湯底係一碗拉麵嘅靈魂，旺角一間新開嘅拉麵店，就用上成50斤嘅豬骨，熬製大約只係夠分80-90碗拉麵嘅豚骨湯底，咁重本，難怪煉出嚟都係「精氣神」靈魂——無論係豚骨湯底、定係坊間少見而又超受歡迎嘅蟹膏、海老湯底，味道都相當濃香。

 海老湯底拉麵

主力同大家介紹下兩款人氣拉麵，有大量櫻花蝦兼一隻虎蝦放面嘅海老湯底拉麵，單係賣相已經好吸引。湯底以熬足7、8個鐘嘅豚骨湯底做基礎，再加入以日本甜蝦頭精煉出嚟嘅蝦油、蝦膏等，製作出橙紅色嘅海老湯底，加上掛湯力高嘅麵條，每啖帶有鮮甜嘅蝦味。

 蟹膏湯底拉麵

另一款則係蟹膏湯底拉麵，唔淨止湯底混入日本來貨嘅蟹膏製作，就連上枱前都會嗶多匙蟹膏放喺蟹柳絲上，相當足料。離遠都聞到蟹膏獨有嘅香味，入口更係啖啖甘香鹹鮮，食過絕對會返尋味。另外值得一讚嘅係，湯底雖然味道濃郁，但食完又唔會覺過鹹或者口渴，控制得剛好。

 魚介湯底用上幾種魚仔同魚粉煉製，魚香層次豐富。

 厚燒叉燒

麵條有兩款選擇，一款係掛湯力強啲嘅博多白身幼麵，另一款則係滑身啲嘅東京黃身麵。叉燒同樣都有兩款選擇，一款薄身啲，以慢煮方法處理；一款則有成2cm咁厚，以秘製醬汁慢煮8個鐘再用火槍輕燒，迫出油分。雖則係就係肥咗少少，但啖啖肉好有口感。

樸一拉麵
地址: 旺角通菜街1A-1L號威達商業大廈地下H號舖

文、相、片：Kar