赤鯛
地址：灣仔灣仔道221A號天樂大廈地舖

文：Cathy
相、片：Tom Li