熊本縣部長熊本熊周不時推廣自己鄉吓嘅食材，今次又同餐廳聯乘啦～丼丼屋推出黑毛和牛定食，選用熊本縣嘅 A4 黑毛和牛之外，定食仲有細路仔版本，大人細路都滿足到！

食材都由熊本縣進口，由南瓜、士多啤梨到和牛丼，連燒牛肉汁都使用熊本產原材料製造，A4 熊本和牛脂肪分佈均勻。丼面舖上大約八塊和牛，頂端放上蛋黃伴上黃芥末醬和酸忌廉，滑溜蛋漿同醬汁混合起來食落去陣陣鹹香，同軟嫩和牛入口即溶嘅口感夾得嚟幾惹味！

「熊本產黑毛和牛丼定食」（＄288）

如果覺得唔夠味嘅話，餐廳亦有提供自製燒牛肉汁配搭，醬汁用上熊本產大豆同薑等，質地唔太稠身，味道相比外間燒肉汁為淡，所以牛肉輕輕沾上後唔會搶去牛肉香氣，燒汁帶點薑味鹹香，搭得唔錯！定食亦配上日本南瓜沙律同士多啤梨果醬沖成嘅梳打，夏天食夠曬清新！

牛肉厚薄適中，入口脂肪即溶，肉咬落軟嫩、味道香濃。配上幼滑蛋黃漿同其他醬汁好惹味！

可以直接倒上和牛上或蘸汁，建議先試蘸醬汁一下。

兒童定食亦係今次主角之一！大人版有大大份和牛，呢份兒童版就係 sell 可愛～細看之熊本熊由餐盤、水杯到蛋糕仔包裝都無處不在。烏冬亦有幾塊 A4 和牛，配上炸物例如芝麻雞翼同炸熱狗；同場嘅奶油蛋糕賣相趣。餐廳有兩個定食合一嘅「親子餐」選擇，價錢更係散買嘅八五折！實行「大細同樂」~

「熊本產黑毛和牛烏冬兒童定食」（＄98）

炸熱狗細細件好的骰

奶油蛋糕包裝可愛！

除咗有優惠價之外，買定食亦有機會獲贈限量嘅熊本熊扇同文件夾！

丼丼屋各分店限定發售: https://bit.ly/2wlZqlq

文、相、片：Timothy