周末做兩件事最好，第一就是瞓到自然醒，之後去食個brunch或者嘆個下午茶就最好不過！呢一款下午茶「Cha Chaan」，係曾於亞洲五十最佳餐廳連續兩年取得「亞洲最佳甜點師」Janice Wong設計，以香港茶餐作主題，加入餐廳位處嘅社區石塘咀特色。即刻試試好唔好食先！
每人可以先選用Janice Wong特別調製紅茶或者咖啡，紅茶味都好特別，好似有可樂香氣嘅Tea Cola、Toffee Popcorn，口味偏甜。下午茶以中式通花圖案設計嘅透明膠架盛載，一共有十二款食物，每件的骰精緻。最特別係侍應會將即製爆谷喺碟上、甜品架上等周圍灑，未食已經聞到陣陣香甜爆谷味，即刻食慾大增！
頂層嘅「蘑菇花園」係餐廳招牌菜，蘑菇蓉有陣陣松露香，入口香滑creamy似杰身嘅蘑菇湯，加埋炸紫薯、炸番薯、炸蓮藕、露筍等蔬菜，都幾飽肚架。
鹹食有煙燻茄子酸麵包、煙三文魚麵包、五香鴨肉饅頭同辣肉腸立方丸子，賣相靚，每一件都用上多款配菜製成，個人最鍾意香口嘅鴨肉饅頭。
煙燻茄子雜椒粒酸麵包同煙三文魚麵包都係一口size，三文魚用紅菜頭醃過，清新！
自家製黑白饅頭放上五香粉醃製、低溫烹調的鴨肉，有一粒熱情果軟糖減低油膩感。
丸子內有意大利飯，辣肉腸及芝士，上面嗰塊係蕃茄蟹湯，但唔太食得出。
下層就開始係Janice Wong最拿手嘅甜品，有鹹蛋肉鬆泡芙、鹹甜爆谷波板糖、朱古力、檸檬撻、迷你海鹽焦糖朱古力條及抹茶Financier，最特別係鹹蛋肉鬆泡芙，流心餡帶甜味又鹹蛋香！
鹹蛋及肉鬆是香港經典的食材，再配上紅桑子粉，味道帶甜但有鹹蛋黃起沙的質感。
波板糖有鹹、甜兩款，入面係牛油爆谷，但食落似朱古力。
最下層有朱古力、檸檬撻、海鹽焦糖朱古力條及抹茶Financier。
選用京都辻利抹茶粉製作，加上柚子及焦糖脆米，微酸加茶香好配合。
另外仲有椰子斑蘭雪糕捧同四方型嘅鬆餅，食到呢一步其實已經好飽！
黑白朱古力脆皮包坐椰子斑蘭雪糕，斑蘭味好濃。
下午茶逢星期六、日及公眾假期供應，每日只係限量10份，必須預約先有得食。價錢為$508兩位，但食到大師級甜品，貴少少都值嘅。
Artisanal Cha Chaan
地址：西環石塘咀南里8-12號地下及1樓
供應時間：逢星期六、日及公眾假期 3pm-5:30pm
價錢：$508 （兩位），另加一服務費
文、相、片：Perrins