掃街食迷你小籠包!天后Fusion立食小食店新品(有片)
2018-03-20

小籠包已經夠小巧精緻,居然仲有小食店將佢變成迷你版本?原來天后呢間小食店老闆係上海人,想將呢款上海民間小食變成香港掃街小食,一啖一粒唔怕啲湯汁周圍飛。其他小食仲有富街頭風味嘅串燒、美國加州代表Corn Dog等等,新鮮感滿分。
 

迷你版上海小籠包


原味生煎Baby($30)

Take Me Out最近推出多款生煎Baby,即係迷你版本嘅小籠包,每粒直徑約一吋,用特製機器每日新鮮包好再即叫即炸。用油炸代替蒸或煎係因為想保持小籠包多汁皮薄嘅特色,炸過嘅外層較為結實,可以鎖住肉汁。
 

雖然用油炸過,但食落唔會覺得有油膩感,一啖咬落亦有熱辣辣肉汁噴出嚟,大家記得小心!肉餡肥瘦比例適中,而且上面加咗芝士粉同芝麻增添香味,可以一試。
 


重慶拌小籠($30)

不過如果你食得辣嘅話,開飯仔會更推介呢份重慶拌小籠!辣味小籠包加入紅肉火龍果染成天然粉紅色,所以見到上面嘅黑色籽完全唔洗擔心。同樣即叫即炸後再加上秘製醬油、辣醬同青瓜,賣相吸引。
 


雖然叫重慶拌小籠,但味道其實並無想象中咁辣,無完全蓋過豬肉嘅鮮甜。而且有清新嘅青瓜撈埋一齊食,對比令迷你小籠包同辣醬嘅味道更突出,非常討喜。而且特製機器包嘅速度亦夠快,所以小店會盡量新鮮包製各款迷你小籠包,希望大家食到最新鮮嘅味道。
 

更多中式小食推介


雞中翼($10/串)


羊肉($10/串)

內地嘅小食又點止得小籠包呢?小店仲有香噴噴嘅串燒呀!特別用鋼絲串起唔同肉類同蔬菜,零舍有街頭小食感。原來鋼絲需要處理,燒過一次再加豬油再燒一次等步驟做足先可以去除鐵鏽味,係有心機嘅。而串燒用孜然粉、辣椒粉同唔同香料調味,燒嘅時候真係隔住條馬路都聞到香味呀。
 


雞肉($50/10串)


韮菜($8/串)

香料落得唔算重手,重口味人士可以自己再點辣椒粉。雞肉不過不失,雞中翼皮脆而且仲有肉汁。而羊肉略嫌羶味唔夠突出,不過平時怕羊肉羶味嘅朋友仔就可以一試啦。韮菜、金菇等都燒得夠香口,食食下開飯仔真係有啲想配返杯啤酒飲!
 


上海早餐拍檔(上海羅宋湯+上海炸豬扒)($50/份)

呢度仲有唔少上海特色美食,好似勁多肉炸醬麵($40)同上海羅宋湯($20),上海版本嘅羅宋湯較一般西式更濃稠,配香脆嘅上海炸豬扒($40)唔單止可以當早餐,當下午茶都一樣得啫。
 

香脆美式炸熱狗


傳統Corn Dog($25)

<而美式炸熱狗亦繼續提供,原來因為老闆之前喺美國加州住過,想將當地最出名嘅Corn Dog同Lemonade帶埋嚟香港。炸熱狗選用100%美國玉米粉,而香腸就可以選擇法蘭克福腸或者雞肉腸。而醬汁可以選擇茄汁加黃芥末、蜜糖芥末醬加椰絲,或者自家調製嘅Wasabi醬。
 


青瓜味Lemonade($20)

食咗咁多熱氣嘢,最啱飲返杯檸檬水Refreshing一下。呢度嘅Lemonade有原味、青瓜同椰子三款口味,都會加入鮮榨檸檬汁,酸香醒神。
 




金菇($8/串)


冬菇($8/串)


小餛飩(15粒)($20)


 

更多【飲食潮流】:
1. Little Twin Stars星之甜品第二彈 必影夢幻雲朵芭菲
2. 一家大細埋嚟睇!六大精選復活節親子自助餐
3. Taste of Hong Kong 三月尾開鑼 率先巡禮 必試澳洲士多啤梨西瓜蛋糕



Take Me Out
天后電器道83號地下




文、相、片:Cathy

關鍵字
天后
小食
迷你小籠包
生煎Baby
串燒
Corn Dog
炸熱狗
Lemonade
檸檬水
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
2天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18