就到夏天，有時行街行得耐，都會想買杯嘢嚟解下渴、消下暑，或者，純粹過下口癮。除咗細細個就飲大嘅幾間台式飲品店之外，近幾年都開咗唔少特色嘅果汁店或者特飲店，下次路過都可以試下呀。
新鮮水果茶 溪羽之茶
圖：首先介紹下最多人行街街嘅地方，即係旺角呀。掃街小食一街都係，食完係要搵返啲嘢飲。呢間新開咗一排，主打新鮮水果茶，啲嘢飲名都幾得意，好似提子汁咁就叫「葡萄成熟時」，飲落仲飲到埋提子皮同提子肉添，夠晒真材實料。另外仲有芝士奶蓋，鍾意嘅試下知心莓妹，係士多啤梨沙冰加芝士奶蓋，漸變粉紅色超吸睛，有士多啤梨果肉食到呀又，芝士味同奶味亦都香香der，夾得幾好。
車仔果汁 Green Truck
圖：呢間喺石硤尾嘅果汁店，個名有啲玩味，賣嘅方式都係。好似車仔麵咁，不過佢係車仔果汁，客人可以任揀茶底、生果同調味料，自由配搭。茶底有伯爵茶、豆漿、薏米水、瘦瘦花茶之類揀，而生果就有香蕉、蜜瓜、西瓜、奇異果、火龍果等等，配料就係蜂蜜、薄荷葉、生薑、黑糖、雪耳咁，溝出嚟係咩味就睇你點配喇，但果味係鮮甜嘅。
文青smoothie 告白果屋
圖：葵廣有好多檔嘢食同嘢飲，呢檔喺二樓嘅，裝修幾文青下。啲嘢飲主要係生果、乳酪、牛奶嘅配搭，冇加糖齋用生果去打smoothie出嚟。每杯都係即叫即榨，係幾清甜呀。「青出於藍」就係用羽衣甘藍加埋蘋果、菠蘿、牛奶製嘅，而「最美麗的意外」就係紅菜頭、甘筍、蘋果同牛奶，側邊仲有幾片士多啤梨貼喺杯邊係幾靚，不過細細杯都30幾40蚊有好似貴咗少少。
更多【飲食潮流】： |
冷壓果汁 Beauty and Juice
圖：呢間就以冷壓果汁為主嘅，都係行健康路線。一杯有生果、有蔬菜，例如羽衣甘藍加羅馬生菜加西芹加椰菜加西蘭花加青瓜加蘋果同檸檬咁，直頭係菜多過生果，飲落就可能會有少少草青味，不過飲下飲下，就會飲出蘋果嘅甜，感覺都幾fresh呀。
芝士宇冶抺茶 皇茶
圖：芝士控就要試呢間喇，佢哋最出名嘅係皇芝士宇冶抺茶。拎上手明顯見到分咗兩層，底層嘅抹茶味幾香濃，而面層嘅忌廉芝士就鹹鹹香香咁，都幾夾，如果想一啖飲到晒芝士同抹茶，有啲技巧㗎，要打斜少少隻杯，45度咁飲。
韓國鮮打果汁 bexp.
圖：霖迪、Sara_Cheng
嚟自韓國嘅呢間飲品店，果汁嘅選擇都幾多，有成10幾款生果、蔬菜揀，好似韓國黃金梨、蜂蜜、鮮淮山等等。客人可以隨心揀自己鍾意嘅配搭，將揀好嘅「蜂巢」放落個盒度，揀嗰陣仲可以揀埋要有果肉定係淨要純果汁，窩心到呢。喺材料旁邊，更加有標明成分同卡路里添。
綜合水果茶 Cup Of...
圖：餐廳FACEBOOK
最近喺好多嘢食嘅荃灣，又開多咗間飲品店。飲品都有幾多選擇，新鮮生果茶係其中一樣，大大杯，堅足料，仲好甜添。例如蘋果茶用嘅係日本青森縣蘋果，而一杯綜合水果茶就會時令生果去製，呢期就係火龍果、西瓜、芒果、菠蘿、蘋果、士多啤梨等等，可以揀要綠茶、紅茶或者烏龍茶，飲晒啲茶之後仲可以加梅子粉食埋啲生果，清杯！另外都會有椰子奶蓋系列、花茶系列同岩鹽芝士忌廉系列咁。
文：Kar