全港十大車仔麵精選!超入味瑞士雞翼、特色冬蔭公湯底、香濃沙嗲醬
2022-02-25

講到地道嘅港式美食,又點可以少咗車仔麵呢!車仔麵睇落簡單,但其實款式千變萬化,一碗好嘅車仔麵,由湯底、麵底、配料到醬汁都唔可以馬虎~今期精選咗10間本土車仔麵店畀大家,間間都各有特色!而且呢排疫情嚴重,唔想堂食車仔麵都啱晒外賣呀。


必叫甜酸齋 車仔麵之家

灣仔人氣車仔麵店,必試係甜酸齋、豬腸同咖哩魷魚。同坊間一般橙色嘅甜酸齋唔同,呢度嘅酸齋保留炸完香口嘅感覺,無畀酸汁搶晒風頭,反而無咁膩~沙嗲醬都係必叫,香濃惹味,配埋唔會死鹹嘅湯頭啱啱好。

圖: W.t.Chan


懷舊風車仔麵 麵尊

裝修以懷舊風為主,配料選擇好多,選擇困難症嘅朋友可以揀大尊或細尊,一碗有晒招牌配料,如豬紅、清甜無渣嘅蘿蔔、咖喱魚蛋、紅腸及豬皮等。不過佢哋嘅麻辣汁同咖喱辣汁先係精髓,加完成碗湯嘅味道層次即刻唔同晒。

圖: Foodjiwara_or


米芝蓮人氣之選 文記車仔麵 

米芝蓮推介車仔麵,瑞士雞中翼最受歡迎,滷得好入味,每一啖都係香甜嘅瑞士汁,好有驚喜。另外必叫配料有手打魚肉、蠔皇小花菇、玻璃辣魷魚及南乳豬手等。

圖: yummyeatate.eaten


泰式風味 上車車仔麵

車仔麵都可以好多樣化㗎,好似呢間沙田嘅車仔麵就有供應泰式冬蔭公同胡椒湯底,麵底仲有好掛湯嘅陳村粉揀,好有特色。唔知咩餸好食嘅,叫佢哋嘅招牌八寶就唔使煩喇~

圖: eatalogue2020


秘製辣魷魚 秘坊 

由湯底、麵底、配料到醬汁都超多選擇同幾有特色嘅麵店~招牌配料秘製辣魷魚人人都叫,魷魚爽口彈牙,醬汁香甜惹味。另外湯底推薦特濃鮮茄湯,配料同麵底都索晒湯好正呀。

圖: 花太郎


三十年歷史 35座車仔麵 

三十幾年前,喺秀茂坪邨35座對開就有個車仔檔賣車仔麵,因拆樓關係而結業。三年前店舖於觀塘地鋪重開,最近又搬到工廈,想搵返舊時回憶嘅味道去試呢間就啱晒!湯底用30磅豬骨熬成,香濃又唔會油膩,鍾意辣嘅人就要試下佢哋嘅秘製辣汁,又香又辣,成碗麵個味道提升唔少。

圖: h0410232


西貢超人氣 松記車仔麵

唔少明星都慕名而去嘅車仔麵店,第一次去嘅,可以嚟個招牌四寶麵試下先,包括豬手、豬腸、牛筋腩同牛肚,豬堅持以人手去毛,用滷水汁同南乳炆5-6小時,係誠意之作。

圖: Victoria Y


招牌魷魚鬚 來多碗車仔麵

有多間分店,最人氣配料一定非招牌魷魚鬚莫屬,每一條都好入味,值得一試。另外其他配料都幾特別,如滷水豆卜、鳳爪、台灣黑椒腸及特級潮汕牛筋丸等。

圖: kenwongchihuofoodiediary_852


健康無味精 靚靚不一樣的車仔麵

呢間車仔麵嘅湯底就標榜無味精,啱晒注重健康嘅現代人,食完一定唔會口渴呀。無味精唔代表味道寡㗎,好似湯底選擇都有黑松露豚骨、日式咖喱豬骨、特濃番茄同重慶麻酸辣等選擇。想食豐富啲可以叫埋蜂蜜芥辣豬生腸、墨魚煎餅及黑毛豬叉燒等一齊食。

圖: eddie_ilovefood777emmi


高質懷舊車仔麵 小排檔懷舊車仔麵

位於石硤尾白田邨附近嘅車仔麵店,細細間但幾高質,醬汁魷魚同蜜燒豬頸肉都係必叫嘅配料。最特別係可以選擇乾撈,如麻油同豬油拌麵,好邪惡~

圖: ShanLi5129





文: Yanica



關鍵字
車仔麵
湯底
甜酸齋
魷魚
紅磡
佐敦
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2024生日優惠】持續更新!4月壽星嘆巴日Fusion菜享「年齡折扣」
2024-04-05
香港必食燒鵝餐廳推介 荔枝柴香煙燻燒鵝、香氣十足陳皮燒鵝
2024-04-04
【隨時更新】最後倒數!2024即將結業人氣/老字號餐廳
3天前
【隨時更新】零食速報 每周新款零食、酒品點評
2024-03-26
關注組推介沙嗲牛 世一回歸、大圍多選擇
2024-03-27