尖沙咀新開心機飲品店 試手工小芋圓+即燒日式麻糬(有片)
2018-01-05

最近又吹起「台」風,尖沙咀呢間新開台式飲品店賣點在於每日自家製嘅小芋圓,加上飲品選擇亦夠多,從冷泡茶、奶茶、養生茶、特調鮮乳等。一手拎飲品,另一隻手仲可以拎多支即燒日式麻糬,感覺好似去咗台灣夜市掃街咁!
 

尖沙咀厚福街不嬲都有食街之稱,最近又多咗茶理史呢間飲品店,舖仔細細但心機絕對唔細㗎。唔單止去過台灣取經,選用台灣出產茶葉,連小芋圓都係每日新鮮製造!
 

先將芋頭切粒蒸熱,然後加埋木薯粉,倒入機器搞勻再製成一粒粒新鮮小芋圓。整嘅時候仲會加少少紫薯,令小芋圓有天然紫色,賣相更吸引又唔會搶走芋頭香。
 


草莓鮮乳小芋圓($28)

想食到小芋圓淡淡芋頭甜香嘅話建議配搭牛奶,好似呢杯士多啤梨鮮乳咁,落足新鮮士多啤梨打成果汁造成搶眼漸層效果。小芋圓口感比較硬,食到少少芋頭碎,雖然唔夠滑溜但就保證係真材實料。士多啤梨牛奶味道酸酸甜甜,非常易入口。
 


薄荷可可鮮乳小芋圓($24)

另一漸層推介就係呢杯薄荷朱古力牛奶,入口先有朱古力嘅甜,之後就飲到薄荷香同涼浸浸嘅感覺。不夠略嫌朱古力甜香比較霸道,搶走咗小芋圓嘅芋香。不過呢度同大部分飲品店一樣,可以選擇甜度同冰度嘅。
 


竹炭白玉奶茶($26)

小店除咗小芋圓之外,仲有白玉都係推介配料,咬落比一般黑色珍珠煙韌同軟身。而呢杯黑白漸層奶茶,白色部分係鐵觀音奶茶,黑色係加咗竹炭粉嘅牛奶。竹炭粉本身就無乜味道嘅,所以飲落以青茶嘅清香為主。可以加配嘅配料仲包括雲頂同腐竹!可惜採訪嘅時候小店未準備好腐竹,大家不妨幫開飯仔一試!
 

更多【新店直擊】:
1. 台灣人氣麻辣火鍋登港 麻辣湯底仲可當湯飲(有片)
2. 黃埔掃街新發現 即叫即炸脆口英式Fish & Chips(有片)
3. 中村藤吉金鐘新舖 連甜筒都係茶味(有片)

 


(左至右)京都八重櫻花甜茶、原朵玫瑰冠甜茶、原朵蜜絲大皇菊甜茶($26)

想再清新啲嘅話仲有冷泡茶選擇,包括蘭貴人烏龍($20)同名間金萱茶($24)等,比較特別嘅就要數到有成朵花喺樽裡面嘅呢三款花茶,喺茶嘅甘香裡面再添少少花香,賣相都特別吸引!怕凍嘅話亦可以轉熱飲,或者嗌返杯有紅棗同元肉等養生食材嘅貴妃養生茶($24)。
 

除咗飲品之外,小店仲有幾款茶食,好似梳乎厘班戟($28)同熔岩流心蛋糕($22),不過最特別嘅就係即燒嘅烤麻糬!日式麻糬會先用焗爐焗,再用電爐再燒一陣,期間要不斷壓扁麻糬,因為咁樣先烤得均勻,而且可以令麻糬漲大。見住啲麻糬漲大再壓扁,壓扁完燒一陣又漲大返,其實個過程都幾有治愈感。
 


日式沖繩烤麻糬($15/條)

燒好後可以選擇醬汁口味,包括抹茶、黑糖、可可或者煉乳。開飯仔揀咗後兩者,日式麻糬燒過後外皮非常香脆,略嫌硬咗少少,建議大家要趁熱食。而裡面非常軟糯,同甜甜地嘅醬汁一齊食果然唔錯。留意返燒麻糬製作時間就比較長,不過畀多少少耐心支持有心機嘅小店,係值得嘅。
 




茶理史
尖沙咀厚福街9號豪華閣地下B號舖




文、相、片:Cathy

關鍵字
尖沙咀
厚福街
奶茶
小芋圓
烤麻糬
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2天前
日本過江龍迴轉壽司登陸佐敦 近百款選擇 新開業優惠$12極上拖羅壽司
7天前
3大散水餅推介 Last day派得體面又夠抵
2019-07-25
7月份好評餐廳十強
2019-08-06
【2019中秋】最新人氣話題+送禮靚盒月餅集合
2天前