各大品牌同便利店成日都出新款零食，就算作為定期會去巡舖、入貨嘅專業零食控，都未必試得到咁多款，有時又會驚中伏而卻步。到底邊款抵買抵食，邊款伏味濃，2021年就等開飯仔繼續行勻便利店、超巿、零食店、啤酒舖等，時不時幫大家留意住最新、最吸引嘅新品，一一試真啲！
10月15日更新
Schoggi Meier網店 - Schoggi Meier可可果朱古力
喺香港自設廠房嘅朱古力品牌，最近推出全新嘅可可果朱古力，未打開包裝盒，已經聞到濃烈嘅果酸。原來係因為呢款新朱古力採用源自玻利維亞嘅可可果，酸味係嚟自果實嘅天然果酸，可以話係可可果真正嘅味道，食落當然都有呢種果酸香，另外都會有朱古力嘅微苦微甜。3款口味喺味道上會再有唔同嘅變化，各有特色。72%可可果黑朱古力就係最原始嘅味道，酸甜平衡有致；64% 橘子可可果黑朱古力加入咗橘子味，微微苦澀中嘅酸度亦有所提升；72% 焦糖可可果黑朱古力則係相對較甜嘅一款。
7-11 - 湖池屋 牛肉清湯味薯片
呢個品牌嘅薯片都有唔少fans，今次使用日本牛肉，加入洋蔥同大蒜等香料，創作出牛肉清湯味薯片，係有啲肉味嘅，薯片口感較食開嘅硬身。
7-11 - 湖池屋 醋味薯片
薯片除咗鹹味之外，重可以有醋酸味？呢款新口味薯片實行衝擊一下大家嘅味覺，不過放心，都係頭幾啖食落嘅醋酸味會比較重，即刻醒一醒神，食食下可能慣咗就覺得味道淡返啲。
7-11 – Wow! For x 阿華田朱古力麥芽窩夫
如果大家有印象，阿華田以前係出過雪糕嘅，仲要幾好食。今次出咗兩款新零食，比利時窩夫呢款嘅華田味較重，食落啖啖蛋香同麥芽可可香味，口感鬆脆，細細塊會食唔停口。
7-11 - 唐舖子 x 阿華田朱古力麥芽吐司
至於另一款零食，係硬脆嘅吐司。呢款就朱古力味較重，甜身少少。不過好就好在係獨立包裝嘅，每次口痕時拆一包仔出嚟食下都OK。兩款華田零食都係由台灣直送呢。
10月5日更新
7-11 - Samlip X Kraft 義式焦糖奶油芝士千層酥
成日都話愈肥嘅嘢愈吸引，呢款傳統意大利小食由108層酥皮烘焙而成，啖啖鬆脆而且滲出微微焦糖同cream cheese嘅香味。好彩佢係獨立包裝，每次拆開一條嚟食罪惡感都冇咁大。
各大便利店及超巿 - 卡樂B甜心薯蕃薯片
街上未有燴蕃薯，不過便利店就有甜心薯蕃薯片啦~ 新版本細細片，但蕃薯味道更加突出，香咗甜咗，唔覺唔覺好快就清晒一包~
各大便利店及超巿 – 日清合味道杯麵 x 新世紀福音戰士
細細個食到大嘅合味道杯麵，原來今年50周年喇，咁梗係要搞下大壇嘢啦~ 最近聯乘日本超人氣動漫《新世紀福音戰士》，推出咗多款特別版包裝杯麵，一套6款包括有碇真嗣、綾波麗、明日香等多個角色，動漫迷要集齊喇。另外，亦有新口味杯麵——鮮蝦豬骨湯味登場，湯底濃稠。
7-11 日本直送沖繩黑糖系列甜品
耐唔耐行下便利店，都會發現有新嘅日本直送甜品。今次輪到沖繩黑糖系列甜品，沖繩黑糖雙層忌廉泡芙，外層一如以往嘅軟熟，而內餡嘅黑糖忌廉都幾重味，好甜。
沖繩海鹽黑糖忌廉千層蛋糕則除咗有濃郁嘅甜味之外，更有陣陣黑糖獨有嘅炭燒味道，甜中帶甘。而沖繩黑糖忌廉瑞士卷口感鬆軟，係3款甜品中，相對冇咁甜嘅一款。
各大便利店及超巿 – 酒鬼花生
喺屋企睇波煲劇點可以唔食下花生先？呢個本地新創品牌就推出兩款口味嘅花生，分別係醇香原味同麻辣味，麻辣味花生打開裡面仲會有辣椒喺裡面，又麻又辣認真過癮！而且係真空包裝，保存花生香脆口感～
9月30日更新
Marketplace、青菓屋 - 西瓜啫喱
呢個西瓜果凍係日本嘅人氣新品，望落勁cute cute，QQ彈彈咁，重要用埋木薯粉做珍珠粒，整到好似真‧西瓜有埋核咁，啫喱就用咗日本西瓜汁加檸檬汁調味，食落唔算話好甜，但就好爽。
青菓屋 - 札幌水果燉蛋蛋糕
另一款日本直送嘅人氣產品，就係札幌水果燉蛋蛋糕啦。分別有白桃味同士多啤梨味，面層有frozen咗嘅生果，味道甜香重好有冰感，下層則係滑捋捋嘅燉蛋蛋糕，啖啖蛋香幾有驚喜，大推介啊。
全線Doughnut門市+TAP +少爺啤網店 - 少爺x Doughnut 超限量粉紅啤酒GLAZED
粉紅色嘅啤酒？係呀，少爺為Doughnut度身訂造咗隻清爽酸啤，粉紅色嘅包裝，粉紅色嘅酒體，充滿住少女心。聞落係好香嘅紅桑莓味，不過飲落就輕身啲，微微酸又有微微乳糖甜咁。
少爺啤網店 - 少爺啤酒 HEA系列 CBG淡愛爾啤酒
走在潮流啄啄嘅大家，都知道而家好興喺飲品中加入CBD，少爺啤更有一系列嘅CBD啤酒。最近呢個系列繼續進化，用埋CBG𠻹啊！CBG比起其他大麻化合物更難取得，同樣都有放鬆減壓嘅作用。新嘅CBG啤酒係隻pale ale嚟，每公升啤酒加入60mg高純度CBG，口感輕盈清爽。
各大便利店及超巿 - 全新無糖可口可樂
鍾意飲可樂又怕肥嘅朋友仔，通常都會揀無糖版。最近佢哋出咗全新嘅無糖可口可樂，唔止轉咗包裝，連味道都有輕輕轉到，口感清爽咗，而且更似原味。但放心，依然都係無糖、無卡路里！
7-11 - Ize CoCo 4款泰式椰子殼造型雪糕
以前去泰國旅行，一定食當地用新鮮水果製作嘅雪糕降溫。不過而家唔使飛，一樣食到有「泰版Haagen Dazs」美譽嘅Ize CoCo雪糕，而且無麩質、無反式脂肪、無膽固醇同無奶類製品，素食者都可以一齊嘆。雪糕質感似雪葩，而4款口味包括用時令水果製作嘅椰子味、芒果味、榴槤味同富當地特色嘅泰式奶茶味：
左：椰子味 ｜ 右：榴槤味
3款水果味道都用鮮果製作，但以椰子味最出色！有解渴感覺之外，重有椰果果肉，亦係4款之中唯一有餡料嘅口味。而榴槤味用金枕頭同青尼榴槤混合製成，打開就聞到明顯嘅榴槤味，但入口冇食果肉咁濃郁，鍾意極濃口味嘅朋友可能覺得差少少。
左：芒果味 ｜ 右：泰式奶茶味
芒果味用泰國盛產嘅水仙芒製作，清甜唔酸，重有微微果香。另外，將當地知名奶茶品牌Cha Tra Mue嘅泰式奶茶變成雪糕後，可能因為溫度比茶飲低好多，甜度同茶味都減低咗。
9月20日更新
各大便利店及超巿 - 雀巢鷹嘜 薑味奶條
今期唔知係咪興將傳統甜品變做雪糕口味，先有由薑汁撞奶變奏而成嘅薑味奶條。食落有微微辛嘅薑味，加埋濃甜嘅煉奶，還原度唔錯，不過係偏甜嘅薑汁撞奶。
7-11 及各大超巿 - 雀巢 法式焦糖燉蛋甜筒
另一款甜品變奏版嘅雪糕就係法式焦糖燉蛋甜筒喇，配上海鹽焦糖醬同朱古力醬，未食都已經可以想像到佢嘅甜度爆表，完全係甜魔之選。
各大便利店及超巿 - DREYER’S 奇異果乳酪條
又怕肥又想食雪糕嘅朋友仔，當然要揀低卡嘢啦~ 呢個系列嘅乳酪條繼士多啤梨、藍莓同芒果熱情果口味後，再出咗新嘅果味呀！奇異果乳酪條加入咗真‧奇異果果蓉，味道清甜微酸，外層乳酪口感幼滑，而且無添加防腐劑同人造色素，食完成支都係94kcal，OK啦。
各大便利店 - 森永 PARM抹茶雪糕批
年中總會有幾款抹茶雪糕推出，呢款選用京都宇治一番茶製成，外層係抹茶朱古力而內係抹茶雪糕，不過食開森永產品嘅都知，口感係幼滑嘅，雖有微甘茶香，但係味道偏甜，奶味略重。
Circle K - 樂天 Ghana 朱古力雪糕批
朱古力控不能不試呢款由韓國引入嘅朱古力雪糕批，真心力推！選用高級可可豆製成，外層有粒粒黑朱古力脆皮，內層係朱古力雪糕，朱古力味係由外到內到返外都咁濃郁，忍唔住食完一啖又一啖，好快就食晒，加埋crunchy嘅口感冇得輸。
9月14日更新
Circle K - 韓國樂天 辣炒芝士年糕雪米糍
辣嘅雪糕會係點？韓國出咗隻新口味雪米糍，以韓國傳統街頭小食辣炒年糕為靈感，變咗做辣炒芝士年糕雪米糍。麻糬皮加入墨西哥辣椒製成，係有少少似年糕嘅真心，入面嘅芝士雪糕都加入咗辣味曲奇碎，但就唔算話好辣，係幾特別嘅，勇士們可試試。
Circle K - 雀巢®KIT KAT® 可可威化抹醬夾心飛碟
呢間便利店一向都有唔少口味嘅飛碟供應，size啱啱好fit晒早餐或者下午茶。最近同Kit Kat聯乘，推出雀巢®KIT KAT® 可可威化抹醬夾心飛碟，內餡係朱古力加威化脆脆，鬆軟得嚟有微脆口感，甜度唔算好高。
9月9日更新
7-11 素食系列
素食朋友仔嘅選擇愈嚟愈多，呢期便利店嘅素食系列又有新嘢出，幾款新品用上唔同嘅植物肉製作。素肉炸醬韓式手卷以OmniPork新豬肉加天然香料調味而成，味道較清淡。
另外有兩款台灣風味嘅飯糰，分別係素肉鬆油條辣榨菜絲台式飯糰，同素鹵肉鹵蛋菜脯台式飯糰，都算做得幾像真，微微鹹香，早餐或lunch食一份啱啱好。而沙嗲素牛肉三文治則選用韓國嘅Unlimeat植物牛肉，以鷹嘴豆、藜麥同小扁豆製嘅素牛肉而成，加入特製沙嗲醬快炒，有淡淡嘅花生香，「肉感」略為扎實。
Market Place、雀巢香港網上商店等 – 雀巢 植物咖啡
呢兩款新口味咖啡，同樣為素食朋友而設。由日本直送嘅植物性即飲咖啡，不含乳製品、低糖，而且含零克反式脂肪同零毫克膽固醇。兩款口味分別係杏仁咖啡同燕麥咖啡，既有咖啡本身香氣之餘，亦有陣陣堅果香。
9月6日更新
7-11、Circle K - 維記椰香雪花糕甜筒
將懷舊甜品椰香雪花糕，製成全新口味嘅甜筒，還原度唔錯。外表極似雲呢拿甜筒，面頭同樣係花生朱古力，但今次裡面係混入椰絲嘅椰香雪糕，味道清甜又有咬口。
Circle K - 維記豆腐及芝麻（黑白）雪米糍
以傳統中式甜品「芝麻糊豆腐花（黑白）」為靈感製成嘅豆腐及芝麻（黑白）雪米糍，今年再度回歸喇。不過由上年嘅迷你裝，變成正常size。用黑芝麻製成嘅煙韌糯米皮包住豆腐雪糕，大大啖咬落去，豆腐味比較香濃突出，但淨係咬糯米皮，就會食到淡淡嘅芝麻味喇。
7-11、Circle K、HKTV Mall - Himalaya岩鹽糖
做運動除咗要補充水分，仲要記得補充鹽份及礦物質呀！呢款岩鹽運動糖就可以幫大家補充80種人體必需礦物質，包括鉀、鎂、鈣、鈉等。仲有最新嘅Extra Cool配方，食落涼浸浸～有檸檬味同薑檸檬味，都係細細包方便帶出街隨時食。
8月18日更新
7-11、百佳、惠康、AEON - LINE FRIENDS X DOLL 旅遊主題即食麵
我哋未有得去旅行，但熊大同朋友仔有喇！Line Friends聯乘Doll出咗兩款旅遊主題即食麵，熊大一時著住和服一時又著住韓服咁，真開心。兩款新味分別係日式柚子胡椒雞白湯味，同韓式泡菜海鮮味。前者胡椒味重，滲有陣陣柚子酸甜甘香；後者味道微辣，不過泡菜就唔多食得出。
各大便利店及超巿 - 卡樂B 和風口味系列薯片
新出嘅兩款口味都係以日式菜嘅味道作參考，日式蔥烏冬味薯片食落又真係幾似隻烏冬湯底味，以京都九条蔥成份製成味粉，青蔥味濃郁；至於蒜香和牛味薯片係用咗日本和牛成份製作而成嘅味粉，但肉味都係略淡，反而香蒜味道就好突出，想像完全係鐵板牛側邊幾片蒜片咁。
官網及門巿 - 星球工坊 草莓牛奶爆谷
爆谷控有冇追住佢哋嘅新味先？最新出嘅呢款爆谷，粉紅包係幾charm嘅。用咗士多啤梨搭配牛奶製成，甜得嚟帶酸，食下一甩食下又一甩，一個唔小心好快就食晒食包。
8月6日更新
各大便利店及超巿 - Haagen Dazs 岩鹽焦糖泡沫咖啡雪糕
有追開哈根大師Barista Collection嘅朋友仔，有新嘢試喇，除咗之前兩款咖啡雪糕同朱古力蛋糕咖啡雪糕之外，而家有最新嘅岩鹽焦糖泡沫咖啡雪糕，都係由巴西咖啡豆製作，有杯裝版亦有雪糕三文治版。岩鹽焦糖醬鹹甜交集，夾埋理所當然甘香濃郁嘅咖啡香味，咩減肥大計都要放埋一邊，食咗先算咯。
7-11及日資超巿 - Haagen Dazs 芳醇咖啡脆皮雪糕三明治
飛唔到日本都有日版雪糕食係幸福嘅。呢款選用來自埃塞俄比亞Yirgacheffe咖啡豆製作，最外層嘅威化片有淡淡咖啡香，包住雪糕嘅係咖啡朱古力脆皮，呢層嘅甜度最高。雪糕則係咖啡牛奶雪糕，甜香中帶有回甘。三層，三種唔同嘅啡香，可以話係三重咖啡享受呀。
百佳 - Ekselence 迷你拿鐵雪糕批
呢個北歐雪糕品牌嘅皇牌產品迷你雪糕批，最近推出全新嘅Latte口味！100%北歐製造， 外層係比利時朱古力脆皮，裡面就係咖啡醬同雪糕。咖啡醬香氣濃郁，不過因為咖啡醬、朱古力同雪糕都有甜味，整體就偏甜咗少少。
百佳、一田、Circle K - Pols 雪糕曲奇
呢個北歐雪糕品牌就推出雪糕曲奇迎接夏天，曲奇當中有朱古力脆片增加口感層次，不過始終都雪過，所以曲奇質地偏腍。中間夾住雲呢拿雪糕，口感幼滑甜度適中，的確幾啱消暑～
7月30日更新
各大便利店及超巿 - 樂事薯片 日式口味系列
前一輪出咗好多港式風味嘅薯片，呢期輪到日式喇！樂事新推出嘅3款口味，都係經常會喺日本料理中食到嘅味道。幾款口味還原度各有高低，當中最似原本菜式嘅味嘅，係神戶厚切牛扒味，鹹香兼備，重食到肉香，blind test應該都試得出。鐵板燒海鮮味都做得幾似，芸芸海鮮味中，以蝦鮮味最突出。豚肉生薑燒味就相對上爭少少，要畀多啲想像力，味道微甜。
7月28日更新
7-11 阿奇儂 鐵觀音奶蓋珍珠奶茶雪條
由手搖飲品變成雪條嘅奶蓋珍珠奶茶味，還原度唔錯。雪條上層係微微鹹香嘅芝士奶蓋，下層係鐵觀音、日本焙茶同紅茶葉混製而成嘅奶茶雪條，微甜而茶味突出，仲有啖啖sharp sharp聲嘅珍珠，係另一種爽。
Circle K - 阿奇儂 鹹蛋黃珍珠雪條
呢款雪條口味夠晒新奇，鹹蛋黃夾珍珠，各自嘅味道都幾突出。除咗加入煉乳中和鹹蛋鹹味，亦用鴨蛋黃同歐洲奶油製成咗奶黃醬淋喺雪糕上，所以食落鹹蛋同奶味都幾重。珍珠則加入黑糖製作，味道稍甜，但兩者夾埋一齊就好似唔太friend了。
Circle K - 丸作食茶 粉紅仙人掌珍珠雪條
粉紅色嘅雪條，係幾夢幻嘅。由飲品店招牌飲料變奏嘅口味，使用台灣澎湖仙人掌原汁，造出粉紅虎紋效果，好啱打卡。珍珠則係飲品店嘅白玉珍珠，酸甜煙韌。
各大便利店及超巿 - 雀巢MEGA 海鹽焦糖雪糕批
海盬焦糖呢個鹹鹹甜甜嘅配搭，收埋收埋唔少粉絲。今次呢款新雪條，外層係朱古力脆皮，內層以牛奶雪糕做基底，混入海盬焦糖醬，口感唔錯，不過略嫌奶味偏重，如果本身為咗焦糖甜而試嘅朋友仔，可能會微微失望。
各大便利店及超巿 - 雀巢 Drumstick
講真，味就唔係新嘅，都係大家細細個已經開始食嘅口味，但就請嚟活力十足嘅ANSONBEAN，以唔同造型為甜筒形象定格，推出全新包裝。根據官方介紹，雲呢嗱味係帥氣文青嘅代表；朱古力味展現硬朗型格；芒果味散發熱情活力，同埋香芋味滲透種率性不羈喎，各位粉絲飯團就自行參透下喇。
7月20日更新
各大超巿 – MÖVENPICK 全新口味
呢個瑞士雪糕品牌一向有保證，今次3款全新口味都幾高汁。最推介嘅係朱古力榛子碎雪糕，以瑞士朱古力雪糕味做基底，加入咗榛子醬同榛子碎，雙重榛子感受香甜濃郁，啖啖nuts仲好有口感。
熱情果芒果及忌廉雪糕就最有夏日色彩，選用意大利奶凍味雪糕，加入熱情果芒果雪葩，無論係果香定酸度都十足，夠晒清爽。
反而瑞士蜂蜜杏仁雪糕就未必個個啱食，事關佢雖然基底係雲呢嗱味雪糕，但加入咗栗子蜂蜜同焦糖杏仁碎後，杏仁嘅味道出奇地突出，奶味亦濃厚，鍾意嘅會好鍾意，但如果平時唔太好杏仁糊杏仁茶杏仁露嘅朋友仔就都係試返上面兩隻味啦。
各大超巿 - DREYER’S 海鹽焦糖花生味雪糕
一家人一齊食雪糕就最開心，可以買大大盒家庭裝share。新口味海鹽焦糖花生味雪糕，以奶香味重嘅雲呢嗱味雪糕做底，加入海鹽焦糖醬同撒入花生粒，不過雖然咬到好多花生粒粒，但花生味都係略為淡，畀雲呢嗱嘅甜味蓋過咗。
7月13日更新
7-11 - 福源 花生醬麻糬
好耐都冇飛過台灣？忍多陣啦，台灣嘅人氣手信有飛過嚟香港嘛。最近喺便利店發現到3款選用福源花生醬製作嘅零食，花生醬控們，出動！3款最值得推介嘅可以話係花生醬麻糬，外皮軟滑煙韌，內餡嘅花生醬香甜得嚟，仲有粒粒花生碎，係會忍唔住想不停再食。
7-11 - 福源 花生醬雪花餅
方方正正嘅雪花餅，外層係甜身嘅棉花糖，包住花生醬餅喺中間，口感既柔軟又酥脆，層次多變，但花生醬味冇想像中咁濃郁，時香時淡。
7-11 - 福源 水滴型蛋捲
而呢個由「新竹福源」同「雪之戀」聯乘嘅蛋捲，形狀就相當特別，大大粒水滴咁。咬落香脆嘅，但如果一心想食到花生醬香味嘅話就可能有少少失望，比蛋香搶咗少少風頭，花生醬味較淡啊。
7月9日更新
GODIVA專門店、7-11 – GODIVA 黑朱古力軟心雪條
一見到呢3條盛夏限定口味，應該好多人都變咗心心眼喇。檸茶、伯爵茶同夏威夷果仁味三款都喺黑朱古力嘅外層上分別加入夏威夷果仁或杏仁碎同朱古力脆片，一嚟中和咗少少甜度，二嚟增加咗香脆嘅口感。檸茶味幾有驚喜，選用清新檸檬同錫蘭紅茶配搭朱古力，係三款中最清爽嘅一款。伯爵茶味則帶有醇醇茶香，甜度適中。
各大便利店及超巿 - 雀巢 希臘式乳酪
呢個牌子三款希臘式乳酪都係香港新鮮製造，而且不含防腐劑。有原味、士多啤梨味同藍莓味，後兩款加入新鮮果肉，味道更清新。乳酪口感厚滑豐盈，味道微酸好啱夏天食。
7-11 - KOJIMAYA 微熱山丘土鳳梨雪糕
呢個由日本人開設嘅香港雪糕品牌同台灣知名品牌微熱山丘合作，土鳳梨雪糕選用100%微熱山丘嘅台灣土鳯梨果肉同果汁，咬落唔單止保留咗台灣土鳳梨嘅獨特香氣，仲咬到一絲絲果肉好有驚喜！味道酸甜自然。
7-11 - KOJIMAYA 微熱山丘D24榴槤雪糕
呢杯就係同台灣微熱山丘嘅旗下品牌FORBIDDEN合作，精選馬來西亞D24榴槤製作而成。榴槤控可能會有少少失望，畢竟雪凍咗做雪糕香味無咁濃郁，勝在榴槤味道自然食得出唔係香精味，而且口感幼滑。
7月6日更新
惠康 - 珍珍 泰式辣魷魚味薯片
珍珍新出嘅泰式辣魷魚味薯片，淨係得惠康獨家發售咋。食落又真係有燒魷魚嗰陣嘅炭燒香，同埋醬油甜味，加少少想像都有啲feel嘅，而且食食下，會慢慢辣返出嚟，後勁不俗。
百佳、Fusion、Taste - 珍珍 麻婆豆腐味薯片
珍珍另一隻口味，麻婆豆腐呢就係百佳嗰啲超巿先有得賣。以多重香料製作嘅豆瓣醬，加入花椒粉同辣椒粉調配，椒香味突出，但冇想像中咁辣，不過就帶有麻香，辣得幾有層次嘅。
7-11 - Nature Valley軟烘燕麥餅
平時食開佢嘅energy bar，最近有新系列推出，軟烘燕麥餅同樣都係以天然全穀燕麥製作，作為零食嚟講相對上叫做健康啲。兩隻口味分別係肉桂同花生醬味，前者香軟微甜，後者花生醬味較淡。
7-11 - Mrs Fields 曲奇
多數喺港鐵站經過都會聞到勁香嘅曲奇餅店，而家喺便利店都買得到佢哋嘅曲奇啦。三款口味包括牛奶朱古力碎曲奇、奶油軟糖布朗尼曲奇同白朱古力果仁曲奇。三款口感都鬆軟，而且甜度甚高，當中以白朱古力嗰隻就最高。開袋即食當然方便，但想好食啲嘅，建議可放入微波爐叮廿零三十秒，帶住少少微溫食就更享受。
6月29日更新
各大超巿 - 雀巢牛奶公司 舊香港限量版雪條
時下興懷舊，紅豆樂、脆皮樂（香芋、雲呢嗱味）同旺寶呢4款雪糕本身已經盛載住好多童年回憶，最近仲要聯乘本地插畫家麥震東，推出舊香港限量版包裝，以幾個舊時香港嘅場景做主題，無論係雪糕叔叔定士多、遊樂場定屋邨，都有種似曾相識嘅感覺。新一代嘅小朋友未必識喇，就襯住呢個懷舊版，畀佢哋睇下舊香港係點啦~
Circle K - 少爺啤酒x譚仔三哥 湯底啤酒
湯底味嘅啤酒到底會係點？一向idea多多嘅少爺啤，最近同三哥合作，推出咗兩款以三哥湯底為靈感嘅精釀啤酒。黑罐嘅煳辣‧黑啤顧名思義就係參考煳辣湯底創作，釀造時加入煙薰辣椒，既有stout應有嘅烘烤麥芽嘅焦香，亦有微微辣感喺喉嚨回返出嚟，尾韻甘甜。至於紅罐嘅麻辣‧酸啤係款德國Gose啤，呢種類型嘅啤酒通常味道較強烈，鹹鹹酸酸，不過未必個個都接受到。今次以招牌麻辣湯底為靈感，以乳酸菌發酵，將gose嘅精神完美發揮，鹹酸度得宜，既有辛香感覺，亦有清爽快感，值得一試。
各大便利店及超巿 - 雀巢咖啡 少甜罐裝咖啡
而家好多時飲嘢都會揀無糖或少甜，雀巢咖啡都出咗少甜系列呀。由歐洲直接進口嘅兩款少甜低脂口味包括醇滑牛奶咖啡（Flat White）同鹽香焦糖咖啡（Salted Caramel）。前者口感醇滑，淡淡奶香，微微甜但咖啡味唔多重。
百佳、屈臣巿 - Watson’s X-Soda系列
兩款新出嘅蘇打水，以cocktails口味為零感創作，重點係零糖零脂零卡路里嘛，清爽得嚟又輕盈，唔使怕肥。椰林飄香酒精風味蘇打水加入白朗姆酒，味道清甜，酒精只係0.4%；而荔枝馬天尼酒精風味蘇打水就混入Gin酒，飲落有淡淡嘅果香。
百佳 - KOJIMAYA PUI PUI天竺鼠車車雪糕
呢個由日本人喺香港創辦嘅雪糕品牌，同之前大熱嘅《PUI PUI 天竺鼠車車》聯乘，推出五款唔同口味嘅雪糕！每杯都印上其中一個天竺鼠車車主角，雪糕口味都有襯返天竺鼠車車嘅性格，例如性格隨和嘅POTATO就係雲呢拿雪糕。另外仲有焦糖餅、忌廉芝士、朱古力同士多啤梨口味。雪糕口感柔滑，甜度適中。
各大便利店及超市 - 維他 新鮮茶系列
夏日炎炎想隨手就飲到冰凍新鮮茶？呢個品牌最近就推出新鮮茶系列，有檸檬茶、金萱烏龍茶、蜂蜜綠茶同日式煎茶四款口味，全部都係低糖或者無糖配方，嚴選高品質茶葉，喺香港廠房以冷泡方式新鮮沖泡，無添加色素或防腐劑。檸檬茶甜度的確比坊間嘅低，飲到檸檬清香。
各大便利店及超市 - 維他奶 VitaOat燕麥奶
最近多咗人飲燕麥奶嚟取代牛奶，呢個品牌就推出全新嘅燕麥奶飲品，源自100%燕麥，無乳糖而且零膽固醇！低糖配方加上係純素，健康無負擔之餘，飲落口感柔滑仲有淡淡燕麥香。溫馨提示，飲之前記得要搖勻呀。
6月17日更新
百佳 - 日清 杯裝厚切薯片
今次係品牌首次推出杯裝厚切薯片，厚度真心有返咁上下，厚得嚟依然脆身，薯味亦更濃。兩款口味包括有黃金牛油味同焦糖味，前者牛油味濃郁，後者甜中帶鹹。
各大便利店及超巿 - 品客薯片 美式烤肋排味+濃泰式生菜碎肉味
細細筒嘅美式烤肋排味薯片，既有肉香亦有陣陣蕃茄味，可以話係酸甜鹹味集一身；而生菜碎肉味又真係幾有泰式風味，放入口初段感覺清新，差唔多食完嘅時候就會feel到後勁嘅微辣滲出嚟。
各大便利店及超巿 - 卡樂B 意式雜菜湯味+德國香腸味薯片
食薯片味遊歐洲又誇張咗少少，但卡樂B最近出咗兩款歐洲國家主題嘅口味，意式雜菜湯味鹹甜並存，混入多款菜蔬嘅味道，當中以蕃茄味較香；德國香腸味就偏重喺個醬汁，即係芥末醬味多啲，細嗒嗒真啲都會食到微微肉香嘅。
City’super、Sogo - 雙人徐 蝦酥酸辣寬粉
台灣人氣品牌最新推出嘅香港獨家口味，蝦酥酸辣寬粉最啱一眾酸辣粉fans去試。湯底以品牌三代傳承秘方製作，酸辣度適中，而且比一般嘅少油。寬粉煮得愈耐就愈軟身，建議煮5-10分鐘就最理想，索汁力高。而蝦酥則利用低溫真空技術處理白蝦，以低於120度慢炸，口感酥香仲有淡淡鮮味。
星球工坊、誠品太古台灣古早市集- 星球工坊 甘梅地瓜爆谷
品牌每年都會推出一款台式風味嘅爆谷，今年就輪到甘梅地瓜喇。將原味爆谷高溫爆炒之後，混搭瓜瓜園台農57號地瓜粉，再撒埋嘉義梅山半熟青梅調味。爆谷香脆，味道酸酸甜甜，初初食到酸嘅爆谷係有少少唔慣，食食下又覺得幾過癮。
各大便利店及超巿 - 好侍通加利粟米筒 海鹽雲呢嗱味
細細個最鍾意插喺手指扮巫婆嘅粟米筒，最新口味有海鹽雲呢嗱味，打開包裝就聞到好大陣甜味。食落還好，鹹味先出，甜味後上，亦冇聞落嘅咁甜。
759阿信屋 - 日清 焦糖果仁穀物麥片
唔少人都鍾意以穀物麥片配牛奶或者豆奶，有啲咬口得嚟又冇咁寡。繼抹茶、士多啤梨等口味之後，品牌再推新口味：焦糖果仁穀物麥片。一倒出嚟已經有濃甜嘅味道撲鼻，不過幸好中間混埋有香脆腰果、杏仁、南瓜籽等，即使整體感覺都係偏甜，但都未至於甜膩。
6月4日更新
各大便利店及超巿 - DREYER'S 士多啤梨脆皮芝士味北海道牛乳雪糕批
DREYER'S最近頻頻出新味，呢條一啖食到好多種味。首先外層脆皮，係士多啤梨白朱古力，仲有粒粒士多啤梨乾果肉粒，酸酸甜甜；入面係兩色雪糕，黃色嗰邊係鹹鹹地嘅芝士味，白色嗰邊則係北海道牛乳味，不過奶香味相對就較淡喇，有少少畀其他味蓋過咗。
Circle K - Skippy 花生朱古力冬甩雪糕
Skippy花生醬一向有唔少捧場客，過往亦出過幾款雪糕都大受好評。今次呢款冬甩造型嘅雪糕，相信同樣能獲取粉絲們嘅芳心。由韓國直送，外層脆皮係特濃花生朱古力，有粒粒花生碎咬到，入面係Skippy花生醬雪糕，味道都幾香濃。食完可能會問，可唔可以食多一甩呀OMG。
7-11、百佳、惠康 - DREYER'S 三色北海道牛乳扭紋脆筒系列
兩款新出嘅三色雪糕，都係以日本風味為主題，分別係靜岡焙茶北海道牛乳扭紋脆筒，同士多啤梨北海道牛乳扭紋脆筒。前者以靜岡產焙茶製成，帶有微微烘焙炭香，青綠色嘅甜筒係抹茶味，由頭到尾由外到內，啖啖都係茶香；後者使用士多啤梨雪糕味道酸甜中帶奶香，脆筒係經典朱古力味。
7-select - 玫瑰味慕絲富士山造型蛋糕
粉藍色富士山蛋糕造型吸睛，不過雖然係粉藍色，但原來係玫瑰味呢。外層係啖啖玫瑰花香嘅慕絲，口感軟滑，食到中間，仲有流流地心嘅玫瑰花瓣醬，花香味相當突出下。
6月3日更新
台灣最近又爆疫，以前近近地一個weekend就飛得，而家好似遙遙無期咁。有大型超巿就由即日起，至6月16日期間，舉辦「尋味台灣︰舊滋新味」活動，為大家帶嚟各種懷念嘅味道同新品！以下係其中幾樣精選介紹返。
City’super - 段純貞 經典紅燒牛肉麵
嚟香港開咗幾間分店嘅段純貞牛肉麵，儲落咗唔少粉絲。今次即食包有經典紅燒牛肉麵，簡單加熱就可以喺屋企都食到。湯頭以牛大骨搭配四川陴縣豆瓣酒釀同23種中藥材熬煮而成，麻辣甘甜，係大眾所能接受嘅辣度。傳統細麵掛湯力高，口感偏軟腍；而牛肉都畀足秤，兩大嚿牛腱心，嚼勁十足。
City’super - 星球工坊 秘傳老火湯味爆谷
呢個品牌嘅爆谷一向口味多多而又有驚喜，今次同「這一鍋皇室秘藏鍋物」合作，將台式火鍋嘅湯底變做爆谷，一樣冇難度。其中一款就係秘傳老火湯味，又做得幾似喎。入口有陣陣藥膳甘香，仲有些微胡椒香氣，味道濃郁，值得一試。
City’super - Simple Kaffa 掛耳式濾泡咖啡
咖啡控留意喇，呢個台灣咖啡品牌嘅共同創辦人大有來頭，係前台灣及世界咖啡師冠軍吳則霖呢。未能親身去到佢哋喺台灣嘅咖啡店朝聖前，可以先試試掛耳式濾泡咖啡。一盒有三隻口味，包括「阿寶綜合」、「巫里/水洗」同「極光莊園藝妓/日曬」，極光莊園藝妓中等body，帶白花香，酸酸甜甜 。
City’super - 員林仙草甘茶
仙草係台灣嘅傳統小食，呢款仙草甘茶係以100%純天然台灣仙草同百年古法熬製，即開即飲又得，加熱或雪凍飲都得，各有風味，陣陣甘香，而且仲選用減糖配方添。
6月1日更新
City’super - Ooh麻辣薯片、麻辣蝦片
各位麻辣控attention！唔好錯過咗呢款嚟自新加坡首個麻辣零食品牌嘅薯片同蝦片，前前後後試過咁多款麻辣零食，呢款真心值得encore。以乾辣椒、花椒、茴香等傳統香料製成，麻辣程度同麻辣火鍋有得揮，薄切嘅薯片撒滿麻辣香料，入口極速就嚟料，啖啖都有麻痺感，後勁重好凌厲。而佢嘅蝦片冇薯片咁麻辣，但強度依然比一般嘅麻辣零食勁，而且，喺刺激嘅麻辣味中，滲有陣陣蝦鮮香味，辣得嚟又唔捨得停口。
City’super - Irvins辣味鹹蛋蝦卷
同樣嚟自新加坡嘅零食，Irvins嘅鹹蛋薯片大家應該都好熟悉，今次新出嘅係辣味鹹蛋蝦卷，一條條大約手指咁粗嘅蝦卷，入面包住包著香辣蝦米，仲撒上鹹蛋碎，閃一閃過嘅辣勁中帶有微微鹹香。
各大便利店及超巿 - 樂事Lays 瑞士芝士、香酥雞腿味薯片
見到有瑞士芝士味嘅薯片，芝士控可能即刻會好想試，不過要先有心理準備，呢隻嘅芝士味唔算好濃郁，淡淡然嘅鹹香咁啦。反而香酥雞腿味波浪薯片有啲驚喜，波浪紋令到口感更脆身，味粉食落又真係有啲似炸雞髀嘅。
7-11 - 卡樂B SEABROOK 炸魚薯條、喼汁味薯片
嚟自英國嘅薯片，口味相當特別。Fish and chips都還好，但喼汁……一方面又會好好奇想試，但另一方面又好驚會伏。唔使驚，開飯仔即刻同大家試。一大包薯片拆開入面，原來係有6包細包裝。兩款都係波浪紋薄切嘅薯片，炸魚薯條味嗒真啲，係有微微魚鮮香嘅；至於喼汁，哈哈，強勁嘅酸澀味，食到要瞇一瞇眼，都係一個有趣嘅經驗嚟嘅。
5月28日更新
各大便利店及超巿 - 樂事Lay’s 九州紫菜味薯片
呢款紫菜味薯片試得過呀，每塊薯片都沾上以低溫岩燒嘅海苔細粉，脆卜卜，紫菜味夠晒香口。5粒星滿分嚟講佢至少有4粒。
各大便利店及超巿 - 品客 紫菜味嘅薯片
無獨有偶，薯片叔叔都新出咗兩款紫菜味嘅薯片：濃厚灸燒海苔、濃厚勁辣海苔。一拎出嚟成塊都係密密麻麻佈滿海苔粉嘅樣，原來喺製作時已經將海苔粉搓入麵粉糰，倒模印製做薯片後又再沾過第二層海苔粉，怪唔得食落有陣陣燻香海苔香味。至於「勁辣」嗰款，唔好畀個名嚇親，唔係好辣架咋，好輕微喺喉嚨度辣一辣咁。
5月26日更新
7-11 - SMORE烤棉花糖撻
掛住日本嘅朋友仔，便利店又有日本手信返貨喇！S'MORE 烤棉花糖撻，雖然只係得原味，但都夠晒止癮。撻皮酥脆，有層朱古力上面再放埋棉花糖，開封就咁即食當然冇問題，但更推薦嘅食法係開封後，可以放入微波爐加熱5秒。咁嘅話，成個撻除咗變得暖暖地之外，棉花糖仲拉到絲，係邪惡架喇，so what？！好食啲、甜啲嘛。
各大便利店及超巿 - OREO 春季限定口味
望住呢兩款新出嘅包裝，有冇一絲諗起日本？而且冇食開嘅Oreo咁甜啊。如果係粉絲嘅話可能會記得上年出咗隻櫻花抹茶味，今年就轉咗做櫻花草莓味，有用到真‧士多啤梨製作，甜得嚟帶莓酸；至於以竹林為靈感嘅酸甜青梅味，係史上第一款綠色嘅Oreo呢，對比下酸味較重。
各大便利店及超巿 - 可口可樂咖啡汽水
「汽水樽裡的咖啡」唔再只係一首歌，可口可樂真係推出咗咖啡味！以純正巴西咖啡豆調製，無糖兼零卡路里，唔使怕肥仔。兩款口味包括焦糖味同朱古力味，後者可樂味依然突出，滲有陣陣烘焙咖啡豆香，朱古力味就相對淡身少少，唔係太飲得出。
7-11 - 珍寶珠 碳酸汽水系列
珍寶珠出咗碳酸汽水系列，唔再係傳統成粒圓波波咁樣，變咗做一杯杯汽水，造型可愛。味道包括熱帶特飲、可樂味同橙汁味，啜住嚟「飲」嘅汽水，味道像真，連有汽嘅感覺都有！
5月14日更新
7-11 - 7-SELECT x伊藤久右衛門抹茶甜品系列
喺便利店搵甜品唔再係去日本先有嘅專利，香港都得。7仔最近聯乘嚟自京都宇治，專營宇治抹茶業務嘅伊藤久右衛門，再度推出以宇治抹茶為主題嘅甜品！全部都係由日本直送。
宇治抹茶忌廉瑞士卷
採用100%日本麵粉製成嘅瑞士卷，口感軟滑，淡淡抹茶香。早餐或者下午茶食一條都唔錯。
宇治抹茶千層蛋糕
平價版嘅抹茶千層蛋糕，抹茶忌廉同可麗餅皮層層相間，輕輕帶出茶香，係啲餅皮略嫌厚咗少少，影響咗口感。
宇治抹茶忌廉
泡芙口感軟熟，入面嘅抹茶忌廉以獨家配方製成，甘香濃郁，係咁多款抹茶甜品中最出色嘅一款。
宇治抹茶忌廉紅豆瑞士卷
呢個卷蛋嘅抹茶蛋糕都鬆軟嘅，中間夾住嘅宇治抹茶忌廉亦算軟滑，甜甜地好creamy，面頭再加咗幾粒紅豆做點綴，不過如果多多幾粒會開心啲。
宇治抹茶蜜瓜包
選用伊藤久右衛門宇治抹茶粉同日本麵粉製作嘅蜜瓜包，以日式烘焙技術製成，曲奇皮層微甜，但抹茶味就唔算突出。
5月3日更新
各大便利店及超巿 - Lays 地道口味系列
呢期啲薯片，咁啱大家都係吹緊港風，兩大品牌推出嘅新口味，都係香港嘅地道味道。好多人去大排檔或者酒樓都鍾意叫嘅椒鹽鮮魷，就係其中一款。大波浪形嘅薯片，零舍脆口，而且椒鹽味夠晒濃香惹味，直情好似真係食緊道小炒咁。至於另一款係咖喱牛腩味，一打開包裝，已經聞到好濃郁嘅咖喱味，入口一樣濃味。兩款嘅辣勁都唔可以睇少，會喺喉嚨度慢慢辣返出嚟呢。
各大便利店及超巿 - 卡樂B 香港地道口味系列
去茶記食沙嗲牛肉麵就多，變咗做薯片又會係咩味？V-Cut形嘅薯片，香脆嘅，但可惜同想像中嘅沙嗲牛味有些少差距，你會食到微微肉香，好似有少少花生味……而瑞士雞翼味則係熟悉嘅甜醬汁味道，二者比較下會推介呢款多啲。還原度最高嘅係生炒排骨味粟一燒，酸酸甜甜。
4月30日更新
各大便利店及超巿 - 日清湖池屋 土匪雞翼/麻辣豬耳味薯片
好多人都係譚仔同三哥粉絲，日清湖池屋繼早前同佢哋聯乘合作，出過兩款湯底口味嘅薯片之後，最近又有新合作啦，輪到經典小食口味。幾乎係每次必食嘅土匪雞翼變咗做薯片，孜然香味依然冇減過，食到陣陣秘製香料味道；至於麻辣豬耳味，則以三小辣做指標，初初食嗰陣覺得辣感好輕微，不過食食下發現餘韻都幾長。
寬巷子 即食麻辣鴨血
每次食台式火鍋，麻辣湯底入面嘅鴨血都係精髓，總係加完再加。呢間台式火鍋店最近新推即食麻辣鴨血，等大家喺屋企都可以一解心癮。加入燈籠椒、紅花椒、綠花椒、朝天椒等炮製湯底，倒入鍋滾又得，放入微波爐加熱即食都得，夠晒方便。不過麻辣香味較淡，平時想食但又怕辣嘅朋友仔就好啱，但就可能未必滿足到食得好辣嘅朋友仔喇。
Le Fromage by Ma 手工純素芝士
純素、生機飲食成為近期飲食界嘅熱潮，有間新開業嘅手工純素芝士專門店，有超過廿款不含任何奶製品嘅純素芝士選擇，包括煙燻車打芝士、素卡芒貝爾芝士、粉紅胡椒布里芝士、竹炭芝麻海鹽芝士等，口感各有不同，有啲軟綿啲，有啲滑身啲，用嚟配襯生酮麵包或者餅乾都幾唔錯。另外推介佢哋嘅罐裝芝士醬，軟滑香口。
4月20日更新
Circle K - 珍珍薯片 青花椒味薯片 X 少爺啤酒 青花椒味啤酒「麻麻地」
薯片同啤酒一向都係絕配，兩大本地品牌，珍珍薯片同少爺啤酒一拍即合，齊齊最新推出青花椒味嘅啤酒同薯片！青花椒味嘅薯片，除咗微辣之外仲帶有檸檬花香，不過重點當然係「麻」啦，後勁十足，食完一陣條脷都重係麻麻地。呢個時候，再飲多啖用上新鮮青花椒釀製嘅青花椒味啤酒，嗰陣麻嘅後勁就更加刺激過癮。而呢款精釀啤酒本身口感好清爽，一啲都唔係「麻麻地」啊。
百佳超級市場、FUSION、TASTE - 珍珍薯片 黑松露味薯片
所有加入松露嘅食物，都會即刻變得香咗。薯片當然都唔例外啦，每塊薯片都沾滿咗黑松露味嘅調味粉，無論聞定食都有淡淡嘅香味。
Magi Planet(網店+實體店) - 星球工坊 青花椒麻爆谷
香港人鍾意食麻辣嘢，就連零食都愈出愈多麻辣口味。無獨有偶，呢間人氣爆谷店最新嘅爆谷口味都係青花椒麻味！佢哋選用四川九葉青花椒，再配搭椒麻粉、辣椒粉等同爆谷一齊炒香，陣陣麻香迅速就喺口中爆發，收尾有少少甜香，而佢嘅麻痺感留得都幾耐下。
各大便利店及超巿 - Haagen Dazs 果漾脆皮雪糕批系列
各位哈根大師嘅粉絲，又有新味要試啦，佢哋呢排出咗咁多款，唔知你哋食唔食得切呢？今次係果漾脆皮雪糕批系列，全部嘅脆皮都係粉紅色，就咁睇完全估唔到竟然係芒果同哈蜜瓜口味！芒果脆皮雪糕批外層有粒粒士多啤梨粒，雪糕混合埋熱帶芒果果粒同果蓉，酸甜有致；哈密瓜脆皮雪糕批嘅外層則係紅桑子味，哈蜜瓜雪糕有清甜嘅果香；而最清新嘅就係紅桑子脆皮雪糕批，外層有真‧紅桑子乾果肉粒，入面嘅雪糕亦混入紅桑子果醬，由外到內到返外都係陣陣酸感。
4月12日更新
各大便利店及超巿 - DREYER’S 粟米脆皮北海道牛乳雪糕批
今次呢款雪糕有啲新意同驚喜呀，靈感嚟自日本街頭嘅粟米濃湯。粟米脆皮北海道牛乳雪糕批，淡黃色嘅外層係白朱古力脆皮配粟米粒，又甜又脆。入面係雙色雪糕，分別係北海道牛乳雪糕同粟米味雪糕，粟米味夠香甜啊。
各大便利店及超巿 - 卡樂B 「重口味」版人氣口味
燒烤、Pizza同熱浪三款口味，一向都係卡樂B嘅人氣王，而家呢3款口味都推出咗「重口味」版本呀，加重咗料，比往時食開嘅味道更濃郁。熱浪嗰隻重用埋V-cut厚切薯片，愈食愈辣，忠粉必試。而香辣蕃茄味蝦條則係期間限定口味，酸酸甜甜，又有微微辛辣。
各大便利店及超巿 - Oreo 一口威化
Oreo又有新搞作，推出一口威化，一啖一粒。兩款口味分別係雲呢嗱牛奶同榛子朱古力，夾心鬆脆，又冇平時啲oreo咁甜，不過前者嘅奶味略為重咗少少。
各大便利店及超巿 - BE-KIND 乳酪堅果棒
成日都口痕想食零食嘅，最好梗係搵啲健康啲啲嘅零食啦。呢款堅果棒唔錯，高纖又飽肚。兩款新口味有車厘子奇亞籽同蔓越莓玫瑰乳酪堅果棒，都係以52%堅果融合法國乳酪粉嘅白朱古力，加埋蜂蜜製作，甜中帶微酸。
4月1日更新
銅鑼灣Pop up店、city'super、LOG-ON、TASTE - Chocolatory® 朱古力
以前每次去日本，都好鍾意喺機場買唔同嘅KITKAT口味做手信，特別係高級系列嘅Chocolatory® 朱古力。估唔到而家飛唔到過去，但啲朱古力就飛咗過嚟，首次喺香港開pop up店呀，開心~ 仲帶嚟4大系列共14款口味。
「Origin系列」係使用喺火山島上培植嘅稀有可可豆，包括有瓦努阿圖馬拉庫拉島火山、巴布亞新畿內亞卡爾卡爾島火山、菲律賓棉蘭老島火山朱古力，有啲酸辣甘苦，有啲帶有清新果香。「Combination系列」則係combine咗朱古力同水果或者茶葉，6款味道包括柚子味、熱情果味、黑加侖子味、覆盆子味、士多啤梨味同抹茶味。特別推介柚子同熱情果味啊，酸度強勁，刺激味蕾。
「Type系列」就有甘苦朱古力、牛奶朱古力、紅寶石朱古力同白朱古力4款，其中紅寶石嗰款係嘅粉紅色，係提煉自天然可可豆，有種高貴嘅感覺，食落莓果酸香味重。最後就係「Process系列」，使用比平時更低溫嘅烘培方式嚟烘烤可可，將可可豆原生嘅自然風味完全咁散發出嚟，甘苦度高但可可豆香極濃。
Pop Up店詳情
地址： 香港銅鑼灣恩平道54號
期間限定：即日至5月2日
各大便利店+超巿 - 樂事 泰式風味系列薯片
好多人都鍾意嘅Lay薯片，最新出咗4隻泰式風味，都係由泰菜演變而成嘅。泰國常見嘅香料羅勒，配埋波浪形，製成甜羅勒味波浪薯片；泰國東北火鍋味薯片就扮住打泰式邊爐先啦：泰式海鹽牛油蒜香薯片微鹹鮮香，蒜蓉味重；泰式香辣青檸味薯片就最有泰國風味，香辣酸甜都齊晒，層次豐富。
各大便利店+超巿 - 麒麟一番搾 櫻花季節版啤酒
今年去唔到日本賞櫻，飲住櫻花罐嘅啤酒先啦！呢個日本熱賣啤酒品牌最近換上櫻花罐身，啤酒就依然泡沫豐盈，味道清爽順口好易飲。而且仲可以換購一系列櫻花主題禮品，包括和風櫻花啤酒杯（19/3超級市場有售指定套裝）、和風櫻花玻璃樽（31/3至13/4於7-Eleven便利店購買麒麟啤酒滿$25或以上加HK$16換購），同和風櫻花毛巾（1/4至14/4於Circle-K便利店購買麒麟啤酒滿$25或以上加HK$16換購）！
Pret A Manger - 有機咖啡系列
Pret最近引入全新有機咖啡系列，精選產自秘魯、洪都拉斯、蘇門答臘及埃塞俄比亞嘅咖啡豆拼配而成。想自己沖嘅話可以買佢哋嘅咖啡豆同研磨咖啡，例如有機經典研磨咖啡嘅風味平衡，可以同時品嘗到堅果香同少少果酸味，帶焦糖同朱古力嘅苦甜香。各間分店亦有多款咖啡飲品供應。
3月26日更新
7-11 - 珍珍 北京填鴨味薯片
珍珍近年推出咗多款中菜口味嘅薯片，最新嘅有紫色sharp醒包裝嘅北京填鴨味。用自家製甜麵醬，加特有秘方，整出嚟又的確係有啲似填鴨醬味，甜甜地。
各大便利店及超巿 - 卡樂B 大人版帆立貝牛油味薯片
一打開包裝就聞到好勁嘅牛油味啦，食落鹹香之中，又帶有淡淡嘅鮮味，一塊一塊好快就食晒。
各大便利店及超巿 -卡樂B 朱古力海鹽焦糖味薯片
薯片加朱古力，兩樣都係邪惡嘅零食，平時夜晚睇波或者口痕，總係唔少得呢兩樣。而家佢哋合體啦，仲加埋海鹽焦糖做隊友，啖啖都超香甜。
7-11 Perrier x 村上隆 法國巴黎純天然有氣礦泉水
香港應該都有唔少村上隆嘅fans，佢哋今次聯乘Perrier推出特別版花花罐裝，激靚呀！而且只係$14，門檻咁低，粉絲要買多幾罐好好收藏喇！
各大便利店及超巿 - NESCAFÉ 招財貓限定版香滑咖啡
儲罐迷又可以有新目標啦~ NESCAFÉ®同日本京都知名設計品牌SOU・SOU合作，推出咗一系列共8款嘅招財貓限定版香滑罐裝咖啡，以唔同日常場景為靈感，例如有學生有打工仔有電競達人等，實行為各行各業嘅朋友仔打打氣！同時仲推出咗多款限量生活小物，包括收納式環保袋、雨傘、洗面毛巾同隨身袋等，全部都好cute cute！
3月22日更新
各大便利店+超巿 - Haagen Dazs – Cocktail Collection
哈根大師真係好勤力，成日都出新味，最新嘅有三款夏日特調雞尾酒口味，包括Lime Mojito 雪菓、Pina Colada 雪糕同埋Strawberry Daiquiri脆皮雪糕批。放心，唔使怕醉，三款都係加咗冧酒嘅，酒精少過1%。Lime Mojito雪菓採用墨西哥同巴西嘅青檸，加入薄荷醬，酸甜清新，係幾似Mojito呀真係。Piña Colada雪糕就當然係椰子同菠蘿啦，有驚喜呀呢杯，用埋椰肉製成椰絲灑喺面，增加口感。Strawberry Daiquiri脆皮雪糕批除咗有士多啤梨之外，仲加入咗青檸汁同白冧酒，外層嘅士多啤梨白朱古力脆皮係重點，夠晒甜啊。
7-11 - Green Common 純素冰凍甜點
主力推廣素食嘅Green Common，最近連雪糕都出埋！無奶冰凍甜點系列採用 100%純植物奶製成，以椰奶同堅果奶做基底，而且低卡路里、含0毫克膽固醇和0克反式脂肪，唔止素食朋友啱食，就連怕肥嘅朋友都OK呢。兩款口味分別係醇之抹茶味同朱古力味，前者味道甘香，後者甜身帶有奶油糖同椰香味。
3月18日更新
APM、銅鑼灣Sogo - Tokyo Banana
以前去親日本都會買返嚟做手信嘅香蕉吉士蛋糕，而家香港都買到喇，仲特意為咗今次嘅登陸，研發咗全新低溫冷凍版本，仲可以保存耐啲冇咁快到期添。經典原味香蕉蛋糕凍食又得常溫食又得，蛋糕軟綿，凍食嘅話啲吉士仲會有啲似雪條咁嘅口感，爽呢。
牛奶香蕉朱古力味夾心曲奇外層輕薄酥脆，夾住一層香蕉味嘅牛奶朱古力，甜度較高。
限定店同時帶嚟姊妹品牌Sugar Butter Tree 同鐮倉五郎本店嘅手信。嚐甜嘅朋友仔一定會鍾意埋白朱古力奶油砂糖夾心脆餅，以7種混合穀物製成麥香餅，塗上牛油同砂糖後再烘焙，夾埋白朱古力夾心，香甜酥脆，仲有粒粒砂糖嘅口感食到。
半月型嘅薄脆煎餅，係鐮倉嘅傳統小食。餅上壓有兔仔圖案，兩種口味分別係紅豆同抹茶，都係薄薄一層嘅香滑忌廉夾喺中間，一款微甜一款清香。溫提一下限定店會分別做到4月20（銅鑼灣）同30號（觀塘）。
3月10日更新
DON DON DONKI - 日清x DON DON DONKI 粟米濃湯味薯條
粟米濃湯味係好多人嘅飛佛，無論配落罐裝熱湯，定係香脆零食，嗰陣獨有嘅甜香味道都令人食過番尋味。今次配落薯條度當然都唔例外啦，薯條係細細條幼身款，夠晒脆口，味道香甜，得一細包仔未必夠喉啊。但設計就好方便，可以喺角落前個細口，直接倒入口食都得。
DON DON DONKI - 日清 果物穀物麥片 (士多啤梨醬味)
鍾意食穀物麥片做早餐嘅朋友仔，有新選擇啦~ 日清新出咗香甜嘅士多啤梨味穀物麥片，有粒粒脆球，仲有細片乾果，味道酸酸甜甜，幾醒神。就咁當零食啪又得，加入牛奶、豆奶或者乳酪等一齊食都得，好多變化，唔怕悶啊。
各大便利店+超巿 - 好侍 通加利粟米筒花生醬味
細細個好鍾意拎嚟扮女巫手指嘅粟米筒，有新味啊！係花生醬呢~ 老實講第一眼見到係會bling bling眼，不過可惜食落花生醬味又唔算好突出，少許失望。
7-11 - Luke’s Organic 純素白松露薯片
食得薯片都預咗係唔健康架喇… 但係呢隻係天然有機純素嘅，不含反式脂肪，無麩質，好似罪惡感冇咁大。白松露味好香啊，食完都仲有餘香喺度。
各大便利店+超巿 - 卡樂B 台式牛肉麵味粟一燒
打開包裝，即刻成陣湯底味湧出嚟呀，不過食落就冇想像中咁濃，所以唔會話好鹹。鍾情台式牛肉麵嘅朋友仔都可以試下。
7-11 - ORION 麻糬朱古力批紅豆忌廉味
又有韓國零食啦~ 雖然冇得飛，但好彩零食方面都追得好貼，韓國嗰邊出完冇耐我哋都有得食到啦。呢隻麻糬朱古力批中間夾住薄薄一層嘅紅豆蓉忌廉，不過都幾甜下。
各大便利店+超巿 - 北川半兵衛商店伝說 荔枝烏龍茶/柚子烏龍茶
呢個品牌嘅茶飲一向都頗受歡迎，茶味溫和香醇嘛。新出呢兩款果茶口味，柚子就當然清新啦，荔枝嗰款就有啖啖甜香，都幾啱而家呢啲咁悶熱嘅天氣飲。
3月8日更新
7-11 - PABLO限定甜品
掛住日本嘅味道嘅話，可以去便利店行個圈呀。7仔最近聯乘日本半熟芝士撻品牌PABLO推出一系列期間限定芝士甜品。
最吸睛嘅一定係好似平時睇卡通見到嗰啲芝士咁嘅蛋糕啦，造型滿分。不過食落就冇預期中咁濃郁嘅芝士香，反而有陣陣芒果嘅甜香，原來係芝士芒果味慕絲蛋糕嚟，口感仲好軟滑。
瑞士卷有兩款，一款係簡單啲嘅芝士忌廉瑞士卷，另一款係杏脯啫喱芝士忌廉瑞士卷。前者就咁睇落同普通卷蛋冇咩分別，但食落就幾有驚喜，除咗有蛋香，仲混和咗陣陣芝士嘅鹹香；至於後者則多咗層酸酸甜甜嘅果醬，中和膩感。
同樣都有杏脯啫喱嘅，仲有杏脯啫喱芝士忌廉泡芙，泡芙係軟熟嗰type，有空氣感。喺淡淡嘅芝士忌廉中間夾埋咗酸甜杏脯醬。
3月4日更新
7-11 - TAVOLA 純素米餅
今星期多咗一堆純素零食，其中呢隻米餅，無麩質、無燕麥無粟米成分，經過兩次烘焙之後，口感好鬆脆，兩款口味分別係黑胡椒味同蕃茄羅勒味，前者胡椒味重，連續食幾塊就有啲鹹，後者淡淡酸香就好啲。
7-11 - Tempe King 純素天貝脆片
天貝片係印尼嘅傳統食品，黃豆經過天然發酵再加紅甜椒粉調味，不過唔使聽到椒就即刻覺得好辣，試咗再講。唔多辣嘅，反而仲有少少鹹鹹地甜甜地咁，口感較硬身。
7-11 - Simply 7 純素脆片/脆條
唔是薯片，但同薯片一樣咁脆口嘅呢幾款純素脆片/脆條，分別係羽衣甘藍脆片 (刁草味)、扁豆片 (墨西哥辣椒味)同藜麥扭扭脆條，幾款口味都係有好多纖維嘅。羽衣甘藍嗰隻嘅草青味比較重，而扁豆片呢就辣中帶鹹，至於藜麥嗰款，則係相對上最淡味嘅。
7-11 - East Bali Cashews 純素腰果
呢兩包腰果細細包，以天然海鹽同椰子油調味，口痕嗰陣一粒一粒咁啪，眨下眼就食晒。不論係香脆海鹽味定香脆可可朱古力味都各有特色。
7-11 -味丹隨緣 純素杯麵
就連杯麵都有純素版，有湯麵有乾撈麵，素食朋友仔以後想速食就有更多選擇喇。幾款新推出嘅口味包括有熱浪島泰式酸辣湯麵、鮮蔬百匯湯麵、椎茸之味杯麵、麻婆豆腐湯麵、香椿素炸醬乾麵、麻醬辣腐乳乾麵等。建議調味粉落半包好喇，落晒都幾重口味。
7-11 - Green Common純素燉湯
想飲湯但又未必有時間自己慢慢熬嘅話，呢幾盒湯包就啱晒，就咁放入熱水加熱又得，放入微波爐整熱都得，夠晒方便。口味包括有蓮藕核桃栗子燉素湯、佛手瓜無花果眉豆百合燉素湯、牛蒡五行蔬菜三色藜麥粥、*南北杏蓮子腐竹薏仁燉素湯、*牛肝菌舞茸百合燉素湯同埋*哈蜜瓜鮮淮山蓮子燉素湯。 (**產品只係得港威商場內間7仔有得賣咋留意返)
3月2日更新
各大便利店及超市 - 雀巢 DRUMSTICK 薄荷朱古力脆筒
天氣越嚟越熱，品牌就出咗呢款薄荷朱古力脆筒同大家迎接初夏！打開包裝就咁睇可能會以為得薄荷味雪糕，其實咬開裡面係薄荷味雪糕同朱古力雪糕扭紋呀，薄荷雪糕口感清涼，朱古力雪糕就味道較甜。甜筒底仲有朱古力醬，口感豐富。單支裝於各大便利店陸續發售，家庭裝就會由惠康超級市場優先發售。
7-11 樂天 朱古力雪糕批
當朱古力bar、朱古力豆等零食通通都可以變成雪糕時，點解百力滋唔得？韓國大熱PEPERO 百力滋用例子證明係wok嘅。新出嘅兩款口味，花生朱古力雪糕批，同杏仁朱古力雪糕批，都係粗版百力滋造型，外層係特濃朱古力脆皮，並按口味分別加埋花生碎粒同杏仁碎粒，入面就係雲呢嗱雪糕，配合起嚟有多重口感又唔會太甜，後者仲有淡淡果仁香添。
2月26日更新
一步、Kappening 、CAVE Beer Point、網購 - 琲月 Moffe‧on
咖啡控，attention！又有一個新嘅本地咖啡品牌啦，琲月有多款嚟自世界唔同各地嘅咖啡豆選擇，無論係新鮮自家烘焙咖啡豆，定係咖啡掛耳包都會耐唔耐就有新款返，就算日日飲啡嘅朋友，都可以日日唔同風味。例如前排有橙香同雲呢嗱風味嘅埃塞羅比亞咖啡掛耳包，或者係帶有水果甜、室溫飲酸味又會突出少少嘅危地馬拉咖啡掛耳包，整體苦澀度低。喺office沖嚟飲都好方便，而且質素幾高啊。(更多銷售點留意佢哋網站更新)
各大便利店及超市 - 雀巢ACTI-V 希臘式乳酪飲品
希臘乳酪比普通乳酪嘅蛋白質較高而糖分較少，所以好受玩開運動健身或者追求健康嘅朋友仔歡迎。呢款全新希臘式乳酪飲品喺香港製造，含有益生菌、蛋白質，不含防腐劑，口感濃稠，奶味香濃，早餐飲返支都唔錯啊。
7-11 - HERSHEY'S 朱古力麻糬曲奇
知道大家掛住韓國零食，早前HERSHEY'S喺韓國嗰邊出咗呢款朱古力麻糬曲奇，加咗品牌朱古力粒粒，內餡係煙韌嘅麻糬，不過好多粉絲就只得個望字，望住個mon啲相就當自己食咗。但而家香港都有得賣啦！
7-11/Green Common - OmniEat 即食便當、點心
素食嘅朋友有時想貪方便，落便利店買個飯盒，而家都有選擇啦。7仔獨家發售兩款主食，包括黑椒新肉絲意粉 、芝麻燒汁新肉絲米線，都係用咗OmniPork Strip新肉絲，調味唔錯，幾有茶記風味，但略嫌油膩咗少少。
另外，想食light少少嘅有兩款素肉點心，新豬肉燒賣同新豬肉鮮蔬水晶餃，前者嘅燒賣皮以天然薑黃去調色，入口有淡淡菇香，另外仲有OmniPork新豬肉同馬蹄等餡料；後者則包住咗6款鮮蔬，例如蘑菇、粟米筍、甘筍等，適合食得比較清淡嘅朋友。
2月23日更新
7-11 - 雀巢 x KIT KAT脆皮雪糕批
大家都好熟悉嘅KIT KAT變咗做雪糕批呀，沿用經典紅啡包裝，喺雪糕櫃中特別搶眼！外層嘅朱古力脆皮，有粒粒大大粒嘅KIT KAT朱古力威化碎，口感就同平時食朱古力一樣咁脆，而且甜度仲略為低少少，幾有驚喜。
7-11 - Clédor 芝士蛋糕雪糕
韓國人氣品牌Binggrae 新出Premium 系列，分別有朱古力芝士蛋糕雪糕同紅絲絨芝士蛋糕雪糕兩款口味，兩款中間都有粒粒芝士蛋糕碎，前者另外加入咗榛子朱古力醬，算幾濃甜，後者則加咗士多啤梨醬，淡淡酸甜。不過講真，雖然有成粒芝士咬到，但芝士味就唔算超重，輕輕刷下存在感咁。
2月19日更新
網購平台 - What The Soup 自家湯品
想皮膚靚靚，幾時都需要湯水滋潤。最近有個新推出嘅本地自家湯品品牌，有多款湯水口味，由註冊營養師計晒卡路里，款款足料得嚟又高纖低卡，不含防腐劑、人造色素、味精、雞粉及添加劑，連埋包裝一齊加熱，幾分鐘就飲得，夠晒方便。其中，港式羅宋湯嘅牛骨湯底，加入咗大量牛骨同牛腩熬製；羽衣甘藍白豆湯咁，就有大量嘅新鮮蔬菜；鍾意菇香嘅朋友仔實會鍾意牛肝菌蘑菇湯，菇香四溢，口感濃稠仲啖啖有嚼口。
Grozla - Eatmate 韓國雞胸肉
對於各位想健身或塑身嘅朋友仔，蛋白質豐富嘅雞胸肉可以話係佢哋嘅主要食糧。不過餐餐都雞胸肉，又韌又寡，食多幾餐都只可以靠意志去堅持。而家有救星啦~ 有平台引入全新韓國雞胸肉品牌，多款加入雞胸肉製成嘅食品，好似小籠包、熱狗同炒飯等，仲有多款口味，有啲更可用氣炸鍋處理，夠晒方便。
雞胸肉小籠包有原味、泡菜味、燒肋骨味、辣海鮮湯味，皮雖然厚咗少少，但咬開肉汁滿滿。
軟滑雞胸有原味、蒜味同胡椒味，比起平時就咁白烚雞胸，有風味得多，啲肉質仲好嫩滑。
韓國熱狗喺街頭大行其道，健身版一樣有韓式雞胸肉熱狗。以麵粉、麵包糠、烤糙米粉等材料製成外層，包住入面一條雞胸肉腸，有煙燻味同辣味選擇。放入氣炸鍋或微波爐整都得。口感微微脆，小辣。
營養炒飯拼雞胸肉腸以韓國白米同多種蔬菜合成，低卡路里，炒飯唔會太乾，3款口味包括煙燻味、蒜味、辣味，不過對比以上幾款食物，炒飯嘅味就相對淡啲。
2月10日更新
Food Benefit網上商店 - Mr. Lee 健康杯麵 / 即食粥
有時貪快貪方便，又或者夜麻麻想搵宵夜食，都會快手淥個杯麵頂肚。但個個都知杯麵本身高油高鈉又高卡，食得多冇乜益。最新引入嘅英國品牌，低糖低鈉低卡仲冇加味精同添加劑等，可以話算係比較健康嘅杯麵。佢哋以越南白米製嘅低卡河粉做base，配搭多款具亞洲風味嘅湯底，例奴椰香雞肉喇沙、蔬菜清雞湯同五香牛腩湯等，食嗰陣記得要插到底攬勻先好食啊，每款嘅味都幾濃下。
而除咗健康杯麵，仲有即食粥品，有原味有蘑菇雞肉味。用白米加3種穀物製作，加熱水3分鐘就食得，方便到一個點。
各大超巿 - 公仔點心麵 紅燒牛肉味
繼同Hello Kitty聯乘之後，今次輪到布甸狗啦~ 口味係紅燒牛肉味，湯底有濃濃嘅牛肉香甜味。不過為咗布甸狗而買嘅粉絲要有定心理準備，只係得盒身隻西部牛仔布甸狗咋，開封後入面冇架。
7-11 - 無雙 酸辣粉
又有新嘅辣杯麵啦~ 不論你係鍾意酸辣定麻辣，都有得揀。濃郁惹味，辣勁凌厲，愈辣愈上癮呢。冬天都可能會食到流汗啊科科！
Feather and Bone - Lekker Stuff CBD
近期捲起一陣CBD熱，不論咖啡、啤酒定係朱古力等，都好興加入CBD大麻二酚嘅成分。唔使驚純CBD大麻二酚係合法嘅，同傳統認知嘅危險藥物——THC四氫大麻酚係唔同嘅。CBD大麻二酚具抗氧化、保護同舒緩神經等功效。有品牌推出嘅純素朱古力，每份注入10克，由南非人手配製嘅CBS大麻二酚萃取物，食落同一般朱古力冇分別，都係微甘帶甜。另外仲有隻CBD油，按時按量食嘅話更有效抗壓鎮靜，改善睡眠質素等。呢隻油可以滴落清水度一齊服用又得，滴落牛奶或咖啡度都得。
Circle K、百佳 - 雀巢 鷹嘜紅豆奶條
情人節就是要來點粉紅！呢款煉奶紅豆雪條採用北海道十勝紅豆製成紅豆醬，豆香清甜，煉奶甜香十足，成條就係甜嘅感覺。
7-11 - Pocky 心形櫻桃餅乾條
呢個2月份預咗要不停被閃盲吧，連百力滋都要出心心版！情人節限定嘅櫻桃味百力滋，食落就微微甜，不過每條嘅底部都係粉紅色心心，就絕對可以補充甜度啦。
7-11 - 粉紅火箭炒年糕拉麵 原味
呢盒100%韓國製造嘅韓式風味年糕拉麵，外表粉紅，內裡火紅！年糕口感煙韌，醬料甜甜地但辣度十足，一啲都唔可以睇少，怕辣嘅朋友記得唔好落晒成包粉啊。
7-11 - 樂天 棉花糖味碳酸飲料
好多人都鍾意飲忌廉溝鮮奶，呢隻都係架，不過係為咗情人節而特地推出嘅粉紅色棉花糖版，甜到漏，少女心一路飲一路要爆發啦。
1月21日更新
Circle K 少爺啤 x 甄沾記 椰子啤酒
本地酒廠少爺啤一向都同好多唔同品牌玩crossover，今次就聯乘本地老字號甄沾記一齊出咗兩款椰子啤酒。紅色罐嘅係椰子斑蘭啤，聞落去有好香甜嘅椰子味，飲落就有微微甜啦，帶有清爽嘅果香同陣陣斑蘭葉香；藍色嗰罐則係椰子花生黑啤，除咗有黑啤常有嘅可可、咖啡等香氣外，都有淡淡椰子同花生香，口感就偏薄身。過幾日（25/1）仲會有限量版嘅賀年禮盒套裝賣添。
7-11 獨家 Godiva 醇享朱古力系列
今次呢4款口味都好吸引呢，分別係72% 黑朱古力、海鹽黑朱古力、烤杏仁黑朱古力同牛奶朱古力，全部細細盒，一盒8條。除咗牛奶朱古力嗰盒相對比輆甜啲之外，其餘3盒都帶有微甘，各有唔同口感。
7-11 Lotte 酒心朱古力
食呢粒朱古力記得要一啖擺晒落口，因為中間嘅酒心都幾流心啊，咬開一半嘅話分分鐘流瀉咗。佢混和咗牛奶、白蘭地同咖啡，食落嘅咖啡味好香，又滲透住陣陣酒香，幾好食。
7-11 FUJIYA 酒心朱古力
呢隻酒心朱古力，完全係另一種味道嚟。呢隻帶有柑橘香氣，微微酸，帶少少甘苦。
Smarties 紐紐朱古力袋裝
細細個食到大嘅聰明豆，新裝由英國直送。3款口味包括白朱古力、牛奶朱古力同橙味朱古力。幾粒脆口朱古力豆連埋香濃嘅朱古力，甜度爆燈。
1月13日更新
卡樂B 薯條
今次呢款薯條，用咗美國嘅Russet薯仔製作，每條都好粗壯，口感當然實淨啲，又脆口啲。兩款新口味包括海鹽與醋味，同煙肉芝士味，前者喺突出嘅薯味中滲出陣陣醋酸，後者則係熟悉嘅經典鹹香感覺，好易食到停唔到口。
品客薯片 期間限定口味
薯片叔叔都好勤力出新口味，一向都人氣嘅洋蔥味薯片，今次加咗3位濃度！雖然開飯仔分唔到係咪真係濃咗3倍，但總之佢個洋蔥味真係好濃好濃啊，好似放咗成條洋蔥入口咁，重口味朋友仔會好鍾意。另外兩款期間限定分別係義大利起司四重奏同四川宮保雞丁味，前者味道相對較淡，而雞丁個醬味都算突出，有啲啲辣咁啦。
Neonotic Brews 精釀Cider
大部分女生都鍾意飲啲果香味重啲嘅啤酒，cider就啱晒喇。呢間酒廠有多款精釀cider，除咗大家最熟悉嘅apple cider之外，仲有檸茶cider同桃味cider等。其中apple cider係以幾個唔同品種嘅蘋果汁溝出嚟製作，味道香甜仲帶有啲熱帶菠蘿同芒果嘅香氣。檸茶嗰隻幾清新，Just Peachy呢(即係桃味) 係限定款式嚟，都幾fruity。順帶一提，常設款嘅酒標經過精心設計，放咗好多唔同嘅彩蛋元素落去，幾款樽嘅場景仲可以連埋一齊睇嘅添~
明治 抹茶朱古力
呢兩款抹茶朱古力都幾甜下，但甜得嚟又帶住抹茶嘅甘澀，抹茶控都乭以試下。開飯仔就比較推介有杏仁嗰款，口感豐富啲。不過如果鍾意奶香味多啲嘅朋友，就可以揀方塊形嗰款抹茶朱古力。
文：Kar
相、片：Tom Li