一雞二食!鹿兒島薩摩赤雞壽喜燒套餐 銅鑼灣日式簡約風餐廳新菜單(有片)
2019-10-03

位於銅鑼灣呢間日式餐廳,裝潢以木系元素為主調,營造日本傳統簡約風,啱晒想搵個安靜嘅地方舒舒服服食返餐嘅朋友。餐廳平時主打高級壽喜燒及日式火鍋,同時供應多款時令壽司,如壽喜燒和牛壽司、日本和牛壽喜燒鍋及日本和牛鱈場蟹鍋等。


平時食壽喜燒就梗係配牛嘅~但主廚就覺得香港唔少人都鍾意食雞肉,所以就唸到將雞肉融入壽喜燒,推出呢個全新嘅薩摩赤雞壽喜燒套餐,一共有六道菜,而且仲有驚喜嘅單點食品。


鹿兒島薩摩赤雞壽喜燒套餐($1400/兩位)

前菜有機雜菜沙律,選用日本新鮮有機雞官草及水菜,加上三文魚籽,最後淋上秘製醋汁,有陣陣松露油及芝麻香氣,味道微酸,夠晒清爽開胃。


原隻汁煮鮑魚選用新鮮南非鮑魚,以秘製醬汁反覆烹煮四至五次入味,鮑魚厚肉、爽口彈牙。配上飽滿嘅三文魚籽及鮮甜嘅北海道馬糞海膽,點埋鮑魚肝醬食,鮮上加鮮啊。


師傅會選擇最新鮮嘅魚鮮製作成壽司,鮮甜嘅海膽、深海池魚、左口魚邊、中拖羅及燒大拖羅,每一款都值得一試~


嚟到最個套餐嘅重點薩摩赤雞壽喜燒啦!秘製嘅壽喜燒鍋醬汁以和牛油脂、牛筋和牛肉,連同日本醬油及多款秘製食材熬煮3至4小時而成,先放入菇類(雞脾菇、大啡菇、蘑菇、本菇及直菇)及醬汁,所有菇類吸收晒壽喜燒汁,好惹味!


食咗部份菇後就可以落鹿兒島薩摩赤雞肉,薩摩赤雞肉係日本三大名雞之一,雞味濃郁,脂肪較少,肉質結實富彈性。


最後就可以加入雞蛋、洋蔥及黑松露,製成一碗壽喜燒親子丼,甜甜嘅醬汁配上雞蛋,配飯食真係一流~

套餐甜品可選擇芝麻、綠茶、咖啡味雪糕或柚子雪葩,開飯仔私心建議柚子雪葩,清爽解膩,為呢餐畫上完美句號。


黑松露和牛鵝肝多士 ($215)

單點嘅新菜式,最推介係呢個黑松露和牛鵝肝多士。最底層係蒜蓉法包,放上肥美嘅法國煎鵝肝,再舖上兩大片日本熊本A5黑毛和牛,油花分佈平均,入口即溶,淋上秘製壽喜燒醬汁,有淡淡甜味,夾住嘅紅毛生菜又可以化解油膩感。


霜月   

地址: 銅鑼灣霎東街15-21號OLIV 24樓





文、相、片: Yanica


關鍵字
銅鑼灣
日本菜
壽喜燒
壽司
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-10-07
牛大人火鍋姊妹店!旺角新開台式燒肉吃到飽 任食澳洲 M5 和牛、SRF極黑牛霜降牛肉眼
2020-10-19
【即睇10月生日】酒店半價放題 Tiffany & Co.旗艦店導賞
2020-10-06
高級意大利菜餐廳尖沙咀重開 擁無敵海景 即席炮製經典芝士黑松露意粉+抵食3道菜午餐
2020-10-12
滋味到家!新鮮海野海鮮+逾200款蔬果肉類 食材直送上門網站推介2.0
2020-10-08