實現夢想 開一間聯繫社區嘅咖啡館 上水獨立Cafe粉嶺重開(有片)
2019-04-29

一間咖啡館,可以賣咖啡,提供空間畀大家聚會,仲可以變身讀書會、工作坊,連繫客人同農場、街坊同社區,形成一個生活圈。呢間非一般咖啡館就喺粉嶺,由老闆阿沈、同一班一樣有心希望追夢嘅年輕人一齊主理。
 


咖啡館既有適合一個人睇書嘅梳化位、可以欣賞窗外景色嘅高櫈、亦有啱晒一大班人嘅長枱、畀情侶傾計嘅二人枱,可以視為延續舊店「都市綠洲」嘅概念

添飲咖啡館位於今年3月活化重開嘅前粉嶺裁判法院旁邊,同為英國殖民地嘅建築,白色簡約裝修予人休閒舒適嘅感覺。餐廳名亦蘊含背後嘅理念:中文名添飲係希望呢度成為大家聚腳點,會一去再去「添飲」;英文名TEAM Yum嘅Yum代表餐廳重視食物質素,包括食材挑選;而TEAM一方面係呼應附近香港青年協會青年領袖發展中心嘅Team Building活動,亦係代表老闆阿沈同佢嘅年輕人團隊。
 

係咖啡館 亦係連繫社區嘅平台


Rose Latte用法國ECOCERT有機認證天然玫瑰水,加上保加利亞大馬士革有機玫瑰花瓣點綴。咖啡師Sugar係上水舊店熟客之一,後來跟阿沈學沖咖啡成為咖啡師


咖啡館不時舉辦唔同活動,圖為之前舉辦嘅咖啡班及咖啡渣磨砂膏班,活用餐廳嘅咖啡渣同上水街坊花農手作人 DAY DAY SOAP日日梘嘅金盞花油製作天然磨砂膏

如果你係北區人,或者都已經聽過或者見過阿沈,因為上水獨立咖啡店Cafe Je T'aime亦係由佢同太太開設,兩年前上水店結業後一直想喺同區再開。今次搵嚟一班年輕人幫手——當中唔少都係舊店熟客——喺添飲咖啡館實現一齊佢地嘅夢想。
 


Earl Grey Blue特別用虹吸方法沖泡,另一亮點在於加入有心機農場嘅有機薰衣草,令茶聞起嚟有幽幽薰衣草香,令人更容易放鬆

咖啡店會不定期舉辦唔同活動,例如之前開過嘅讀書會、工作坊,將來有機會舉辦音樂會、手作市集等等。令呢度唔單止係一間餐廳,更從生活唔同層面出發,建立一個平台去守護夢想,建立社區關係,形成新嘅生活圈。或者係阿沈嘅堅持、團隊嘅用心感動到身邊嘅人,活動有唔少熱情客人參與,更得到一班義工支持。義工有唔同背景嘅人士,好似社工、老師、甚至作家等,亦係團隊從中互相學習嘅好機會。
 

畀機會大家接觸農場


有心機農場出產嘅有機番茄包括世界各地唔同品種,色彩繽紛而且各有其味道口感,採用本地出品亦可以減低碳排量

由之前Cafe Je T'aime以咖啡同甜品為主,到而家添飲咖啡館新增唔少菜式,唔單止係客人嘅選擇多咗,亦希望畀都市人多一個渠道認識本地農場。香港特別係北區其實仲有唔少農場,同餐廳合作嘅有心機農場就係其中之一。有心機農場係香港其中一個規模較大嘅有機農場,供應蔬菜畀本地酒店,亦係添飲咖啡館合作夥伴。
 


呢道Heirloom Tomato, Burrata Cheese, Pine Nuts, Herb Oil正正用咗有心機農場嘅有機番茄,爽口多汁嘅番茄配蒔蘿籽油同柚子醋,微酸醒胃

佢哋合作係雙向嘅,農場出產嘅食材由咖啡館創作出唔同飲品同菜式,咖啡館之前亦舉辦過農場參觀,帶參加者親身接觸農場,認識餐桌上嘅食物係點得嚟,從而或者都可以思考一下:香港係咪真係唔需要農業?
 

團隊係組合夢想嘅砌圖


添飲咖啡館主廚Hanson,年紀輕輕但已經有20年經驗,喺呢度可以一圓自己開餐廳嘅夢想

之前提到團隊中有唔少都係舊店熟客,好似主廚Hanson五年前就成日同太太去Cafe Je T'aime歎咖啡,知道阿沈想重開餐廳後就義務參與提供意見,之後設計餐牌,而家正式成為添飲咖啡館一分子。Hanson形容「阿沈係一個夢想家,我地成班人都希望幫佢完成一幅砌圖」。餐廳另外兩位咖啡師華華同Sugar亦從舊店認識阿沈,從客人轉為餐廳團隊之一。
 


Beef Flank Steak, Shaved Cauliflower, Walnut Gremolata採用同區餐廳較少見嘅側腹牛扒,油花唔多但肉味濃郁,Hanson考慮到要菜肉平衡因而伴以切片椰菜花

阿沈畀咗好大嘅空間主廚Hanson同佢嘅團隊發揮,Hanson亦希望將佢之前喺唔同餐廳學到嘅嘢帶返嚟北區,所以既有口味較為大眾化嘅法院主題Menu,亦有從Hanson個人想同大家分享嘅角度去設計嘅Main Menu。Hanson覺得同之前喺酒店同會所做廚師相比,喺添飲咖啡館自由度更大,食材選擇亦更多。
 


Slow Cook Pork Belly Roulade, Sautéed Kale, Smoked Apple Purée, Caramelised Pineapple背後烹調工夫繁複,豬腩肉先慢煮約12個鐘,再拆絲然後製成肉捲,配煙燻蘋果泥同焦糖菠蘿一齊食完全無膩感

值得期待嘅係阿沈同佢團隊嘅夢想藍圖唔限於添飲咖啡館,之後有機會嘅話佢哋亦希望喺其他地區開設唔同主題餐廳。希望可以設立更多生活圈,更多人可以親身體驗,留下更多獨一無二嘅回憶,守護同實現更多人嘅夢想。
 




添飲咖啡館
地址:粉嶺馬會道302號地舖




文:Cathy
相:受訪者提供、Calvin Kwok
片:Calvin Kwok

關鍵字
餐廳專訪
粉嶺
開飯餐廳專訪
添飲咖啡館
咖啡
Cafe Je T'aime
開飯餐廳專訪
每間餐廳、小店背後都有一個故事,開飯仔走訪全港餐廳,希望讓大家食到好味道外,也吃到人情味。
餐廳資料
本月熱門
【隨時更新】便利店尋寶 每周新品速報
6天前
糧尾打氣!5間銅鑼灣平價飯堂推介
2019-05-23
銅鑼灣設全港首間日本酒放題 逾100酒款 最平$98可任飲
2019-05-22
Weekend充電!嘆Brunch是為了走更遠的路
2019-05-22
奶蓋千層蛋糕、豐富All Day Breakfast 人氣網店觀塘工廈開Cafe(有片)
2019-05-24