夏天都可食煲仔飯 西日Fusion新口味 荃灣新店創黑松露蟹肉海膽煲仔飯 (有片)
2019-05-29

夏天去食煲仔飯?Come on~ 打邊爐都係一年四季照打啦,夏天食煲仔飯,why not?早年喺將軍澳有間創出抹茶煲仔飯嘅煲仔飯專門店,最近去到荃灣開分店,繼續大玩西日食材fusion,研發咗多種新潮配搭,時下最興嘅黑松露、海膽等等都可以喺煲內搵到!

傳統嘅煲仔飯,通常用炭火烹調再用瓦煲盛載,但呢間專門店嘅師傅就有佢獨特一套嘅睇法。師傅認為炭火烹調一嚟難控制火喉,二嚟飯焦容易變得過硬過黑,影響健康,於是改用電爐同電陶爐,煮出嚟一樣有飯焦,微微脆口。

至於新潮煲仔飯中,最吸睛嗰款應該係黑松露蟹肉海膽煲仔飯。手拆蟹肉舖滿飯面,仲混入黑松露醬,入口就係啖啖鮮香感,仲有唔捨得食嘅朝鮮馬糞海膽。不過幾唔捨得都好,師傅建議一開頭就撈勻晒先食,嗚呀!

另一款同樣使用高質食材嘅係鵝肝慢煮牛柳煲仔飯,鵝肝難得依然保持濕潤口感,而牛柳以低溫慢煮方式處理,保留肉汁之餘肉質亦軟腍,不過連埋咁大煲飯一齊食,食多幾啖開始有少少膩。

四臣雲吞雞則係荃灣店限定嘅新款式,四臣即係以淮山、茯苓、蓮子同芡實燉嘅藥材湯底, 清熱解毒,最啱就係而家大熱天時飲用。

除咗煲仔飯外,呢度都有幾款小菜同煲仔煎麵選擇。芝士控嚟到就記得要試芝士海蝦煲仔煎麵/米粉,麵餅脆口,撈埋芝士一齊食就冇咁乾。

胡麻棒棒雞則係一道幾開胃嘅前菜,胡麻醬如想像中香,而且仲辣辣地,一嚿一嚿咁好易食唔停口。

食完正餐食甜品都唔一定要轉場嘅,呢度有。南洋西多士!內餡係咖央,外層淋上自製斑蘭醬、椰汁仲有全碟精髓——香脆椰子糖!夠晒甜。


砂煲兄弟
地址:荃灣荃華街3號悅來坊B1樓B119A號舖

文、相、片:Kar


關鍵字
荃灣
煲仔飯
海膽
黑松露
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
迎接全新2020 1-2月下午茶推介
2020-01-06
【特約分享】新年去始創 食盡中、日、國際賀年佳餚
7天前