去宜家家居除咗睇傢俬之外，相信大家都好鍾意去餐廳開餐！荃灣嘅朋友有福喇，宜家家居最新分店已經正式開業，位於8咪半商場，地鐵站行十分鐘就到。進佔商場三至七樓，美食站位於3/F出口，7/F全層都係餐廳，有成220個位，但第一日開業已經座無虛席呀。
新店限定鹽味焦糖新地筒喺美食站發售，新口味係獨家發售，只賣到7/11。$3有三大圈，焦糖味唔太甜，但就食唔出鹹味。質感滑有奶香，但就好快溶，唧到落cone底都仲有，幾足料，抵讚。
新推出嘅北歐風汽水有柑橘味冰綠茶、有汽梨味、有汽檸檬、紅果子同有汽紅果子五隻味，甜度減低，$7可以無限refill。最好飲係檸檬汽水，有淡淡檸檬味。
七樓餐廳獨家菜式就有南瓜西米露（$10），好杰身，西米唔算多。食落似南瓜湯，好在唔太甜，南瓜味都幾香濃。開業優惠原價$89嘅全隻烤雞只賣$63，份量十足，兩個人都夠食。略嫌燶咗少少，雞肉本身冇乜味，髀位juicy，但雞胸就鞋少少，加埋醬汁都唔錯，優惠期至10月24日。嚟緊嘅優惠係酥炸豬手，由10月25日開始，密切留意喇！
地址：荃灣青山公路388號8咪半3樓
文、相、片：Perrins