全港8大西多士推介!傳統/新派人氣店 黑芝麻/奶皇流心口味
2023-01-30

西多士可以話係香港人最愛嘅港式小食之一,將厚麵包沾上蛋漿再拎去煎,加上糖漿食就係最傳統嘅食法。之後唔少茶餐廳都會加入花生醬或咖央作餡料,然後到而家已經演變成有唔同嘅口味同形狀,傳統同創意各有捧揚客,今期介紹8間香港人氣西多士畀大家~


目錄

  ►傳統無餡西多:興記咖啡室
  ►香煎西多士:瑞記咖啡
  ►一口西多士:陳新記
  ►沙嗲牛肉西多士:利口福快餐店
  ►Nutella西多:雪山冰廳
  ► 朱古力脆脆西多:閨•家
  ►黑芝麻/奶皇流心西多:銀津點心茶餐廳
  ►爆醬阿華田西多士:聚來車仔麵


傳統無餡西多 興記咖啡室

上環老字號茶記,名物係最傳統嘅西多士。以前嘅香港物質無而家咁豐富,所以最原始嘅西多士其實係無餡,只係將麵包沾上蛋漿拎去炸。麵包厚身外脆內軟,再加上牛油同煉奶,味道雖然簡單但充滿蛋香。

圖: eathappilyhk


香煎西多士 瑞記咖啡

上環街市熟食中心一間懷舊茶記,佢哋嘅西多士特別之處係將西多士加上蛋漿後逐件拎去煎,比起坊間嘅更香脆。可以揀有花生醬或無餡,因為煎嘅關係食晒成件都唔覺得heavy!

圖: fibee3b


一口西多士 陳新記

鴨脷洲名物一口西多士,西多士四四方方勁大件,唔同坊間西多士嗰種有餡料,佢係普通炸方包再配花生醬、煉奶、牛油汁,咁就可以自己調校點幾多醬汁。熱辣辣即叫即炸,外脆內軟嘅感覺更強烈。

圖: rbylife


沙嗲牛肉西多士 利口福快餐店

鹹鹹甜甜嘅配搭永遠都係無敵嘅~好似呢間快餐店嘅人氣沙嗲牛肉西多士,外表金黃,一切開係滿滿嘅沙嗲牛肉餡,沙嗲味好香濃,加埋薄薄有蛋香嘅麵包同糖漿,一甜一鹹真係愈食愈上癮。

圖: captaintam


Nutella西多 雪山冰廳

結合現代元素嘅老字號冰室,西多士兩層中間有一層厚厚嘅榛子醬,榛子醬厚薄均勻份量啱啱好,就算唔點糖漿都已經好夠味啦。

圖: chancka


朱古力脆脆西多 閨•家

創意朱古力脆脆西多,沾滿蛋漿炸至金黃色,外層脆卜卜,咁厚身都唔會炸過龍。面頭淋滿煉奶同朱古力醬,再加上阿華田脆脆,甜品控一定滿足!每一粒都差唔多同拳頭一樣大,同朋友分享就啱晒~

圖: WaiMingTin


黑芝麻/奶皇流心西多 銀津點心茶餐廳

流心嘅嘢永遠都係咁受歡迎~呢間點心茶記有供應奶皇流心西多士同黑芝麻流心西多士,前者奶皇香氣好濃,鹹蛋黃味都好適中;後者坊間真係好少見呢個口味,黑芝麻好香濃,比起奶皇無咁膩添。

圖: laihinfung


爆醬阿華田西多士 聚來車仔麵

啱晒相機食先嘅西多士,可以揀配花生醬或Nutella,面層鋪滿阿華田粉,中間加咗淡奶,一切開真係好澎湃!西多士都炸得好脆,配花生醬就會多份鹹香,Nutella就啱晒甜魔~

圖: hungrila_foodie



文: Yanica

關鍵字
西多士
茶餐廳
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!4月壽星嘆巴日Fusion菜享「年齡折扣」
2024-04-05
香港必食燒鵝餐廳推介 荔枝柴香煙燻燒鵝、香氣十足陳皮燒鵝
2024-04-04
人氣主題樂園2024新餐點 Duffy甜品系列、避風塘美食等
2024-03-15
【隨時更新】零食速報 每周新款零食、酒品點評
2024-03-26
關注組推介沙嗲牛 世一回歸、大圍多選擇
2024-03-27