第32屆美食博覽將於8月11號回歸！同往年一樣分為公眾館同尊貴美食區，尊貴美食區更新增「啤酒．暢飲」主題，可以買到多間本地手工啤酒廠嘅精釀啤酒。上次同大家睇咗必搶$1優惠/福袋，今次嚟睇睇有咩精選推介，部分更係會場首賣或者期間限定，機會錯過咗就無啦。
 

公眾館精選

 
首創焗焗雞　擊正(香港)有限公司（1A-E28）

全新簡易煮食包品牌焗焗雞由第三代「雞佬」Howard創立，選用無激素三黃雞配天然香料，四款口味都不含味精。買返屋企原袋放入焗爐或者氣炸鍋加熱就食得，特製高溫真空袋係歐洲製造，符合歐盟指引同FDA標準，食得方便又放心。
 

巨型赤紅虎蝦　一方食品亞洲有限公司（1D-C28）

鍾意海鮮朋友唔好錯過佢哋嘅安達曼海野生赤虎蝦，有巨同大兩款尺寸，都係嚟自全天然無污染嘅安達曼海水域。而且都係100%野生海捕，捕獲後立即加工速凍，蝦頭蝦膏鮮甜、蝦肉飽滿彈牙。
 

柚子檸檬雪葩梳打、青瓜青檸梳打　日照夜霧有限公司（1C-D21）

夏日炎炎需要梳打消暑，呢間由兩個九十後女仔初創嘅飲品品牌今年就有無酒精梳打套裝，$100任揀四支。特別推介柚子檸檬雪葩梳打同青瓜青檸梳打，兩款都係今年美食博覽新品，酸酸甜甜好清新。大人版的菠蘿冰 - 菠蘿蜂蜜酒，那年拾捌 - 雜果賓治蜂蜜酒，同盛夏- 芒果美式小麥都係新推出呀。
 

$30黑松露醬　歐洲食品有限公司（1D-B27）

意大利馬素尼黑松露醬以精選優質野生天然松露，混合蘑菇、黑橄欖、山柑等製作而成。新聞發佈會當日由廚師即席示範炒蛋加黑松露醬，香氣十足！憑消費更可以$30優惠價換購一樽意大利馬素尼黑松露醬呀。
 

$100/3支台灣紅豆水　寶島好物(香港)有限公司（3C-C18）

台灣唔少女生都會飲紅豆水，皆因紅豆有鉀有助排除鈉可以去水腫，同時可以補鐵質。呢款輕食尚纖濃紅豆水選用台灣大寮8號紅豆製作，以冷釀工法萃取紅豆嘅所有營養同味道。而且喺美食博覽有$100/3支嘅優惠價，比建議零售價$42/支平得多！
 

益力多LT　香港益力多乳品有限公司（1C-A17）

「你今日飲咗未」嘅益力多喺2021年推出更低糖高纖嘅LT版，每支含糖量減至3.6克。美食博覽期間購買兩排益力多或益力多LT，可加$5換購益力多保溫袋一個及玩夾公仔機機會一次。數量有限換完即止。
 

寶石女神禮盒　香港酒業總商會（展位編號待定）

鍾意氣泡酒嘅朋友可以留意呢個超值禮盒，裡面包括一樽意大利Luna di Luna Moscato或Prosecco氣泡酒（750mL），一個閃閃變色珠片酒瓶套，同兩隻幻變香檳杯。香檳杯上面嘅圖案更會隨溫度變色，非常夢幻！
 

尊貴美食區精選

 
啤酒福袋、芒果馬鞭草Pale Ale　大圍啤酒廠有限公司（3C-B10）

今年尊貴美食區新增「啤酒．暢飲」，其中一間參展嘅就係大圍啤，屆時將會首賣新品芒果馬鞭草Pale Ale，專為夏日而設，味道清新。另外想買佢哋最出名嘅伯爵茶Amber Ale嘅話，現場會有兩罐伯爵茶Amber Ale加三包薯片特價$100嘅福袋！另一款福袋就係任選四支啤酒加四包大薯片賣$220，開Party必備啊。
 

鐵甲萬能俠限定版紅酒　萃德堂有限公司（3B-F19）

適逢今年鐵甲萬能俠動畫喺日本首播50週年，萃德堂同日本公司Alphamax合作，並獲得作者永井豪授權，設計出呢支鐵甲萬能俠50週年紀念限定版紅酒！限量1000支，每支酒均附送鐵甲萬能俠頭像設計嘅超合金掛飾。紅酒則選用山梨縣生產嘅紅葡萄酒，充滿水果香易入口。
 

樽裝Espresso Martini　Winstons Coffee Limited（3C-A22）

尊貴美食區亦唔少得咖啡，喺西環有兩間分店嘅Winstons Coffee就將最近新出嘅Bottled Espresso Martini帶嚟會場，用自家烘豆嘅House Blend咖啡加上Mr. Black咖啡甜酒沖調而成，想口感更輕盈可以自己用Shaker搖出泡沫呀。到時亦會有其他Cocktail、Cold Brew咖啡同自家烘焙咖啡豆售賣。
 

喜如果仁月餅　諄益國際有限公司（3B-C09）

講到果仁同月餅大家可能剩係諗到五仁月餅，但呢間果仁貿易公司就創立新品牌喜如，推出一系列新式果仁月餅，分別係玫瑰開心果月餅、楓糖碧根果咖啡月餅、榛子杏仁朱古力月餅、黑松露火腿夏威夷果仁月餅，配搭有驚喜。
 

月餅精選

 
全新沖繩香檸燕麥月餅　大班麵包西餅有限公司（1C-E02）

大班今年再度推出全素冰皮月餅，當中沖繩香檸燕麥更係新口味，選用日本直送沖繩香檸製作，味道清爽。而無論係大班冰皮迷你醇素月餅定其他冰皮月餅禮盒，都換上最新嘅虛擬科幻元宇宙主題包裝。場內除咗月餅，更會有人氣烘焙產品，包括法式牛奶布丁包同日式布丁燒發售！
 

B.Duck流沙月餅　榮華食品製造業有限公司（1C-A02）

榮華餅家聯乘B.Duck推出B.Duck流沙奶黃迎月月餅盒，呼應返近年嘅環保趨勢，特別以可重用嘅B.Duck便當盒作為禮盒，更附送一套餐具。便當盒裡面係四個香港製造嘅B.Duck流沙奶黃月餅，散發香濃鹹蛋黃香氣，口感綿密。
 

角落小夥伴月餅　奇華餅家有限公司（1D-D02）

奇華餅家同角落小夥伴合作推出美食博覽限定嘅兩款角落小夥伴福袋。角落小夥伴音樂列車奶皇月餅福袋有音樂列車奶皇月餅禮盒、環保袋、防UV雨傘；角落小夥伴奶皇月餅福袋有齊四款角落小夥伴奶皇月餅（單個裝）、環保袋、餐碟、微波爐碗。留意返每日每款限量100套。
 

多啦A夢月餅　美心食品有限公司（1C-C02）

今年東海堂再度同人見人愛嘅多啦A夢合作，禮盒以多啦A夢同傳統日系花紋為設計。盒內有兩款月餅：十勝紅豆月餅、奶黃月餅各兩個，月餅更印上多啦A夢鈴鐺圖案，每盒亦附送多啦A夢精美布袋一個。
 

蜘蛛俠月餅、Minions月餅　美心食品有限公司（1C-C02）

Marvel超級英雄當中嘅蜘蛛俠變成月餅禮盒，造型圓柱禮罐嘅蓋更可以投射出蜘蛛俠嘅頭像，盒裡面係六件拔絲蓮蓉月餅。另一款Minions迷你兵團月餅就有立體造型禮盒，裡面係三件拔絲蓮蓉月餅，金黃餅皮包住清甜蓮蓉，蛋黃更有拉絲效果。

第32屆美食博覽

日期：2022年8月11日 (星期四) 至15日 (星期一)
地址：香港島灣仔博覽道1號香港會議展覽中心
購票指南及入場守則：https://bit.ly/3cYoLvP
衞生措施及健康資訊：https://bit.ly/3Bxj95Y

文：Cathy.H
相：Michael