旺角新開麵店 嘆M7和牛撈手工魚麵(有片)
2018-03-01

打邊爐嘅唧唧魚麵就食得多,平時想搵間食魚麵嘅麵店真係無乜選擇。旺角最近就開咗間手工魚麵專門店,魚麵每日製造,而且將魚麵配搭唔同中西日式配料,新鮮感滿分!
 


(左)雪白魚麵、(左)手工魚麵

麵麵主打兩款魚麵,都係由工場每日新鮮製造。雪白魚麵比較幼身,含70%魚肉,食落口感比較脆身。而手工魚麵含50%魚肉,口感比較軟腍煙韌。兩款魚麵嘅魚味都頗為突出,天然唔添加任何味精或防腐劑。
 

三款魚麵推介



手工拌麵料理 - 燒M7澳洲和牛($108)

燒澳洲和牛特別選用後腿肉,脂肪比較少但又保留和牛獨特油香味道同肉汁。而手工魚麵撈埋麻醬夠哂香口,值得一讃嘅係麻醬濃稠度同分量都啱啱好,魚麵掛到汁食完又唔會覺得太膩。
 



魚湯料理 - 西班牙煙燻黑毛豬($99)

而湯麵可以任揀雪白魚麵或手工魚麵,今次開飯仔揀咗雪白魚麵,配以用三種魚加上蔬菜熬製嘅清甜魚湯,魚味更濃郁。而黑毛豬選用放牧伊比利亞黑毛豬嘅五花腩部分,脂肪同瘦肉相間,煎過後逼出油脂,食落滿嘴甘香而唔覺油膩,加上蘋果木煙燻香味道令人難忘。
 


魚湯料理 - Go Green($70)

想再食得清爽啲,可以考慮呢碗多菜版本嘅Go Green。配料有紫椰菜、冬菇、魚皮餃、南瓜、豆腐等,配魚湯更可以突出食材本身嘅原味。


每款魚麵料理都會配梅漬車厘茄同味釀腐竹兩款前菜、四季茶同自家魚香辣椒醬。特別推介大家可以一試魚香辣椒醬,秘製配方裡面有魚乾,食落其實唔太辣,但可以帶起香味。
 

食埋小食甜品



Nachos On The Boat($75)

而餐廳創新嘅身法唔單止係魚麵嘅配搭,小食亦見心思!Nachos On The Boat其實以墨西哥嘅小食Nachos為藍本,但就將粟米脆片改成以炸魚皮做主角,淋上肉醬、Mozzarella同車打芝士碎後加熱,最後加上牛油果醬。惹味肉醬加鹹香芝士同酥脆嘅魚皮一樣咁夾,覺得有少少膩嘅時候可以點埋Creamy嘅牛油果醬。
 



京都之戀($68)

而甜品都唔馬虎,窩夫配抹茶雪糕、忌廉同水果粒整體非常清新。當中抹茶雪糕同抹茶粉都係選用日本宇治品牌,回甘十足非常討喜。唯一要扣分嘅係窩夫唔夠脆身。
 


水果紅茶(熱)($48)


手工柚子梳打(凍)($52)

而飲品亦有多款選擇,水果紅茶裡面有熱氣果、士多啤梨、藍莓、青檸等新鮮水果粒,飲落甜味自然,紅茶餘韻悠長。而手工柚子梳打都有唔少柚子醬,配以梳打Sparkling口感,感覺清新。
 


餐廳裝修以木色為主,用黃色同藍色點綴。中間嘅鐵架係模仿魚船,配合返香港漁港同魚麵嘅主題。大玻璃窗加上舒服嘅梳化座位又有啲似Cafe,感覺新穎舒適。下次喺旺角諗唔到食咩嘅時候,不妨嚟試下呢度嘅魚麵呀。
 



 

更多【新店直擊】:
1. 火鍋新風潮!香港首間熊仔頭造型湯底 近百款海鮮任食連刺身
2. 飲IG大熱Avolatte!灣仔新開咖啡果汁店
3. 等到了!新加坡人氣鹹蛋魚皮、薯片 登陸尖沙咀開POP UP店!



麵麵
旺角彌敦道726號1樓




文、相、片:Cathy

關鍵字
旺角
魚麵
手工魚麵
Nachos
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-04-01
【隨時更新】零食速報 每周新款零食、酒品點評
5天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
5天前