新加坡米芝蓮海南雞飯 進駐九龍新增足料奶蓋、養生茶
2018-11-05

各位食雞嘅雞迷,新加坡米芝蓮推介美食嘅海南雞飯店啱啱進駐咗九龍啦,以後唔使過海都有得食。新舖除咗有新菜式之外,仲有新店獨有嘅奶蓋茶同養生茶系列,grab and go都得,附近上班族嘅下午茶同「萬歲」請客有新選擇啦~

同銅鑼灣店一樣,都係一間舖內有齊「天天海南雞飯」、「五十年代」、「老街坊」、「超好面」四個品牌嘅出品。招牌海南雞飯當然繼續有啦,配上濃稠黑醬油、自製辣椒醬、薑蓉醬,雞滑飯香,飯粒中仲滲出淡淡薑香。

不過,開新舖點可以冇新嘢?嚟緊介紹嘅呢兩鹹兩甜菜式,會同時喺兩間店推出。開胃小食酒糟 四寶好鬼香,一上菜就有陣陣花雕酒香飄入鼻。四寶分別係雞肝、雞腎、無骨雞翼同無骨雞腳,酒香肉爽。

新加坡出名肉骨茶,而新菜和牛骨茶就係肉骨茶嘅升lvl版啦。以日本和牛肉、牛肋骨、牛筒骨加多種藥材等熬足4個鐘,湯底嘅牛肉味相當濃郁,比起平時嘅肉骨茶肉香更重,牛魔王要試。

對於香港人嚟講,食完飯食甜品是常識吧。呢度都有自己嘅特色甜品,分別係咖椰鍋餅同榴槤炸湯圓。前者嘅班戟皮煎得香脆,內餡夾住嘅甜甜der咖椰醬;至於後者,榴槤控絕對會愛上。呢粒炸波波,中間嘅餡係D24榴槤蓉啊,連埋混入斑蘭汁搓成嘅皮一齊食,清香而不膩,好想食完一粒再一粒。

如果有去過銅鑼灣店嘅朋友就應該知道,嗰邊嘅飲品主要以cocktail為主打,而呢邊,就係近期大熱嘅鮮果茶、奶蓋同養生系列。每杯都落足料㗎,鮮果茶以鮮果肉製作,而養生系列好似木瓜綠茶咁,仲真係有幾嚿木瓜同雪耳喺入面,可以拮埋嚟食。呢排天氣開始乾燥,要滋潤下啦。

至於奶蓋,用嘅係北海道牛奶,奶味自然濃香,而且最後灑上岩鹽,令到芝士鹹香更突出。芝芝果果呢杯,相信會係好多女士嘅飛佛,一嚟健康二嚟香甜,口感creamy。

仲有呢支純米酒,天天sake,好清爽,完全唔似平時啲sake咁辛辣,就算係女生都唔會抗拒。細細支一餐實飲得晒。當然,如果你係好酒之人,就揀大size嘅先滿足到你哋啦。

天天海南雞飯
地址:尖沙咀柯士甸道西1號圓方1樓1050A號舖

文、相、片:Kar

關鍵字
九龍
新加坡菜
海南雞飯
sake
榴槤
奶蓋
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
7天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
本地搵食有著數!OpenRice x 旅發局 合推 5折餐飲券+餐飲禮遇
2020-09-21
悠閒早晨 3間英、澳、日Brunch推介
2020-09-21
滋味到家!新鮮海野海鮮+逾200款蔬果肉類 食材直送上門網站推介2.0
2020-10-08