今年終於有得喺場內食嘢啦！講緊即將喺 8 月 17 號開鑼嘅第 33 屆美食博覽，無論係公眾館定尊貴美食區，都全面開放飲食。尊貴美食區今年更新設「醇酒．醉人」主題，可以買到各地嘅靚酒。上次同大家睇咗必搶超值優惠同福袋，今次嚟睇睇有咩精選美食必買必食！
 

尊貴美食區精選

 
日式千層酥、水果大福　昼月（3B-B09） 

位於銅鑼灣嘅居酒屋嚟到美食博覽，推出兩款打卡一流嘅日式甜品！日式千層酥即叫即燒，有心形嘅士多啤梨口味，同圓形嘅椰子菠蘿口味。而水果大福套裝就一盒有齊士多啤梨、蜜柑、無花果同時令水果四款口味。
 

松露蜂蜜奶茶、白松露蜂蜜手工啤　Great (HK) Investment Company Limited（3B-D11）

意大利松露品牌 BOSCOVIVO 分別同香港品牌師父好茶及吹啤啤合作，以白松露槐花蜂蜜製作出松露蜂蜜奶茶及白松露蜂蜜手工啤！前者一入口就有濃郁松露香，而且估唔到同港式奶茶又幾夾。後者口感就比較清爽，同樣帶白松露芳香。同場亦有冬季白松露手工雪糕。
 

特濃果仁雪糕　The Nutter Company Limited（3B-E04）

品牌喺香港自設廠房，主打 100% 純果仁醬，之前推出雪糕大受歡迎後，今年美食博覽一口氣推出四款口味：開心果海鹽、特濃花生醬、特濃榛子、特濃黑芝麻，當中特濃黑芝麻更係會場首賣！日前新推，選用日本老字號黑芝麻嘅升級版黑芝麻醬，喺會場亦有得買唷。
 

丹尼船長米米花　Taac Food Limited（3B-C16）

望落有啲似爆谷，但其實係用 100% 台灣宜蘭動山好米製作，以烘烤方式製作，酥脆得嚟唔油膩。加上用海藻糖代替一般砂糖，無添加防腐劑，食得更健康。手炒鹽味焦糖味係台灣最受歡迎嘅款式，如果想試晒亦可以買有齊八款唔同口味嘅福袋呀。
 

勁辣薑汽水、金牌湯力水　Hong Kong Cannery Limited（3B-F03）

本地品牌閣樓釀造開業近一年，最近就將兩款皇牌產品：麻辣薑汽水同草本湯力水嚟個「升呢」加強版！勁辣薑汽水比麻辣薑汽水多咗炮彈椒同牛角椒，味道辛辣又不失辛香料嘅優雅香味。而金牌湯力水畀草本湯力水加入更多龍膽草同香料，苦味更突出更適合配 Gin 酒啊。
 

台灣手工精製蜂蜜酒　生活有限公司（3B-C13）

香港品牌哲同台灣酒廠合作，推出蜂蜜酒、金桔蜂蜜酒、洛神花蜂蜜酒、啤酒花蜂蜜酒，均採用台灣在地蜂蜜酒，經過八個月發酵同熟成。原味帶龍眼花香氣同淡淡蜜香，鍾意特別啲嘅可以試試啤酒花蜂蜜酒，會帶少少啤酒花嘅獨特澀味，清爽順口。
 

黑松露意式雪糕　香港凱潤食品有限公司（3B-E02）

由本地品牌珍菌天下研發嘅黑松露意式雪糕，選用意大利黑松露製作，有黑松露芝士同黑松露海鹽兩款口味，口感柔滑富黑松露幽香。會場會有 $70／2 杯、$120／4 杯嘅優惠價（原價 $40／杯）。
 

公眾館精選

 
24 ICE 雞尾酒冰棒　永志實業有限公司（3C-D07）

嚟自荷蘭嘅品牌 24 ICE 今年抵港，佢哋主打嘅雞尾酒冰棒有六款 5% 酒精：Mojito、Strawberry Daiquiri、Gin & Tonic、Vodka Energy等，前兩款更有 0% 無酒精版本，最啱開 Party 嘅時候食。憑美食博覽入場免費派發嘅優惠券更有購買 5 支試食裝減 $10 嘅優惠啊。
 

虎堅果純素雪糕　La Porte de Marketing Ltd（3C-E06）

近年多咗人飲植物奶，本地品牌 Growsome O 就用虎堅果、大豆同燕麥作為原材料，製作出四款健康又高蛋白質嘅純素雪糕。四款口味：黑朱古力、豆腐、宇治抹茶同焙茶更會以會場優惠價 $25／杯發售（原價 $32／杯）！
 

壽桃沙嗲牛肉麵、大寬粉系列　新順福食品有限公司（1E-A02）

想喺屋企都食到茶餐廳風味，可以試下壽桃牌嘅沙嗲牛肉麵，會場更有每日下午 3:15 特價 $30／箱（六個裝）嘅優惠！特價每日限量 100 盒呀留意返。另外亦有全新推出嘅大寬粉系列，口感特別軟糯彈牙，有紅油、炸醬同麻醬三款口味。
 

月餅精選

 
蠟筆小新 x 恆香團圓禮盒　恆香老餅家有限公司（1E-B02）

本地老字號餅家同日本動漫蠟筆小新合作，推出多款月餅同禮盒，蠟筆小新 x 恆香團圓禮盒包裝以書包為藍本設計，裡面係四件迷你蛋黃白蓮蓉月餅，隨盒附送蠟筆小新購物袋。另外亦有蠟筆小新 x 恆香酥餅便當，雙層便當盒裝住四件流心奶黃酥，隨盒附送蠟筆小新便當袋。
 

迪士尼米奇與好友系列月餅套裝　奇華餅家有限公司（1D-D02）

今年係迪士尼 100 周年，所以餅家亦特別聯乘推出集合多個迪士尼經典人物嘅月餅禮盒。月餅口味有蛋黃奶皇月餅同朱古力味香橙乳酪奶皇月餅兩款，可以選擇六個裝嘅燈籠月餅，亦可以選擇單個裝禮盒，兩款套裝勻有附贈迪士尼米奇與好友系列購物袋。
 

阿華田酷脆冰皮月餅　榮華食品製造業有限公司（1B-D02 & 1E-C34）

今年首度推出嘅阿華田酷脆冰皮月餅，咬開裡面有阿華田朱古力麥芽同麥芽酷粒脆脆，朱古力香同麥香交織，加上脆脆口感好過癮。更有會場特價 $149（標準價 $258）！
 

檸檬爆脆冰皮月餅　大班麵包西餅有限公司（1C-E02）

呢個品牌嘅冰皮月餅多年嚟都深受歡迎，而且不斷推陳出新，今年爆脆系列冰皮月餅就新增檸檬爆脆口味，檸檬香氣突出、酸中帶甜，清爽刺激。另外佢哋嘅找素系列冰皮月餅都有唔少好評，流沙芝麻、西尾抹茶紅豆等都值得一試。
 

貓山王榴槤冰皮月餅、黑刺榴槤冰皮月餅　高格行有限公司（1D-A21 & 1D-A22）

品牌一個不榴嚟自馬來西亞，選用馬來西亞果園樹上熟嘅榴槤。繼招牌貓山王榴槤冰皮月餅之後，今年推出以黑刺榴槤配搭竹炭冰皮製作而成嘅黑刺榴槤冰皮月餅。會場更有買三盒貓山王榴槤冰皮月餅（六件裝），送一盒黑刺榴槤冰皮月餅（兩件裝）嘅優惠啊。
 

迪士尼 100 周年系列唱片機造型月餅禮盒、彼思反斗奇兵系列勞蘇月餅禮盒　美心食品有限公司（1C-C02）

迪士尼唱片機造型禮盒唔單止外表似足一部迷你黑膠唱片機，而且轉動唱片再放指針，真係會有音樂播出嚟，驚喜度十足。禮盒裡面有四個美心蛋黃白蓮蓉月餅。而反斗奇兵勞蘇月餅禮盒就有立體勞蘇頭像，加上粉紅色鐵罐，裡面有四件美心純正豆沙月餅。
 

東海堂 x 霜田有沙月貓物語之月餅　美心食品有限公司（1C-C02）

搵嚟日本著名貓咪插畫家霜田有沙合作，推出嘅月貓物語之月餅以中秋月兔為設計靈感，貓咪戴上兔耳萌度加倍！一盒四件流心奶黃月餅以係可愛貓掌造型。會場更有買兩盒加 $1 換環保袋嘅優惠呀。
 

美食博覽詳情：

第 33 屆美食博覽
日期：2023 年 8 月 17 日（星期四）至 21 日（星期一）
地址：香港島灣仔博覽道 1 號香港會議展覽中心
購票指南及開放時間：https://bit.ly/3s0t29w

文：Cathy.H
相：Yan Yan