亞洲風味健康沙律吧 中環旗艦店新登場(有片)
2018-10-18

各位打工仔女想食得快啲又健康啲,可能都會諗起沙律,但沙律日日食都會厭?未必!呢間嚟自新加坡嘅沙律連鎖店就主打超過60款配料同20款自家製醬汁,仲有薄餅卷、有營穀物碗等等,唔少都加入亞洲元素。中環新開嘅旗艦店空間更大亦有更多選擇呀!
 



SaladStop!喺新加坡創立,之後分店開到去印尼、日本、西班牙、韓國等地,今年進軍香港,而中環呢間係香港首間旗艦店。主打沙律、薄餅卷同有營穀物碗,可以自由配搭配料,或者點配搭好嘅招牌口味。選用新鮮食材,唔少蔬菜都係嚟自本地。而醬汁全部都係當日新鮮製作。
 

招牌沙律



Oh Carb Lah!($66)

品牌嚟自新加坡,自然有新加坡特色選擇啦。呢份沙律除咗有羅馬生菜、車厘茄、雞蛋之外,仲有蟹棒同粉絲,配新加坡辣蟹醬更有風味!
 


Omega 3 Baby!($76)

揀招牌沙律配搭除咗唔洗煩點配搭先好食之外,另一個好處就係設計嘅時候都會平衡返食材嘅口感同營養,好似呢款就以羅馬生菜、火箭菜、紅菜頭配搭含豐富Omega-3嘅三文魚同豐富Omega-6嘅葵花籽,有多款口感又健康。
 


Jai Ho!($70)

呢款沙律主角係富香料味嘅印度雞肉,配以羅馬生菜、薯仔、鷹嘴豆、辣椒、青瓜等材料,建議配印度乳酪或者經典凱撒沙律醬。
 


Tuna San($78)

見到吞拿魚大家可能都估到,呢款沙律係以日本風味為靈感,喺羅馬生菜、牛油果、毛豆、柑橘等上面放上切粒嘅烤吞拿魚,配甜辣芥末蜂蜜醬更開胃。
 

更多【新店直擊】:
1. 抵食娘惹肉骨茶、叻沙 油麻地新開馬拉茶室
2. 首創黑白珍珠奶茶 台灣國宴級珍珠奶茶過江龍抵港!
3. 將秘魯街頭小食帶到香港!中環新秘魯烤雞店

 
招牌薄餅卷



Yeobo Yeobo($78)

秋冬唔想食咁多生冷嘢?呢度亦有搭配藜麥嘅穀物碗,轉做薄餅卷烤過暖暖地更易入口。例如呢款就係韓式口味,以暖烤牛肉同烤蘑菇搭配藜麥、菠菜苗、雞蛋、粟米等等,食得辣嘅朋友可以配韓國辣椒醋,香辣惹味。
 


Iron “WO”Man($76)

呢款就最啱女士補充鐵質!有含豐富鐵質嘅菠菜苗、山羊芝士、烤南瓜同烤杏仁,配味道酸甜嘅紅桑子醋增加味道層次。
 


Hail Caesar with Chicken($66+$10)

最受歡迎嘅沙律口味之一,用墨西哥薄餅包成薄餅卷就更方便食啦。有羅馬生菜、煙肉粒、Parmesan芝士、雞蛋碎同麵包粒,當然要配返經典凱撒沙律醬。呢份再加$10要埋烤雞,食起嚟當然更滿足。
 


Howdy($70)

同樣都係雞,呢款就係加入香脆炸雞喇。仲有羅馬生菜、車打芝士、雞蛋碎、紅蔥頭等配料,配田園醬,清新得嚟味道唔寡。順帶一提墨西哥薄餅有四款選擇:原味、全麥、蕃茄同菠菜。
 


(左至右)Strawberry Banana Muesli、Mango Chia Pudding、Raspberry Yoghurt(各$38)

叫得旗艦店,除咗空間更大可以畀各位坐低堂食之外,食物選擇亦更多。呢度會供應熱湯、果昔、冷壓果汁、咖啡、茶同格式健康甜品。即刻Grab & Go同時亦為健康加分。
 


而對附近上班族嚟講,最方便嘅相信係呢個Online Pick-up Corner,大家可以上官網、或者用餐廳Apps落單,可以揀即刻或者指定時間嚟呢度自取外賣,慳返排隊時間就可以慢慢享受你嘅健康大餐啦。
 






SaladStop!
地址:中環干諾道中8號交易廣場第二座平台3樓311-312號舖




文、相、片:Cathy

關鍵字
中環
沙律
薄餅卷
穀物碗
SaladStop
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!屋企都嘆到三層架下午茶 Tea Set外送/外賣自取推介
4天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30