人氣川菜旺角開4600呎旗艦店 一次食勻磯燒海鮮+麻辣小龍蝦+麻辣鴛鴦鍋(有片)
2019-05-18

麻辣鍋店喺香港開到成行成市,無啲特色都幾難突出重圍!人氣川菜川婆婆今次喺旺角開設佔地4600呎旗艦店,餐廳裝修同其他分店與別不同,以粉紅同藍色為主調,空間寬敞,食飯都食得舒服啲啦~食物方面都新增咗唔少菜式,如旗艦店獨有嘅磯燒海鮮、小菜芒果醬炒辣子雞、火鍋配料及湯底。


新店最唔同就係多咗磯燒系列,貪心嘅開飯仔囡們就可以一邊燒一邊烚吓烚吓啦~食得磯燒主角梗係海鮮啦,餐廳供應海鮮燒烤套餐($288),有生蠔、日本大元貝、貴妃蚌、蕃薯蜆及開邊蝦,新鮮彈牙。燒蠔仲可以配埋秘製醬汁食。


招牌鴛鴦鍋($138)

鴛鴦鍋包括招牌麻辣鍋同埋旺角新店先有嘅花甲菌皇鍋。麻辣湯底減少使用牛油,改以啤酒取代, 健康之餘又令湯底更加鮮味。 加上用大量牛頸骨、十幾種四川香料熬製,味道麻、辣、鮮、香!入面嘅鴨血同豆腐都入晒味~


花甲菌皇鍋湯底先用雞熬製10小時,再加入珍貴嘅羊肚菌、紅菇、白牛肝菌、黃牛肝菌、繡球菌、黑松露同竹笙等材料,最後加入花甲,菌味突出,有淡淡花甲鮮味。


牛羊豬雜錦拼盤($268)

想每樣野都試少少,呢個肉類拼盤就啱晒!分別有安格斯牛肉、鹿兒島黑豚梅肉同埋紐西蘭羊肉。


牛肉上上簽($98)

同樣都係旗艦店先有!而且啱晒打卡用~牛肉分別有麻辣、孜然、泡椒味,配埋蘆筍、淮山同玉米筍食口感更豐富。


鬼馬芝士墨魚膠($88)

自家手打墨魚膠夠彈牙,咬開後有大量芝士流出,味道香濃。


更多【新店直擊】:
1. 全新港式菠蘿油雞翼!銅鑼灣新開雞翼專門店
2. 中環新開日式炭爐串燒店 資深日本師傅駐場 主打12款雞肉部位
3. $25自製個人化黑啤拉花 GUINNESS期間限定醇黑體驗館


芒果醬辣子雞($188)

除咗火鍋同磯燒,餐廳仲有供應人氣川式小菜,碟碟都大大份,一班朋友share就最啱!芒果醬辣子雞又係新店先有!辣子雞炸三次,加入特製花椒、辣椒及十三香粉,辣得過癮!點埋芒果醬又係另一番味道,清新之餘可減輕辣度。


十三香小龍蝦(小$268 大$388)

小龍蝦肉質結實彈牙,以十三種辛香料熬制,加入啤酒提升鮮味,真係會愈食愈上癮!


檸檬酸菜魚($198)

加入檸檬汁嘅酸菜魚坊間真係少見啲,會多咗一份檸檬清香~特意選用二斤重嘅生魚,肉質爽滑。 配埋四川老壇泡椒酸菜,味道又爽又辣又酸, 好惹味!湯底一樣唔馬虎,用鮮雞熬製,加入黃燈籠椒、小米辣椒及南瓜茸,湯底又香又濃。


剁椒臭豆腐($68)

臭豆腐夠薄,外脆內軟,重點係真係好臭!加埋剁椒就更惹味~


附近返工嘅上班族有福啦!餐廳供應午市套餐,如水煮魚($78)及安格斯牛肉小金鍋($98)食完下午做嘢都有動力啲!


川婆婆

地址: 旺角登打士街56號家樂坊8樓802號舖




文:Yanica

相、片:Tom Li


關鍵字
川式
火鍋
旗艦店
磯燒海鮮
旺角
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
1天前
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
本地搵食有著數!OpenRice x 旅發局 合推 5折餐飲券+餐飲禮遇
2020-09-21
悠閒早晨 3間英、澳、日Brunch推介
2020-09-21
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12