提起越南菜就只諗到牛肉粉或者越式三文治？其實越南菜仲有好多唔同選擇，大廚Que Vinh Dang新店就以創新手法演繹越南南部同北部多種美食，從烹調方法、食材配搭到賣相都有新鮮感，但味道就係100%越南風味。
 

Nhậu位於上環弓弦巷弓巷尾，頗有自成一隅既感覺，餐廳大廚兼老闆Que Vinh Dang喺越南北部出世，移居紐約後曾受法式Fine Dining培訓，千禧年代嚟到香港先後開過一位難求嘅私房菜館TBLS同位於灣仔嘅Quest by Que（均已結業）。
 

之前兩間餐廳都提供Fusion菜式，今次新店就主打當代越南菜，唔少菜式靈感都嚟自越南經典街頭美食。大廚Que亦表示雖然用上摩登手法，但風味唔會為遷就香港人口味而更改，反而希望將更多越南菜面貌，加上佢嘅見解帶嚟香港。
 

Hamachi Bowl – Rice Noodle Salad, 40n Fish Sauce & Crispy Turmeric Batter（$180）

越南常以薑黃、刁草搭配炸或煎過嘅鯰魚，大廚Que就改用油甘魚，用薑黃醃製，刁草就放到米線當中，最後加上薑黃脆粒，變成賣相截然不同嘅菜式。魚露亦特別用上40度，代表初榨、濃度較高嘅用作提鮮。整體味道清新，米線口感煙韌，亦更突出油甘魚嘅嫩滑。
 

Banh Mi Rice Tacos（$120）

雖然取名Tacos，但無加入墨西哥元素，只係形容Bite Size方便大家Share嚟食。將經典越式三文治Banh Mi改為米餅形式，配搭各種香草、自家製酸菜，同黑毛豬腩肉。米餅比坊間嘅較為硬身，豬腩肉夠Juicy，加埋酸菜惹味而唔油膩。另有Impossible Meat植物肉版本方便素食人士。
 

Bo La Lot Tartare with Crispy Beef Tendon（$150）

心機菜式之一，Bo La Lot係越南小食檳榔葉烤肉，傳統做法係以檳榔葉包用咖哩調味嘅肉再燒。新版本就用澳洲和牛做成他他，再拌入檳榔葉蓉、咖哩蛋黃醬同自家製牛肉鬆。唔好以為碟上白色嘅係普通米餅，其實係100%牛筋！先炆好再雪藏，切成薄片後再脫水，最後先可以炸成牛筋脆片，配搭他他無論口感定口感層次都非常豐富。
 

 

Roasted Cauliflower with Caramelised Pork Koh Quet（$140）

越南人一般將椰菜花白烚再加豬腩肉煮嘅醬汁，大廚就先將椰菜花烤過增添香味，搭配用黑毛豬腩肉製作嘅醬汁、黑毛豬腩肉粒、自家製豬肉鬆，最後以黑椒調味。食起嚟以黑椒嘅辣味同豬腩肉嘅肉香為主，令椰菜花變得非常惹味。
 

Slow Cooked Pork Belly Banh Xeo with Peanut, Bean Sprout and Cabbage Salad（$160）

以街頭小食越南煎餅Banh Xeo為靈感，但大廚將主角改為豬腩肉，慢煮過夜後加上魚露烤香，再搭配芽菜、花生、酸菜等，肥瘦相間既豬腩肉鬆化富脂香，加上香料後香氣同味道都非常豐富。傳統比較腍身嘅薄米餅亦改為香脆版本，可以將材料放上米餅，調轉將米餅啪碎作為配料亦無妨。
 

Coffee Ice Cream with Coffee Sponge Cake & Condensed Milk（$140）

同樣出名嘅越南咖啡就搖身一變成為甜品，雪糕混入越南咖啡粉同可可粉，海綿蛋糕亦加咗越南濃縮咖啡，係以完全唔同嘅口感演繹越南咖啡嘅香濃。再配搭煉奶同花生糖碎，增加口感。

店名Nhậu係越南文，有「一齊」嘅意思，以飲食文化嚟講亦可以解讀為類似香港人嘅宵夜、或者日本人放工後去居酒屋，三五知己相聚飲幾杯酒再分享美食，所以唔難留意到呢度嘅菜式都以方便Share食為主。不過點解搵極個Menu都無Pho？原來大廚Que話佢唔想大家集中喺Pho上，正等於香港美食亦唔止雲吞麵一樣。

餐廳裝修亦有特色，好似嚟自胡志明市嘅手繪瓷磚同人手製作牆磚，將越南人用嘅竹編菜罩掛喺牆上等等。黃色主調亦相當有活力，配合返呢間揉合越南傳統味道同創新餐飲體驗嘅餐廳風格。
 

Nhậu
地址：中環弓弦巷12號地下

文、相、片：Cathy