必食米芝蓮星級茶漬飯、日本水魚煮湯 佐賀主題居酒屋重開(有片)
2019-06-06

銅鑼灣呢間以日本佐賀縣為主題嘅居酒屋,舊年暫時休業後終於重開啦。主題不變但換上全新Menu,以更多佐賀新鮮食材為主題,例如佐賀牛、呼子魷魚等。更搵嚟福岡米芝蓮一星名店料理長駐港,將名物茶漬飯等帶埋過嚟!
 

必點推介


米芝蓮一星店Shiranita秘製  鯛魚嬉野茶漬飯($88)

佐楽今日(6/6)重開,特別請嚟福岡米芝蓮一星京風割烹料理名店西中洲しらに田(Shiranita)料理長冨田耕平先生出任總料理長,呢個鯛魚嬉野茶漬飯係最出名嘅菜式。用佐賀日和米、嬉野茶,配搭自家調配胡麻醬同天然鯛魚。
 


建議先各自試咗胡麻鯛魚同飯嘅原味,胡麻鯛魚芝麻香濃厚、魚肉彈牙滑溜,而佐賀日和米飯粒粒圓潤分明、充滿光澤,口感軟糯富米香。之後將胡麻鯛魚加到白飯上再倒入嬉野茶,甘醇茶香帶有旨味,更可以帶出鯛魚鮮味,鮮上加鮮。
 


日本水魚出汁煮湯($168)

日本人覺得酷熱嘅夏天需要食幫人增強體力、恢復元氣嘅食物,富含膠原蛋白、維他命同氨基酸嘅水魚就係其中一種。餐廳選用日本養殖活水魚,先汆水去皮,再用料理用清酒煮兩個鐘,中間不時要隔走浮面嘅泡泡,先可以令呢份出汁清澈見底。
 


建議上枱後一滾起就加入蔬菜同麻糬,再滾就趁熱享用。帶水魚鮮味嘅蔬菜當然好味,湯頭亦醇香鮮甜,不過煮得太耐就會變鹹,最好都係食快少少啦。
 


佐楽名物 熟成免治三瀨雞肉串($48)

佐賀除咗佐賀牛,同樣著名嘅有三瀨雞,以法國地雞混種培育而成,用生米糠同大麥餵飼,脂肪少而富彈性。免治雞肉本身已經有醬汁調味,再伴以生蛋黃增添濕潤口感同味道層次,香味十足!
 


數量限定 佐賀湧水之雫啫喱($28)

用佐賀泉水製作嘅水滴啫喱晶瑩剔透,加上金箔點綴更顯高貴。水滴啫喱本身就無任何味道,需要伴旁邊嘅黃豆粉,再按自己喜好加綠茶醬或者黑糖醬。啫喱口感滑溜彈牙,而黃豆粉亦相當香甜,同綠茶或者黑蜜一樣夾。
 


佐賀地道日本酒(2小時任飲 $248/位,31/8前特價$188/位)

佐賀有純淨水源同優質稻米,自然亦有出產唔少日本清酒。重開優惠價$188就可以任飲佐賀地道日本酒、燒酎、果實酒、威士忌等等!呢度展示嘅6款佐賀清酒各有唔同特色,好似聚樂太閣 純米Sparkling就係夏季限定嘅氣泡清酒,微酸清爽適合配搭刺身。幸姬 辛口純米酒就較為辛口,餘韻微甜,配搭牛肉等較為油膩嘅菜式就啱喇。
 

更多【飲食潮流】:
1. 童星點心麵咖啡?! 青衣獨立咖啡店推「童年」主題系列咖啡
2. 荔枝角西餐廳轉賣泰西fusion菜 必食30款調味粉炸薯條+牛油果軟殼蟹米紙卷
3. 【隨時更新】便利店尋寶 每周新品速報

 
其他招牌菜推介


SAGAN VEGE 有機無農藥蔬菜配一之塩沙律($78)

選用佐賀農家溫室直送新鮮野菜、無農藥或化學肥料。簡單以60℃低溫蒸發製作、保留多種微量元素嘅天然海鹽「一之塩」提鮮,充分發揮蔬菜天然甜味。
 


唐津玄海漁協直送魚鮮七款刺身盛合($298)

唐津玄界灘喺佐賀縣嘅西北部,臨近有對馬海流從東海帶嚟豐富海產。餐廳每日挑選時令海鮮再空運到港,特別推薦當中嘅呼子魷魚,特別用零下55℃瞬間冷凍技術,減少鮮味流失,賣相通透、肉質彈牙帶黏、味道鮮甜。
 


吉列特上佐賀牛肩肉($248)

佐賀牛係同松阪牛、神戶牛並列日本三大和牛,脂肪細膩肉質柔嫩。餐廳挑選佐賀黑毛和牛嘅特上牛肩肉,即係雪花分佈最均衡、旨味最濃郁嘅部位以吉列方法炸至約三成熟。保留和牛肉汁,外脆內嫩。
 


炭燒三瀨雞頸肉 配蔥花($78)

豬頸肉就食得多,呢度有少見嘅炭燒雞頸肉,炭燒唔單止燒走多餘油分,更增添陣陣炭火香氣。雞頸肉食落爽口有嚼勁,配蔥花可以再進一步減低油膩感。
 


自家製佐賀酒粕慕絲($28)

用佐賀清酒酒粕、即係釀造清酒是過濾得出嘅白色米漿,製作成慕絲有淡淡酒香,更多嘅係米嘅甜味,非常討好。
 




佐楽
地址:銅鑼灣霎東街15-21號OLIV 12樓




文、相、片:Cathy

關鍵字
銅鑼灣
佐賀
日本菜
茶漬飯
佐賀牛
佐楽
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
2019-11-29
【2019聖誕】早鳥優惠! 聖誕自助餐推介
2019-11-27
高CP值放題推介
2019-11-07
秋風起!5間大閘蟹放題食店集合
2019-11-19
【2019聖誕】年尾叉電 聖誕下午茶集合推介
2019-11-19