全港首間主打薩摩和牛店 九龍城立食和牛漢堡
2019-01-23

身為牛魔王,最重要嘅任務係咩?梗係周圍搵靚牛食啦~ 話說九龍城最近新開咗間舖,係全港首間主打薩摩和牛嘅高級食材店,有多款和牛凍肉選擇不在話下,仲有熟食區,可以食埋即叫即製嘅靚和牛小食。

薩摩和牛有咩咁特別?薩摩半島位於九州最南邊,氣候溫暖,嗰度出產嘅牛肉質鮮紅粉嫩,脂肪分佈平均而油花豐富,油脂中更帶有奶油香。而被評為薩摩牛嘅牛嘅BMS霜降程度要有5級以上、仲要係最少28個月大但又未生過B嘅母牛,無使用抗生素同生長激素等。舖頭選用嘅牛都好矜貴下,食熊本米同大分米大㗎,到6個月大嗰陣就以TMR飼料(鹿兒島燒酹、菠蘿等)餵飼。講多樣嘢你知,上年先開始有薩摩牛進口香港咋。

份量十足嘅和牛芝士漢堡,麵包有輕輕烘過,加埋煎香咗嘅厚和牛肉扒同微熱嘅芝士、蕃茄、生菜,咬落肉味香濃。

但更吸引牛魔王嘅相信會係呢塊香煎和牛西冷。薄薄地一大塊,脂肪纖細,分佈平均,富油脂香,入口瞬間溶化,連個心都溶埋,叫你開心些牙一少塊畀個Friend都未必捨得。

另外仲有蒜香和牛粒同京蔥串燒和牛粒兩款和牛小食,後者比前者更為惹味。

不過呢度都唔係淨得和牛嘅,日式燒汁烤無激素雞中翼、燒牛油珍寶帶子串、烤德國香腸拼盤同各式便當都有。

至於凍肉方面,一入門口就有兩大「日本一」鹿兒島和牛凍肉專櫃啦,全部都係由自家農場產地直送,等級A4或以上嘅和牛,唔同部位都有,好似日本A4黑毛和牛三角腩(燒肉片)、M級肩胛心火鍋片等,由專業師傅切割,打邊爐又啱、鐵板燒又啱,香煎當然更加冇問題。

 日本A5極上牛肩胛(燒肉片)

識食嘅牛魔王就絕對唔會放過4%奇跡牛喇!咩係4%奇跡牛?聽個名就知係得好少數嘅牛先做到啦。原來係薩摩牛入面,BMS霜降程度有成10級或以上嘅A5和牛先可以配得到呢個稱號,可以話係牛中之牛!肉質更香更細膩,肉汁更豐腴啊。

 日本A5極上西冷(壽喜燒片)、日本A5極上肉眼(壽喜燒片)

 日本A5極上肉眼牛扒、日本A5極上西冷牛扒

多款刺身級海鮮如生蠔、青邊鮑、皇帝蟹等都可以喺度選購度,廚神要買靚料返家大顯身手絕對唔係問題。

最後,重點通常放最後。新店開張梗係有著數啦,由1月25日至2月10日期間,夜晚7點後,廿蚊就可以食到一串成18吋長嘅「日本一」 薩摩A4和牛雜菜串燒,每日限定50串。


裕千家
地址:九龍城 獅子石道57號新康大樓地下


文、相、片:Kar


關鍵字
九龍城
和牛
日本菜
牛肉
牛魔王
漢堡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
2019-12-30
荃灣新開無敵海景日式放題 佔地過萬呎 新張期間88折!
2020-01-03
迎接全新2020 1-2月下午茶推介
2020-01-06
【2019回顧】 過江龍之年 逾50間海外人氣店登陸 + 2020年預告 (有片)
2019-12-30
【特約分享】新年去始創 食盡中、日、國際賀年佳餚
2020-01-13