時新漢堡飽重返紅磡!二哥:百分百做返以前味道
2018-03-21

烘過嘅芝麻包、手打牛肉漢堡扒、再加秘製沙律醬,你係咪都掛住呢種港式漢堡嘅滋味?經典港式漢堡代表之一時新之前結業嘅時候唔少粉絲同街坊大歎可惜,好消息係二哥決定重出江湖,今日開始試業!價錢係點?有咩嘢食?仲係咪以前嘅味道?即睇開飯仔直擊! 
 

「百分百信心可以做返以前嘅味道」


二哥鍾奇濤

位於黃埔新天地嘅時新漢堡飽由人稱二哥嘅鍾奇濤主理,而另一位大廚亦係八十年代就加入時新快餐店嘅康師父。唔少舊舖夥計亦嚟到新店幫手,所以二哥非常自信咁講佢有百分百嘅信心可以做返以前時新嘅味道。
 


開放式廚房令食客見到製作漢堡過程

問返轉頭,點解要開新店?二哥回答喺紅磡做咗幾十年漢堡包,舊店結業後好多粉絲同朋友都希望佢地可以繼續營業,而太太同仔都支持佢將港式漢堡繼續發揚光大。第一選擇都係黃埔區,幸好黃埔新天地呢度有合適嘅鋪位,所以就決定重新開業。
 

經典港式漢堡配方


新店餐牌一部分

睇一睇新店餐牌,港式漢堡、飯/意粉、小食等都有保留,大部分價錢比舊店貴$2-3。漢堡可以揀牛肉或者豬肉,配料選擇由最基本嘅單層漢堡包,到以前最多後生仔鍾意食嘅雙層漢堡芝士蛋包都應有盡有。
 


創辦人留落嚟嘅理念,後請書法家揮毫,掛喺新店一角

店名背後亦有意義,時新快餐店創辦人鍾冠球(鍾奇濤爸爸)當初開辦時新嘅理念係「時尚風采 與時並進 新鮮新意 薪火相傳」,既要追上時代嘅步伐,亦要求食材新鮮。因此新店依然採用新鮮牛肉,以手打方式製造漢堡扒。
 


漢堡包依舊選用嘉頓出品


秘製沙律醬


單層漢堡包($20)

還原基本步,時新一開始就係靠呢個簡單而抵食嘅漢堡包成名。嘉頓芝麻漢堡包烘過後,夾住即點即煎嘅漢堡扒同秘製沙律醬。漢堡扒厚度適中,咬落依然有肉汁,而且相當鬆化。秘製沙律醬味道酸甜,裡面有一粒粒青瓜等食材。
 


雙層漢堡芝士蛋包($30)

<而後來唔少大學生同街坊推介嘅,係呢個材料疊到相當高嘅雙層漢堡:漢堡包、芝士片、漢堡扒、秘製沙律醬、煎蛋、再加漢堡扒、秘製沙律醬同包,食落更加Juicy。開飯仔唔係忠實粉絲,答唔到大家係咪真係100%以前嘅味道,不過可以肯定嘅係的確係港式漢堡嘅風味。
 

飯類小食繼續有


炸薯條($20)


炸雞髀($25)

另一個港式快餐Icon就係波浪紋薯條同大大隻炸雞髀!新店當然亦會繼續供應,炸到金黃香脆,係明知熱氣但都會忍唔住食哂嘅Comfort Food。另外仲有炸雙腸($15)、炸吉列豬扒($20)、炸吉列魚扒($20)等選擇。
 


漢堡扒雙腸飯($55)(送咖啡/奶茶,罐裝汽水+$5)

新店亦非常重視粉絲意見,因此新加咗部分老主顧希望再次回味嘅漢堡扒雙腸飯!同其他飯或意粉一樣,可以選擇加黑椒汁、咖喱汁或茄汁。
 

新產品登場


鹹檸七($23)

新店亦有幾款新嘢食,包括兒童餐($35)、香蒜豉汁排骨飯($50)、秘製紅燒肉飯($50)同鹹檸七($23)。增加新產品一方面係為咗餐牌選擇更多元化,另一方面亦係為咗迎合附近街坊同上班族嘅需要。
 


秘製紅燒肉飯($50)

好似兩款碟頭飯就係希望大家午飯時間多兩個飽肚之選,而兒童餐就係方便粉絲或者街坊帶埋小朋友嚟食港式漢堡。睇得出二哥同一班夥計都非常樂意聽大家意見然後改進,即日起至星期五(3月23日)係試業階段,預計每日賣200-300個漢堡包,售完即止。大家有任何意見嘅話不妨多啲向佢地反映!
 





 

更多【飲食潮流】:
1. 西灣河太安樓吞拿魚專門店 抵食拖羅海鮮丼
2. 復古情書主題+花香心形廂座 中環新開浪漫酒吧餐廳
3. 旺角新開!日本浮誇宮崎A4和牛鍋



時新漢堡飽
紅磡德康街398-402號黃埔新天地家居庭地下G22-G23號舖
*即日起至3月23日 15:00-20:30為試業階段,漢堡包先到先得售完即止,3月24日8:30正式開張




文、相、片:Cathy

關鍵字
時新
漢堡包
港式漢堡
紅磡
黃埔
炸薯條
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!送上門懶人煮食包及套餐大合集2.0 花膠燉湯/火鍋/鐵板燒
1天前
全城抗炎!北角酒店最新應變 自助餐都有得外賣?
2020-07-17
好人好店! 餐廳全日禁堂食 民間自發開放午膳空間地點一覽
2020-07-29