一年容易又中秋(其實都唔容易),又開始揀定月餅入貨啦,早買除咗早享受之外,仲可以有早鳥優惠~ 而如果你下星期會去美食博覽嘅話,更加會有啲會場限定優惠添~ 即刻嚟個大巡禮,揀定心水先啦~
卡通系
小丸子奶皇月
小丸子唔使又有心事啦,無論係月餅盒定係月餅都係小丸子同佢啲同學仔呀,好鬼靚,最開心係如果喺美食博覽買嘅話,買指定款式仲有得連埋小丸子麻布袋、行李牌或者縮骨遮拎返屋企添呀!
攤位:奇華 (1E-B02)
多啦A夢奶皇月
你睇~叮噹嚟啦~ 叫開叮噹又好,多啦A夢又好,總之呢隻機械貓出月餅呀!係金紗奶皇月嚟,一個多啦A夢盒入面有4件多啦A夢月餅,粉絲見到應該瞬間被收服,立馬要喺自己個「百寶袋」度搵銀包出嚟啦,場內買有優惠價呀。
攤位:A1 Bakery(1B-B27)
Tsum Tsum冰皮
中秒節點少得人見人愛嘅tsum tsum?有迪士尼公主、米奇同小熊維尼嘅包裝揀,冰皮月餅嚟嘅,分別係雜果味、芒果味等等,個盒真心幾靚。
攤位:美心(1C-C02)
貓咪主題月餅
各位奴才,主子出月餅你哋唔係唔撐場呀嘛?喵形㗎喎,愈望愈cute cute喵~ 有綠茶紅豆麻糬味,同埋奶黃月餅,聽講兩款都係限量100盒左右咋!兩隻味都想試晒嘅話,可以考慮買2件裝,少少地過下癮都唔錯。同樣係限量,500套。
攤位:Kwok Nung Trading Limited(3B-F06)**尊貴美食區
榴槤系
D-24榴槤冰皮
榴槤控福音,以下落嚟介紹3款都係榴槤冰皮!先有美心嘅禮盒,餅皮用北海道3.6牛乳製作,而內餡嘅榴槤,係100%馬來西亞貓山王榴槤肉呀,夠晒香濃!千其唔好喺公司開嚟食呀!另外仲有款「榴槤飄香mini4」,一盒入面有齊貓山王榴槤同D-24榴槤冰皮,心心眼-ed!
攤位:美心(1C-C02)
榴槤冰皮(送榴槤)
而金月堂嘅貓山王榴槤冰皮呢,一切開就見到全部都係榴槤蓉喇!唔好尖叫住,聽埋先。喺會場買一盒,仲會送一個貓山王榴槤添呀呀呀呀!!!
攤位:金月堂(1A-C23)
榴槤冰皮
而呢間榴槤冰皮就有一半係貓山王,一半係XO,建議先食味道相對輕淡少少,係少少嘅XO,然後再食濃郁啲嘅貓山王!
攤位:威信國際(1C-C24)
新口味
冰室系列
冰皮口味總係推陳出新,有冇諗過各種茶記冰室嘅飲品,都可以變做月餅先?呢兩set連包裝都好冰室磁磚牆咁嘅冰皮,「茶冰檸走」嗰盒係凍檸茶、紅豆冰、茶走同鹹檸味,而「茶冰樂鴦」嗰盒就係凍檸茶、紅豆冰、凍檸樂同鴦走味,喺會場單買一盒後者,100蚊有找添呀!
攤位:美心(1C-C02)
水果冰皮
大班冰皮又係年年都有新驚喜,今年就以日系水果做主題,創作咗日本白桃、北海道赤肉蜜瓜、日本西洋梨味嘅冰皮,全部都好香甜呀!走開韓風嘅朋友都有韓國水果奶主題嘅新味,包括係香蕉奶、草莓奶同蜜瓜奶,你問我邊盒開心啲?梗係……(獎門人tone)打和!憑場內小冊子嘅優惠券,仲可以用60蚊換到3包指定迷你冰皮添。
攤位:大班(1C-E02)
Green Common純素月餅
素食嘅朋友仔一樣有新口味月餅揀,Green Common除咗往年都有嘅藍莓果仁月餅之外,今年有新味,椰棗無花果月餅。椰棗香甜、無花果清甜,配埋有咬口嘅南瓜子同花生粒,感覺唔太膩呀。
攤位:Common Good Trading Limited (3B-D12)**尊貴美食區
第29屆美食博覽
展覽日期:2018年8月16至20日
地址:香港灣仔港灣道1號香港會議展覽中心
開放時間及購票指南:官方網站
文:Kar
相:Kar、Cathy