傳統遇上卡通!Sanrio新口味平安包長洲登場(有片)
2018-05-07

下下星期(5月22日)就係一年一度嘅長洲太平清醮喇,年年都要食嘅平安包,一向都係白包面吸住平安兩個紅色大字,但今年有新裝呀!包面上嘅係Hello Kitty、布甸狗同蛋黃哥呀呀呀呀呀!好cute cute!

事緣係有間逾40年嘅老字號餅店,希望既能延續傳統之餘,亦能藉住新包裝吸引更多人認識呢種文化,於是就同咗Sanrio合作,推出咗3款全新口味嘅平安包,分別係南瓜皮蓮蓉餡嘅布甸狗、香芋餡嘅Hello Kitty同埋綠茶皮紅豆餡嘅蛋黃哥,連埋傳統嘅共蔴蓉餡,一盒四件。連個包裝盒都好鬼靚,Sanrio粉絲睇嚟都要搵日入返轉長洲喇。

佢哋細細個工場,喺太平清醮前後,總共要製造超過6萬個平安包,雖然有部分程序例如打發麵粉、切割等步驟可以用機器代替,但包餡、吸印仔之類都仍然要用人手處理,一啲都唔簡單呀。

話說老店第二代接班人郭宇鈿(Martin)以前喺金融界做咗成10年,去到top management嘅位置,但上年尾居然放棄呢份高薪厚職,全時間返去長洲老店幫手。「返嚟幫手呢樣嘢,我係先斬後奏嘅,辭咗職先同老豆講。」郭老父本身反對Martin返嚟接手嘅,因為覺得佢要放棄太多嘢,同時呢行又搵得唔多,怕個仔辛苦。不過Martin好誠懇咁話:「我唔係睇呢樣野,唔係用dollar sign去做決定,我係睇價值觀嘅。」Martin口中嘅價值觀,傳統為其一,盡孝為其二。

郭老父今年六十有七,最近對腳因為長時間企得太耐,導致勞損要做手術,Martin表示近幾年覺得屋企人開始老,因而萌生咗接手老店嘅念頭,而且仲心懷大志,希望可以將平安包打造成「長洲手信」。另一方面,佢亦希望可以交代到畀屋企人聽「你哋冇白養到呢個仔,我大個喇,可以自己獨當一面。」

不過當然,兩代人嘅諗法同思維總有分別,就好似今次crossover Sanrio咁,郭老父最初都唔太睇好,又驚整多咗幾款口味,製作上會出現混亂,不過由5月1號起推出到而家,見到坊間反應都唔錯,對Martin嚟講的確係一個肯定。

講開又講,太平清醮之所以會食平安包,相傳係因為喺清朝嗰陣,長洲發生瘟疫,於是村民就用包嚟餵飽鬼怪,舉行祭祀儀式,瘟疫得以控制。自此,就成為每年嘅傳統喇。

除咗新口味嘅平安包之外,舖頭亦即將推出兩款新味嘅傳統餅點,分別係平安酥同鹹蛋曲奇。平安酥面層加入入葵花籽仁、南瓜籽仁等,令口感更為豐富;至於鹹蛋曲奇,則喺牛油香中滲出淡淡嘅鹹香,頗有新意。


郭錦記餅店
地址:長洲北社街46號舖

關鍵字
老店事情
長洲
平安包
傳統
卡通
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】便利店尋寶 每周新品速報
1天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
5天前
日本人氣茶室登陸尖沙咀 招牌Tea Set、甜品推介(有片)
2019-09-25
高CP值火鍋放題 (1)
1天前