台灣人氣芋圓店終於登陸銅鑼灣 煙韌控最愛芋圓+麻糬牛奶冰 (有片)
2019-03-29

香港好多芋圓控,去到邊都要食芋圓,台灣有間人氣芋圓店,喺深圳、美國、加拿大等12國家都有分店,終於終於都等到佢哋開過嚟香港啦~~ 芋圓大大碗,料又多,仲有啲台灣店冇嘅特色甜品添~ 芋圓控你哋準備好未先?

香港店大部分嘅甜品都同台灣店一樣,分為芋圓、仙草、豆花、茶飲同點心五大類,可以跟官配又得,自選材料隨便配搭都得。不過望住選擇多多嘅menu都知你哋會有選擇困難症的啦,揀咗幾樣精選畀你哋去食住先~

招牌仙草沙冰就最簡單,最底層係仙草沙冰,然後有仙草凍同芋圓,建議大家可以先食幾啖感受佢嘅清甜,然後再加奶,完全係另一種口感啊。粒粒芋圓都好有嚼勁,韌度剛好。全部都係喺台灣中央工場手搓製作,再直送到香港現煮現賣,如果煮好一個鐘都未賣晒就會報廢然後再重新煮過新一批,以保證Q彈質感。

本身係大胃王,或有多個朋友一齊開心些牙嘅,仲可以添加自選材料,大甲芋頭同紅豆就最啱啦,啲大甲芋頭又綿密又香甜啊!

煙韌控就要揀「手工芋圓」系列啦,有1-5號唔同配搭選擇,全部都係仙草凍同仙草沙冰做底,4號on top就有埋芋圓啦芋頭啦紅豆啦珍珠啦咁,全部都係有咬口嘅嘢食,仲好多色彩,打卡好啱。

不過講到呃like之王,非芋薯圓Q麻糬牛奶冰莫屬啦。大大份,應該要兩個人些牙先食得晒。,成座自家製嘅練乳牛奶冰山頂頭仲有球香草雪糕,側邊圍滿黑糖同原味嘅長條形Q麻糬、一粒粒mini版嘅小芋圓、透明爽甜嘅冬瓜凍、最特別嘅橙色嗰幾粒波波,唔係地瓜圓咁簡單啊!咬開內有乾坤耶!外層係地瓜圓,中間包住嘅係芋頭啊,呢粒叫芋薯圓,係餐廳自家創作㗎,一次過食晒兩種口感,好香好好食。再加上少少焦糖醬同椰子絲,啖啖甜入心。

台灣都冇嘅綠豆糕麻糬拼盤,香港人有福啦,我哋有!負責人表示知道香港人鍾意食點心,所以特意推出呢個包括咗綠豆糕、芝麻味麻糬同花生味麻糬嘅拼盤。麻糬軟腍有咬口,餡料亦唔會過甜啊。

另外,豆花2號(地瓜、薏仁)同仙草冰沙凍奶霜亦頗受歡迎呢。仲有各式飲品買走飲都得~

是咪好心急?等多幾日。香港店4月1日正式開業啦。負責人仲透露,希望之會喺香港同地區都開分店,同埋秋季左右應該會有啲香港限定嘅產品呢~


鮮芋仙
地址:銅鑼灣登龍街18號V Point 地下1號舖
正式開業日期:4月1日


文、相、片:Kar


關鍵字
銅鑼灣
芋圓
甜品
台灣
過江龍
新店預告
走在最前線,為大家搜羅及報道有關即將開張的話題新餐廳資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
4天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
4月份好評餐廳十強
2020-05-07