元朗心機小店 嘆兩食牛肉麵+手工肉燥(有片)
2018-06-11

香港人對台灣菜嘅愛似乎有增無減,繼台式飲品開到成行成市,去到元朗轉角位亦搵到呢間新開嘅小店,家庭式經營全靠落足心思同時間:每日去街市買新鮮牛骨、足料熬煮嘅紅燒湯、燜至入味嘅肉燥等等。難怪已經係唔少同區街坊嘅推介,仲有客人跨區嚟試!
 

二悅由店主同屋企人一齊經營,所以小店只有10個座位,確保服務同食物維持水準。二悅既指「二月」,即係店主生日月份;亦係希望客人「易悅」,食完餐廳嘅出品後容易覺得喜悅呀。
 


 二悅紅燒牛肉麵($68)

裝盤非常特別嘅牛肉麵,皆因有兩種食法:拌麵同湯麵。手工日曬麵條從台灣入口,煮好後加入醬油同蔥油拌勻。食落味道鹹淡適中,無蓋過麵條嘅麵粉香又有蔥香。背後原因係佢地嘅蔥油係自家製,爆足兩個鐘令香味充分發揮。厚切嘅牛腱屬半筋半肉,富含膠質,甚至有少少黏口嘅口感。牛肚亦非常入味,爽口唔韌。
 

 

建議大家先食拌麵,之後就可以用湯碗試下紅燒湯底嘅味道,最後按自己口味加湯變湯麵。紅燒湯底係用牛骨湯加上多款蔬菜,好似蕃茄、紅蘿蔔、洋蔥等,同香料熬煮約兩個鐘。湯底聞落有好香嘅蕃茄同香料味,而且用茶壺奉上有助保溫。味道比醬油鹹少少,但帶蔬菜嘅自然甜味,加上無油膩感,香濃討喜。
 


手工肉燥乾拌麵定食($62) 

另一麵食推介係肉燥拌麵,肉燥係人手切碎再燜煮約兩日至完全入味,食落醬汁粘稠,瘦肉有咬口而唔柴,肥肉入口即溶。醬油嘅鹹香、豬肉嘅油潤,同冬菇嘅香味拌以滑溜嘅手工麵條,食落味道啱啱好。
 


而定食仲會附牛湯一碗、前菜一碟同兩款自選小食。牛湯係餐廳每日去街市買新鮮牛大骨,熬煮1-2日而成。奶白色嘅牛湯聞起嚟已經相當香,味道帶牛骨嘅淡淡甜味,滑而唔膩。小食方面開飯仔就揀咗糖心蛋同牛腱,前者流心效果非常誘人,而後者入味富膠質。
 

更多【新店直擊】:
1. 太安樓掃街攻略 必掃4大最新小吃
2. 將軍澳新開日式快餐店 一人前一口和牛鐵板燒
3. 炭燒原條韓牛肋眼上蓋 旺角新開韓烤店

 

手工肉燥茄子($25)


菠蘿青檸蜜($18) 

除咗麵食之外,小店仲有小食同飲品選擇。茄子炸過後保持柔軟,又相當容易吸收醬汁,加上肉燥汁夠香,係非常惹味嘅一道小食。而菠蘿青檸蜜無額外添加糖漿,甜味天然又夠消暑。
 

最後溫馨提示一句,小店不設加一,不過會定期休息,唔想摸門釘就記得上佢地Facebook Page睇睇。味道或者唔算最地道,但佢地歡迎任何意見,好似有街坊話之前嘅鐵壺唔夠保暖,佢地而家就轉咗做茶壺,係幾有心思嘅!
 





二悅
元朗合益路9-15號紀業樓地下G號舖




文、相、片:Cathy

關鍵字
元朗
台灣菜
牛肉麵
手工肉燥
拌麵
二悅
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
5天前
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!60間餐廳推$0-$25酒精搓手液換購計劃
7天前