中環高質人氣酒吧回歸 5款夏日清甜蜂蜜酒/雞尾酒推介
2021-06-18

無論你係咪啤酒迷,中環呢間中西fusion酒吧餐廳都值得去朝個聖,因為佢哋無論酒水定食物,都充滿特色同創意,配搭坊間少見。最近更聯乘本地酒廠推出幾款最啱夏天飲嘅清甜蜂蜜酒。

餐廳之前開喺卑利街時已經好旺人氣,而家搬咗大舖重開,人氣有增無減。新店保留舊日香港嘅裝潢主題、打卡位「鬼佬涼茶」霓虹燈等。飲酒前先填填肚,特別推介法式焦糖女兒紅獅頭鵝肝燉蛋配牛油多士,賣相同一般焦糖燉蛋無異,係側邊配多咗幾片薄脆同多士。焦糖脆片底下,係軟滑嘅鵝肝醬,滿口濃郁油脂香,仲滲有少少酒香,配多士食當然perfect池,但就咁空口食亦無不可。

「酒肉朋友」們可以點選煎封軟嫩美國頂級甘香牛臀西冷配慢烤日本椰菜及川味香辣淡忌廉汁。一片片粉嫩色嘅西冷口感軟腍兼有彈性,肉味重。汁底微微香辣帶甜,就連側邊嘅菇菌同椰菜點咗汁後都特別入味。

一場嚟到,當然要飲酒。蜂蜜酒(mead)如何?有說蜂蜜酒係世界上最古老嘅酒之一,係古代皇室貴族嘅飲品,亦係中古歐洲新人結婚後,蜜月期間會飲嘅酒。不過因為蜂蜜酒製作過程複雜,需時又長,香港亦唔多酒廠會將佢放做常設酒款。難得最近有本地酒廠使用香港原料釀造咗幾款蜂蜜酒,一於要試試。

城釀嘅啤酒花龍眼蜜蜂蜜酒「蜜月」,以冷泡方法將啤酒花融入本地蜂農嘅龍眼蜜釀製,比一般嘅啤酒少咗一份甘澀,但帶有清新氣息,同時多咗蜜糖嘅香甜,飲落非常舒服。即使平時唔多飲酒,或者怕啤酒苦嘅朋友仔,都絕對可以一試。

另有兩款全新口味嘅夏日限定蜂蜜酒,一款係加入苦瓜,同沖繩縣獨有嘅沖繩香檬製作嘅沖繩香檬苦瓜蜂蜜酒「蜜月沖繩」,一款係同餐廳何蘭正合釀嘅西洋菜蜂蜜酒「菜蜜」。前者喺陣陣蜜甜中,隱隱滲有酸澀甘苦;後者釀製時加入本地百花蜂蜜、西洋菜同蜜棗,好似完美還原咗喺茶記飲嘅菜蜜味道,非常甜香。

除咗蜂蜜啤酒外,大家亦可試試加入蜂蜜酒調製嘅蜂蜜雞尾酒。由本地酒廠無名氏嘅氈酒同城釀蜂蜜酒做基底,分別調出感覺清新嘅Gin & Mead,同埋清甜得嚟又有啲微辣嘅薑檸蜜。

何蘭正
地址: 中環雲咸街29號東方有色大廈2樓


文、相、片:Kar

關鍵字
中環
酒吧
精釀啤酒
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【隨時更新】零食速報 每周新款零食、酒品點評
1天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
1天前
榴槤Buffet真的很興奮~ 九龍區酒店7、8月限定榴槤盛宴
2021-06-30
投奔盛夏 7-8月份下午茶推介
2021-07-08