【8月生日】超靚!人氣生日蛋糕懶人包
2020-07-28

最近疫情反覆,大家都減少外出一齊抗疫。呢段期間反而多咗時間陪屋企人,如果你咁啱8月生日,今年仲可以留喺屋企同家人一齊吹蠟燭、食蛋糕。想喺屋企都影到靚相留念,揀個精緻生日蛋糕是必須吧~今次就介紹各款網紅蛋糕,有啲仲係純素無麩質嘅健康蛋糕𠻹。

POEM PATISSERIE by Tate 唯美詩意
香港著名女廚師Vicky Lau 主理嘅餐廳TATE Dining Room & Bar 曾獲米芝蓮一星,其後佢再開咗呢間POEM PATISSERIE by Tate,令大家見識到蛋糕詩意柔情一面。當中最令人驚嘆嘅就係「山水」,將山水畫風融入法式慕絲蛋糕,恰到好處嘅留白更有意境。蛋糕用冷泡鐵觀音茶製成,加入茶味杏仁蛋白餅、金桔軟糖、白朱古力外層、檸檬海綿蛋糕,輕甜微酸。

(左)詩意「山水」蛋糕、(右)淡綠色扇型蛋糕好典雅
圖:poempatisserie @Instagram

Cake of Stardust 吸睛多層夾心蛋糕
大胃口必揀嘅超多層夾心蛋糕,加埋豐富Topping 同Lava 元素超吸睛。蛋糕有4吋、6吋或8吋揀,就算屋企多人都好夠食。佢哋嘅朱古力蛋糕非常受歡迎,朱古力味相常濃郁,並略帶可可嘅甘苦味,朱古力控一定鍾意!

(左)朱古力味極濃郁、(右)獨角獸顏色嘅綿花糖朱古力蛋糕影相好靚
圖:cakeofstardust @Instagram

LE BREAD LAB 細食之選韓國人氣班戟卷
由韓國紅到嚟香港嘅LE BREAD LAB,踏入粉紅店面已感受到滿滿少女心。呢度並唔係買大大件蛋糕,反而係一啖一件嘅班戟卷。軟軟班戟夾住綿滑忌廉,有雜果、咖啡、朱古力口味等選擇,最受歡迎嘅係士多啤梨味,清甜士多啤梨同忌廉好夾。自問怕膩食唔晒原個蛋糕嘅話,呢款細細件食得晒又有慶祝氣氛。

(左)士多啤梨班戟卷、(右)細細件可以一次試多幾款口味
圖:chanrrachelhkmore_foodie

The Vege Lab 純素甜品師遠赴巴塞隆拿學藝 
近年越嚟越重視健康飲食,唔少人都想搵純素、無麩質蛋糕,其實香港都有唔少呢類健康蛋糕㗎,其中一間就係The Vege Lab,甜品師亦係純素者,曾遠赴巴塞隆拿學法式甜品。蛋糕不含雞蛋、牛奶、牛油或動物成分,對蛋奶敏感嘅話都可以Enjoy 蛋糕喇。好啱夏天食嘅就有「純素呂宋芒青檸慕斯蛋糕」,呂宋芒夠香甜,餡料仲有新鮮芒果蓉、芒果肉同青檸Ganache。

(左)夏天當造呂宋芒「純素呂宋芒青檸慕斯蛋糕」、(右)斯里蘭卡紅茶製作嘅「純素維多利亞伯爵茶蛋糕」
圖:thevegelab @Instagram

Cafe Infiniti CInfiniti C By October 夢幻藍調純素蛋糕
講到純素蛋無麩質蛋糕,當然不得不提Cafe Infiniti C。佢哋嘅店舖走淺藍色歐洲風,平時坐喺度睇吓書、飲咖啡、食件蛋糕相當寫意。但疫情下當然買蛋糕返屋企食最好啦。呢度嘅招牌「蝶豆花伯爵茶蛋糕」同樣用上淺藍色調,貫徹店舖嘅文青氣氛。味道方面則有淡淡茶香,口感鬆軟。

(左)文青淺藍調「蝶豆花伯爵茶蛋糕」、(右)西環分店招牌寶藍色蛋糕「Royal Blue Rose Cake」
圖:infiniti__c @Instagram

生日飯局
好友生日飯局的環境、食物質素、驚喜等因素都很重要,開飯仔集合各類最適合慶生的餐廳,方便飯局搞手。
本月熱門
【隨時更新】零食速報 每周新款零食、酒品點評
7天前
悠閒時光 9月份下午茶推介
2020-09-02
【2020中秋】台式流心奶皇、電車限量版月餅 早鳥優惠及限量預購精選集合 (不斷更新)
2020-08-20
和牛及海膽主題菜單 尖沙咀西京燒専門店夏日新菜式
2020-09-02
飲得嘅抹茶富士山!日式茶室旺角重開 必試抹茶系列、焦糖布甸拿鐵
2020-09-10