憑着海膽杯而人氣急升嘅中環S2 Kitchen，最近進駐佐敦開設主打鐵板燒嘅分店S2 Teppanyaki，新店主要供應4款套餐，價錢由$450起，雖然價位唔係特別平，但細睇菜單，有刺身日本和牛招牌海膽法國鵝肝等等，而當中最特別嘅，就係用特製高溫紙袋煮製嘅紙包蜆湯，視覺、味覺均一流。

老闆兼主廚樂師傅曾任職於多間知名日本料理如松菱、水車屋、有馬等，亦曾走訪內地、澳門等多間餐廳，番到香港後開設位於中環嘅S2 Kitchen，啱啱11月中就開設呢間分店。

每個套餐均有沙律、刺身、主菜、食事及甜品，而店子主要供應香蒜薄燒牛肉鐵板（$450/位）、日本十勝豚肉（$450/位）、A5熊本和牛（$780/位）以及龍蝦海鮮（$450/位）4款套餐。

刺身杯會有牡丹蝦、帆立貝及時令刺身3款，採訪當日時令刺身為三文魚。

S2特色黑松露炒飯以火腿、醬油、蛋絲、蘿蔔絲、蔥絲一齊炒，最後再灑上少許香氣十足嘅黑松露，一碗金黃色嘅鴨松露炒飯就完成。

主角出場！紙包西蘭花忌廉蜆湯

菜式之中最吸引就係呢個S2鐵板時令紙包蜆湯，用抵禦250度高溫嘅特製紙袋盛載住湯水、湯料並綁實袋口，然後放喺鐵板上煮滾，就可以畀客人打開嚟飲。

湯水款式會不時轉換架，圖中嘅係西蘭花忌廉蜆湯。上枱會跟一小杯忌廉，畀客人隨自己口味倒入湯中。

味道偏淡，但飲到啖啖西蘭花蓉，好creamy。

主菜有乜食？

1. 日本十勝豚肉餐

主菜有鐵板焗大蜆、香草煎焗三文魚及日本十勝豚肉厚切。

將大蜆放喺鐵板上燒，蜆肉都幾大隻喎！

三文魚好厚身，而且充滿油脂香。

十勝豚肉肉質上盛，只需喺鐵板上燒，灑少許黑胡椒、鹽就已經好好味。

臨上枱前，廚師會將豚肉切成一粒粒。

然後再將豚肉粒放喺吸走白麵包上面，吸走多餘油分，令豚肉口感清爽啲！

2. A5熊本和牛餐

主菜包括香煎大蝦、香煎法國鵝肝伴時令水果照燒汁及A5熊本和牛厚燒。

香煎大蝦用嘅係越南虎蝦，廚師將大蝦切件，快熟嘅蝦肉話咁快就轉色。

蝦肉厚身兼彈牙，就咁燒香都好正！

法國鵝肝雖然好軟腍，齒頰之間亦好有油香，但鵝肝本身油分好重，就咁單食有啲過油，配埋旁邊嘅水果一齊食，口感會fresh啲無咁油膩。

來自日本熊本縣嘅A5和牛，牛肉級數直逼刺身級。廚師燒和牛時只燒熱外層，特別keep住和牛內裡嘅低溫，令和牛口感更爽口，肉汁亦更香濃。

另外，廚師特登不加調味，並跟送一碟鹽花畀客人，客人可先品嚐原味和牛，再按自己口味加鹽調味。

3. 龍蝦海鮮餐

主菜有鐵板醬汁焗原隻龍蝦、鐵板焗岩蠔及鐵板脆皮煎鰻魚。

廚師選用原隻美國波士頓龍蝦，將龍蝦切件去燒，再加上特製醬汁而成。

醬汁係用龍蝦膏、牛油混成，龍蝦味濃，而且龍蝦結實又彈牙，好味！

蠔肉肥美多汁，仲有少許海水味添！蠔肉上面仲有香蒜、蔥絲等配料，味道更為惹味。

將鰻魚喺鐵板香煎，令鰻魚皮收縮。鰻魚皮外脆，入面依然嫩滑。旁邊仲有濃濃鰻魚汁，不過味道略鹹，單食鰻魚都好夠味。

食到最後，餐廳仲會附上花旗參茶，入面仲有一粒消滯清新嘅青檸添！

秘密菜單！隨時送你大廚私密焦糖多士

樂師傅另外仲爆料，餐廳會不時送出免費嘅焦糖多士畀各位食客品嚐，用厚厚牛油燒熱麵包，再喺麵包兩面都灑上砂糖。

然後控制好火侯，就可製作出微焦香甜嘅焦糖多士，好邪惡，但好好味。

點先有得食？樂師傅笑稱，只要叫佢「靚仔」就可以食到，各位食客識做呢～

餐廳座位不多，但餐廳正中間有大廚即煮嘅鐵板燒吧枱位，可近距離觀賞大廚手藝。

舖頭以日本各種清酒及旗幟裝飾，簡單又搶眼。

S2 鐵板燒
地址：佐敦偉晴街29-37號地下6號舖

文：Joy