各位家長，港島區有3間高質餐廳推出親子套餐優惠呀！當中包括過江龍還原東京百年老店、魚子醬‧香檳主題法式餐廳同埋席前廚師發辦，享用指定大人套餐即送兒童餐，一家人齊齊食好啲～
週末親子優惠! A5和牛壽喜燒 鵝肝 魚子醬晚市套餐 [2位成人送1位小童] 
嚟自東京嘅百年老店，以壽喜燒見稱，灣仔店特別以「藝術館」為題，仲將日本總店嘅傢俱、收藏畫作運嚟呢度做裝飾，部分係古董嚟𠻹。其中一間房更還原總店榻榻米設計，好有日本風情。
【大人部分】
【開胃三點】先試嘅前菜、刺身同溫物，味道由清新酸爽到鹹香脆口逐漸推進。
【壽司三點盛】特別設計嘅壽司三點盛都以A5和牛為題，包括鵝肝A5和牛壽司、魚子醬和牛卷同埋海膽A5和牛散壽司，其中散壽司好似迷你丼飯咁，令人更滿足！
【主菜】主角壽喜燒嚴選A5和牛肉眼部位，大片肥美，最重要係店員會幫手烹煮，確保你食到最好嘅質感。
【時令水果】餐後以水果清一清，除咗常見嘅蜜瓜，連粉紅菠蘿都有機會食到。
【送】日山 · 兒童套餐
卡通飯糰配甘味咖喱雞肉丸，好似將日本卡通片嘅家庭menu變成現實版！餐廳仲將咖喱調成零辣版，細心照顧小朋友口味。
另外炸物拼盤同蔬果款式多元化，柱貝蒸蛋都足料鮮味，夠晒誠意～餐廳仲提供日式玩具，體驗感Up！
日山
地址: 香港灣仔堅尼地道15號合和商場4樓416號舖
矜貴法式魚子醬週末親子套餐 [2位成人送1位小童｜限時半價]
法式餐廳都有兒童餐?!冇錯呀，法式浪漫唔係大人嘅專利，而呢個套餐嘅主菜都啱小朋友食，名副其實開心share～留意大人部分以魚子醬同香檳為主題，為家長打造不一樣嘅親子餐體驗。
【大人部分】
【香檳+前菜】週末Chill吓是常識吧！大人先嘆香檳，再試充滿仙氣又精緻嘅開胃菜三味：北海道甜蝦他他、鮪魚蓉同埋龍蝦．魚子醬。
【意粉】意粉加芝士係經典配搭，但落埋乾魚子醬就唔係度度有喇。意粉入口彈牙creamy又鹹香，愈食愈惹味。
【主菜】三款主菜可以自選一款，其中招牌烤雞會即席點火燒一燒，令外皮更香口；伴時令蔬菜同煮至入味嘅野菌燴飯，味道香濃但唔會覺得膩。另外升級選擇之一，推介慢烤乳豬佐百里香汁，皮脆肉滑，小朋友都食到㗎。
【甜品】北海道牛奶雪糕成人版配咗魚子醬之外，仲內藏香檳啫喱！
【送】法式兒童套餐
兒童法餐都走精緻vibe㗎，而且有鮪魚沙律、豬肉香腸同炸薯條，盡力做到菜肉平衡。
意粉二選一，無論虎蝦番茄意粉抑或意式白汁雞肉長通粉，麵條熟度都做得啱啱好，亦煮得掛汁惹味。
北海道牛奶雪糕兒童版係香醇嘅牛奶味道，小朋友一定鍾意。
HUSO
地址: 香港中環皇后大道中74號石板街酒店1樓2號舖
而家食廚師發辦可以帶埋小朋友喎，大人同小朋友嘅菜式都融合日本時令食材，係少有嘅高質日本菜親子體驗。
【大人部分】
【前菜】北海道花咲蟹蟹凍晶瑩剔透，搭配沖繩海葡萄口感清爽，加埋日式風味土佐醋作調味就夠晒開胃。
【刺身三味】大大隻岩手縣Prime珍蠔佐梅酒啫喱，結合奶香味、清甜同乾淨感覺；而嚟自日本三重縣嘅鰤魚主要用醬油同山椒七味帶出獨特鮮味；加埋經稻草煙燻、淋上特調油蔥山葵油醋嘅高知縣本鰹魚，味道層層遞進！
【小鉢】石川縣八爪魚(真章)配大根以柔煮方式烹調，即係用比慢煮更細火嘅方式烹煮，令甜醬油完全滲入八爪魚，同時保持軟腍口感。
【時令魚/貝手握壽司】壽司分為兩部分，先品嚐鹿兒島嘅白星苗鯛、豐後水道嘅縞鰺(深海池魚)、北海道嘅北寄貝、正值當造嘅岩手縣秋刀魚，以及山口縣赤貝。
【酒肴】然後試白燒鰻魚隔一隔，鰻魚燒得香口，加上海藻鹽提味幾醒胃。
【後段壽司】人氣中拖羅同大拖羅喺呢個時候登場，魚油嘅油香填滿口腔呀！海膽都係人氣款式，師傅將一排海膽捲成雪糕筒形狀，既足料，Size又易入口。
【特別料理】點火喇！師傅為咗令燒賣造型嘅吞拿魚蓉更香口，即燒魚肉迫出油分滴落魚蓉！而高級料理甘鯛立鱗燒都可以喺呢個套餐食到，而且做到魚鱗超脆，肉質結實，好考師傅功架。
【吸物．甜品】九州地雞清湯鮮甜零油感；自家製柚子雪葩就以楊枝甘露為靈感，你可以按喜好加入椰奶，整體味道好fresh！
【送】兒童廚師發辦
就咁睇兒童版，精緻度同細節感已經100分，好似前菜都有沙律、炸物同茶碗蒸三款，完全啱小大人呀！
同樣以壽司做主角，包括鰻魚、燒三文魚卷、三文魚親子杯同埋多啦A夢玉子燒。
A5和牛烏冬大大碗，湯底清甜；甜品就有黑芝麻雪糕同黑糖大福，最好嘅係唔會過甜。
仲有兒童飲品放題，加埋海洋主題佈置，小朋友一定鍾意！
月山
地址: 香港中環皇后大道中80號H Queen's 19樓
文：Cathy
相：Reol
片：Yan Yan
