港九新界都有 親子餐廳介紹2017版
2017-07-10


又到一年一度學生覺得最開心嘅暑假喇,想可以一家人開開心心食餐飯,唔洗全程忙住照顧小朋友?開飯仔之前幫大家搵過10間親子餐廳,今次再介紹多6間,遍佈港島九龍新界,呢個暑假就唔洗再頭痛!
 

新蒲崗海洋主題Play House  白海豚咖啡


圖:karen_c1234

位於新蒲崗大型商場裡面,屬於親子Playhouse加餐廳,有一個大型嘅波波池可以畀小朋友盡情玩!遊樂區都有軟墊,而且亦有唔少玩具選擇。嚟到用餐區餐廳亦貼心地準備咗畀BB用嘅即棄圍巾同BB櫈。餐點以西餐為主,有意粉、Pizza、小食等選擇。不過要留意嘅係收費方面係收取入場費,再送餐廳現金券嘅方式,整體定價偏高。
 

觀塘工廈波波池西餐廳  Unique Café & Kitchen


圖:ram

呢間雖然唔係打正招牌做親子餐廳,但因為餐廳盡頭有個遊戲室,只要先電話訂座,平均每人消費達指定最低金額,就可以畀小朋友入去任玩。遊戲室有波波池同三條滑梯,餐廳亦會限制人數。不過因為用餐區同遊戲室距離比較遠,年紀比較細嘅小朋友建議都由大人陪同。Menu有沙律、肉扒、意粉同飯等,亦有迷你漢堡配水果等嘅兒童餐。
 

西環美國菜Kids Kitchen  Butcher & Baker Cafe


圖:poorcat

各位家長放心,呢度嘅Kids Kitchen唔係指要小朋友親自下廚,而係餐廳特別劃出一角,畀小朋友任食雪糕、曲奇、糖果等。另外有Play Corner畀好動嘅小朋友,兒童餐Menu後面亦有填色遊戲等畀好靜嘅小朋友。家長們可以安坐係梳化中,靜落嚟好好享用餐廳嘅美國菜,包括凱撒沙律、香蒜蜆肉意粉等。亦可以幫小朋友點一份兒童餐,咁就大小朋友都滿足啦。
 

更多【開飯專題】:
1. 私藏心水 Bookmark 3間西環小店
2. 榴槤控出沒注意!6大榴心餐廳推介
3. 宴客飯局啱哂 新派中菜館片皮鴨推介


荃灣小熊主題餐廳  熊小館


圖:Remmah Wong

相信呢度唔單止會令小朋友樂而忘返,隨時連大朋友都唔捨得走,因為呢間西餐廳以熊為主題,擺滿哂大大細細唔同造型嘅熊啤啤公仔,啱哂鐘意影相嘅爸爸媽媽們。而且餐廳空間寬敞,唔單止有個迷你圖書館可以畀小朋友借書睇,仲方便家長擺BB車同BB櫈。以餐點就以西餐為主,亦有亞洲風情套餐同小熊兒童餐。
 

旺角連鎖餐廳連Playground  意粉 360


圖:LewisNg7551

呢個品牌喺其他地區都有分店,不過就以旺角呢間最就腳,而且設施亦最完善。既有齊BB櫈同小朋友專用餐具,另外仲有個Playground擺咗一啲煮飯仔玩具。不過Playground唔算太大,而且餐廳無消毒洗手液同洗手間,建議家長自備返消毒濕紙巾。食物以西餐為主,亦有日式西餐選擇。有需要點兒童餐嘅話需要提早一日電話預訂。
 

沙田意菜館連遊樂場  Meraviglia Bar e Ristorante


圖:pinocchio 芑芑

如果餐廳裡面嘅Play Corner都滿足唔到家中小朋友嘅好動活潑,咁就要去遠少少,入沙田科學院呢間意大利餐廳喇。因為唔單止戶內用餐區有小型遊樂設施同圖書角之外,連戶外都有彈彈床同滑梯等設施,最啱畀小朋友「放電」!餐廳有個大型Pizza烤爐,可想而知佢地嘅Pizza水準唔錯。不過唔少食家都話店員服務態度麻麻,而且菜式單價偏高,值唔值就見仁見智喇。
 



文:Cathy

關鍵字
親子餐廳
兒童餐
新蒲崗
觀塘
西環
荃灣
旺角
沙田
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
3天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
6天前
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
3天前