九龍灣新開日式親子餐廳 全自動新幹線列車送餐
2018-03-09

小朋友天生坐唔定,每到食飯時父母就最頭痕。九龍灣呢間新開嘅日式餐廳,應該可以令呢班父母放輕鬆!因為食物會由餐廳嘅新幹線列車自動送到客人面前,拎咗食物後列車又會自動駛走,好有睇頭。

新店約有80個座位,有兩條新幹線高速列車。客人用座位上嘅IPAD柯打心水食物,點餐後等一陣,食物就會由新幹線列車自動駛到客人面前。

列車嘅紅外線系統感應到客人拎起食物後,就會自動駛走,客人連掣都唔使㩒,好方便。除咗新幹線列車,下層另有一條運輸帶,同樣傳送食物畀客人。

餐廳裝潢亦好配合「新幹線」主題,一入餐廳就見到大大幅日本JR路線圖,另一邊牆身亦是一格格車窗嘅列車。而且天花仲有幾個列車車廂內常見嘅扶手吊環,門口嘅等候位都佈置成列車車廂咁,畀客人可坐住等。


更多【新店直擊】:
1. 新加坡大廚主理 黑白café 娘惹風濃湯叻沙、蝦麵
2. 鹿兒島薩摩牛燒肉店抵港 必吃油花爆瀉4%奇跡之牛
3. 銅鑼灣耀華街打卡新酒吧 主攻本土台灣啤酒


食物方面則供應日式美食,包括:壽司、刺身、軍艦、卷物手卷、炸物燒物及前菜湯品一共有60幾款。

呢兩款特式香蔥吞拿魚碎($20/件)、特式三文魚籽($20/件)係店子招牌,壽司師傅以軍艦壽司做靈感,紫菜會放喺底部,將壽司做成一口就食到嘅圓碌碌丸子。客人食之前,以香脆紫菜包住丸子再放入口,就可以一次過品嚐所有配料,好有層次。

而最受食客歡迎嘅有火灸壽司系列,有火灸芝士蟹棒壽司、火灸芝士海鰻壽司、火灸左口魚邊壽司及火灸三文魚壽司,火灸後嘅壽司上面有微微焦香。

各款刺身用料高質,有菲律賓嘅吞拿魚、新西蘭嘅劍魚腩、加拿大嘅北寄貝及日本嘅油甘魚,一定要試好肥美嘅劍魚腩,油香比三文魚更濃郁,而且切得厚身,好有口感。

至於炸物,開飯仔推介日式芝士年糕($28),外層好煙韌,入面就溫暖又軟綿綿嘅芝士,而且芝士味濃,仲有少少流心效果。

另外餐廳提供太陽、月亮、星星3款兒童餐,呢款星星號兒童餐有蟹籽沙律、三文魚細卷及日式炸雞,仲有1支益力多添!

除咗兒童餐,餐廳亦提供圖書及玩具畀怕悶嘅小朋友,玩完好鍾意仲可以免費拎走!


九井壽司
地址: 九龍灣宏照道38號Megabox9樓25號舖


文:Joy

關鍵字
九龍灣
日本菜
壽司刺身
親子餐廳
新幹線
自動送餐
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
2天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
旺角新開花藝Cafe 豐富全日早餐+明太子貓耳朵+特調有機花茶(有片)
2020-05-18